ເກີດເຫດຟ້າຜ່າຕົ້ນໂພ ງົວຕາຍ 9 ໂຕ

313

ໄລຍະລະດູຝົນແມ່ນຄວນລະມັດລະວັງ ໂດຍສະເພາະໃນຂະນະທີ່ກໍາລັງມີຟ້າຮ້ອງ, ຟ້າເຫຼື້ອມ. ຫ່ວງວ່າຈະເປັນຄືເຫດການນີ້ເວລາປະມານ 23:00-24:00 ໂມງ ຂອງຄືນວັນທີ 30 ເດືອນກັນຍາຜ່ານມາ ໄດ້ເກີດເຫດຝົນຕົກໜັກ ແລະ ຟ້າເຫຼື້ອມ.ຈາກນັ້ນ, ໄດ້ເກີດຟ້າຜ່າໃສ່ຕົ້ນໂພທີ່ຢູ່ແຄມນ້ຳແບງ ເປັນເຫດເຮັດໃຫ້ງົວຂອງປະຊາຊົນທີ່ມັດຢູ່ກ້ອງຕົ້ນໂພ ຕາຍຈຳນວນ 9 ໂຕ.

ທ້າວ ຈຸມ ປັນຍາສັກ ປະຊາຊົນຢູ່ບ້ານຍໍ້ ເມືອງແບງ ແຂວງອຸດົມໄຊ ເຈົ້າຂອງງົວ ລາຍງານໃຫ້ຮູ້ວ່າ: ງົວທີ່ຕາຍທັງໝົດແມ່ນເປັນງົວຂອງຕົນເອງທີ່ລ້ຽງມາຫຼາຍປີແລ້ວ ລວມມີທັງໝົດ 15 ໂຕ, ການລ້ຽງແມ່ນໄດ້ປູກຫຍ້າເປັນສວນ ພ້ອມທັງໄດ້ເຮັດຄອກເປັນຢ່າງດີ ແຕ່ມາໄລຍະລະດູແລ້ງເຫັນວ່າຫຍ້າທີ່ປູກບໍ່ພຽງພໍກັບຄວາມຕ້ອງການໃຫ້ງົວກິນ ຈຶ່ງໄດ້ນໍາເອົາງົວມາລ້ຽງຢູ່ແຄມນ້ຳແບງ ພ້ອມທັງອາໄສຕົ້ນໂພໃຫຍ່ເປັນແຫຼ່ງ ແລະ ເພື່ອເປັນຮົ່ມໃຫ້ແກ່ງົວ.

ມາຮອດຕອນແລງຂອງວັນທີ 30 ຕົນເອງໄດ້ນໍາງົວມາມັດໄວ້ກ້ອງຕົ້ນໂພຕາມປົກກະຕິຄືຜ່ານມາ ພໍຮອດເວລາເວລາປະມານ 23:00-24:00 ໂມງຂອງຄືນວັນທີ 30 ກັນຍາຜ່ານມາ ໄດ້ເກີດເຫດຝົນຕົກໜັກ ແລະ ຟ້າເຫຼື້ອມແຮງ ເຊິ່ງອາດເປັນເຫດເກີດຟ້າຜ່າໃສ່ຕົ້ນໂພ ບ່ອນທີ່ຕົນເອງມັດງົວໄວ້ ເຮັດໃຫ້ກະແສຟ້າຜ່າລົງໃສ່ງົວຕາຍ ຈຳນວນ 9 ໂຕ. ໃນນັ້ນມີງົວເພດແມ່ຈຳນວນ 6 ໂຕ ແຕ່ວ່າຍັງດີເຫຼືອ ຈຳນວນ 6 ໂຕ.

ມື້ຕໍ່ມາເວລາປະມານ 6:00 ໂມງ ຕົນເອງກໍໄດ້ກະກຽມເພື່ອຈະນຳງົວໄປປ່ອຍກິນຫຍ້າຕາມປົກກະຕິຄືທຸກມື້ ພໍໄປເຖິງກໍເຫັນງົວຕາຍເປັນກອງຢູ່ກ້ອງຕົ້ນໂພ ຈຶ່ງເກີດປະຫຼາດໃຈວ່າງົວຕາຍຍ້ອນຫຍັງ. ຈາກນັ້ນ, ໄດ້ແຈ້ງໃຫ້ສັດຕະວະແພດຂອງເມືອງແບງ ມາກວດກາຊາກຂອງງົວເພື່ອຊອກຫາສາເຫດຂອງການຕາຍ ພ້ອມທັງໄດ້ແຈ້ງທາງອົງການປົກຄອງເມືອງເຂົ້າມາເບິ່ງນຳ.

ຜ່ານການກວດກາ, ສັນນະສູດເບິ່ງເຫດການຕົວຈິງ ປາກົດວ່າເຫັນຮອຍຟ້າຜ່າຕົ້ນໂພຈາກປາຍລົງຫາພື້ນດິນເຮັດໃຫ້ກິ່ງ, ງ່າຕົ້ນໂພຈຳນວນໜຶ່ງແຕກຫັກ ແລະ ເຫັນເປັນຮອຍຄ້າຍຄືໄຟໄໝ້ເປັນຈຸດຕາມຕົນໂຕຂອງງົວ ເຊິ່ງຄາດວ່າຖືກກະແສໄຟຈາກຟ້າຜ່າ.

[ ຂ່າວ: ສະຖານີວິທະຍຸໂທລະພາບແຂວງອຸດົມໄຊ ]