ຂະຫຍາຍເພີ່ມອີກ ໂຮງໝໍພາກສະໜາມ 3 ແຫ່ງ ຮອງຮັບຄົນເຈັບໄດ້ເກືອບ 2 ພັນຄົນ

345

ໃນຕອນເຊົ້າວັນທີ 3 ຕຸລາ 2021 ຜ່ານມາ ທ່ານ ດຣ.ຄໍາໃສ ເດດລືໄຊ ຮອງຫົວໜ້າກົມປິ່ນປົວ ແລະ ໜ້າທີ່ການ ກະຊວງສາທາລະນະສຸກ ຖະແຫຼງຕໍ່ສື່ມວນຊົນ ເຖິງຄວາມສາມາດຮອງຮັບຄົນເຈັບທີ່ຕິດເຊື້ອພະຍາດໂຄວິດ-19 ຢູ່ໃນນະຄອນຫຼວງວຽງຈັນວ່າ: ເພື່ອຄວບຄຸມ ແລະ ປ້ອງກັນການລະບາດຂອງພະຍາດໂຄວິດ-19 ໄດ້ຂະຫຍາຍໂຮງໝໍພາກສະໜາມຂຶ້ນອີກ 3 ແຫ່ງ ສາມາດຮອງຮັບຄົນເຈັບໄດ້ອີກຈໍານວນຫຼາຍຄື ໂຮງໝໍພາກສະໜາມດາວເຮືອງ ຢູ່ຂົວມິດຕະພາບ1 ສາມາດຮອງຮັບຄົນເຈັບໄດ້ 800 ຄົນ, ໂຮງໝໍສະໜາມກີລາຫຼັກ 16 ສາມາດຮອງຮັບໄດ້ 360 ຄົນ ແລະ ໂຮງຮຽນຝຶກອົບຮົມວິຊາຊີບຄົນພິການສີເກີດ ສາມາດຮອງຮັບຄົນເຈັບໄດ້ທັງໝົດ 600 ກວ່າຄົນ.

May be an image of 1 person and text that says 'พาะภัด ถอบถุม COVID- Center fo OVID-19'

ທ່ານ ດຣ. ຄໍາໃສ ເດດລືໄຊ ໃຫ້ຮູ້ຕື່ມອີກວ່າ: ທີມງານພະນັກງານວິຊາການແພດໝໍ ກຽມພ້ອມໄປຮັບຄົນເຈັບທີ່ຕິດເຊື້ອພະຍາດໂຄວິດ-19 ເພື່ອໄປປິ່ນປົວຈົນສຸດຄວາມສາມາດ ແຕ່ເນື່ອງຈາກ ປັດຈຸບັນຄົນເຈັບມີຫຼາຍ ແລະ ຢູ່ກະແຈກກະຈາຍ ຈຶ່ງມີຄວາມຫຍຸ້ງຍາກ ແລະ ບໍ່ສາມາດໄປຮັບໄດ້ຢ່າງທັນການ, ແຕ່ເຖິງຢ່າງໃດກໍຕາມການນໍາກະຊວງສາທາລະນະສຸກ ກໍຄືຄະນະສະເພາະກິດ ໄດ້ມີຄວາມພະຍາຍຍາມສູງ ເພື່ອຄວບຄຸມການລະບາດຂອງພະຍາດໂຄວິດ-19 ໂດຍການຈັດຫາສະຖານທີ່ຈໍາກັດບໍລິເວນ ແລະ ສະຖານທີ່ປິ່ນປົວໃຫ້ພຽງພໍກັບຜູ້ຕິດເຊື້ອໃນແຕ່ລະມື້.

ຍັງໄດ້ສົມທົບຮ່ວມມືກັບອົງການອະນາໄມໂລກ ຮ່າງຂໍ້ແນະນໍາສໍາລັບຜູ້ຕິດເຊື້ອທີ່ບໍ່ມີອາການ, ສາມາດພັກຢູ່ໂຮງແຮມທີ່ມີເງື່ອນໄຂ ເຊິ່ງໄດ້ຮັບອະນຸຍາດຈາກຄະນະສະເພາະກິດແລ້ວ, ນອກນັ້ນຍັງໄດ້ຮ່າງຂໍ້ແນະນໍາສໍາລັບການຕິດຕາມປິ່ນປົວຢູ່ເຮືອນຂອງຜູ້ບໍ່ມີອາການ, ຍ້ອນພະນັກງານແພດໝໍມີຈໍານວນຈໍາກັດ ເຊິ່ງການເປີດໂຮງໝໍພາກສະໜາມຫຼາຍຂຶ້ນ ແລະ ມີຄວາມຈໍາເປັນຕ້ອງເອົາພະນັກງານແພດໝໍເຂົ້າປະຈໍາຫຼາຍຂຶ້ນ ຂະນະດຽວກັນຢູ່ແຕ່ລະໂຮງໝໍຍັງຕ້ອງໄດ້ຮັບໃຊ້ປະຊາຊົນຢ່າງປົກກະຕິ.

ດັ່ງນັ້ນ, ການຮັບຄົນເຈັບທີ່ຕິດເຊື້ອພະຍາດໂຄວິດ19 ຈຶ່ງກໍານົດໃຫ້ຮັບພຽງແຕ່ 3ໂຮງໝໍ ຄື: ໂຮງໝໍມິດຕະພາບ, ໂຮງໝໍ 103 ກອງທັບ ແລະໂຮງໝໍເຊດຖາທິຣາດ ເຊິ່ງທັງ 3 ໂຮງໝໍສາມາດຮັບໄດ້ 180 ຄົນ ເຊິ່ງເປົ້າໝາຍແມ່ນຄົນເຈັບທີ່ມີອາການປານກາງຫາອາການໜັກ ເຊິ່ງໄດ້ນໍາໃຊ້ແພດໝໍຈໍານວນຫຼາຍເພື່ອເບິ່ງແຍງປິ່ນປົວ, ດັ່ງນັ້ນຄົນເຈັບທີ່ມີອາການເບົາບາງຈະຖືກສົ່ງໄປປິ່ນປົວຢູ່ພາກສະໜາມ.

ຮຽກຮ້ອງເຖິງຄົນເຈັບຢູ່ໂຮງໝໍພາກສະໜາມຈົ່ງໃຫ້ການຮ່ວມມືກັບແພດໝໍ, ພວກເຮົາຮັບຮູ້ວ່າພວກທ່ານອາດຈະບໍ່ໄດ້ຮັບຄວາມສະດວກສະບາຍຄືກັບຢູ່ເຮືອນທ່ານ ຂໍໃຫ້ພວກທ່ານຈົ່ງມີຄວາມອົດທົນຜ່ານຜ່າວິກິດໄປພ້ອມກັບແພດໝໍ ເຊິ່ງຄົນເຈັບທີ່ບໍ່ມີອາການຫຍັງຈະໄດ້ຢູ່ໂຮງໝໍພຽງແຕ່ 14 ມື້ ກໍຈະໄດ້ອອກໄປຢູ່ກັບຄອບຄົວ ແຕ່ແພດໝໍທີ່ໄປຮັບໃຊ້ທ່ານຕ້ອງໄດ້ຫ່າງຈາກຄອບຄົວ, ຫ່າງຈາກຄົນທີ່ເພິ່ນຮັກ ເພື່ອມາຮັບໃຊ້ທ່ານ 14 ມື້ , ຫຼັງຈາກນັ້ນຕ້ອງໄດ້ກັກຕົວອີກ 14 ມື້ ແຕ່ຖ້າເຂົາເຈົ້າຕິດເຊື້ອ ໃນເວລາປະຕິບັດໜ້າທີ່ ກໍຕ້ອງໄດ້ໄປປິ່ນປົວອີກ ເຊິ່ງສິ່ງນີ້ແພດໝໍທຸກຄົນແມ່ນບໍ່ປາຖະໜາ, ແຕ່ຍ້ອນໜ້າທີ່ ແລະ ຄວາມຮັບຜິດຊອບຕ້ອງໄດ້ປະຕິບັດ.