ຫ້າມພົນລະເມືອງລາວ ເດີນທາງໄປຍັງເຂດທີ່ມີການລະບາດຂອງໄວຣັສສາຍພັນໃໝ່

431

ເນື່ອງຈາກສະພາບການຂອງໄວຣັສສາຍພັນໃໝ່ ໂຄໂຣນາ ທີ່ລະບາດຢູ່ ສປ ຈີນໃນເມືອງອູຮັ່ນ ແຂວງຫູເປີ່ຍ ໃນຂະນະນີ້ຮຸນແຮງນັບມື້.​ສະນັ້ນ, ຫຼາຍພາກສ່ວນມີຄວາມເປັນຫ່ວງຕໍ່ສຸຂະພາບພໍສົມຄວນ, ຫຼ້າສຸດກະຊວງການຕ່າງປະເທດທີ່ປຽບດັ່ງເຮືອນຫຼັງທີສອງຂອງພົນລະເມືອງລາວຢູ່ຕ່າງປະເທດໄດ້ອອກຖະແຫຼງຂ່າວ ແຈ້ງໃຫ້ປະຊາຊົນລາວຫຼີກລຽງການເດີນທາງໄປຍັງເຂດທີ່ມີໄວຣັສລະບາດຢູ່.

ທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ໄດ້ຖະແຫຼງຕໍ່ສື່ມວນຊົນໃນວັນທີ 28 ມັງກອນ 2020 ທີ່ກະຊວງການຕ່າງປະເທດ ນະຄອນຫຼວງວຽງຈັນ ກ່ຽວກັບບັນຫາການລະບາດພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ວ່າ: ກະຊວງການຕ່າງປະເທດແຫ່ງ ສປປ ລາວ ແລະ ບັນດາສໍານັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ຕ່າງປະເທດ ໄດ້ຕິດຕາມສະພາບການລະບາດພະຍາດອັກເສບປອດ ຈາກເຊື້ອຈຸລະໂຣກສາຍພັນໃໝ່ຢູ່ຕ່າງປະເທດ ຢ່າງໃກ້ຊິດ ແລະ ໄດ້ປະສານງານ ກັບບັນດາພາກສ່ວນກ່ຽວຂ້ອງຂອງປະເທດທີ່ມີການລະບາດພະຍາດດັ່ງກ່າວ ເພື່ອອໍານວຍຄວາມສະດວກ ແລະ ຊ່ວຍເຫຼືອພົນລະເມືອງລາວ, ນັກທ່ອງທ່ຽວ, ນັກທຸລະກິດ ແລະ ນັກສຶກສາລາວ ທີ່ກໍາລັງດໍາລົງຊີວິດ ແລະ ສຶກສາຮໍ່າຮຽນຢູ່ບັນດາປະເທດທີ່ມີ ການລະບາດພະຍາດດັ່ງກ່າວ, ພ້ອມທັງໄດ້ລາຍງານສະພາບການດັ່ງກ່າວຢ່າງເປັນປະຈໍາ.

ທ່ານ ກ່າວຕື່ມວ່າ: ພວກເຮົາໄດ້ເປັນເຈົ້າການໃນການປະສານງານ ແລະ ແລກປ່ຽນຂໍ້ມູນຂ່າວສານກັບບັນດາປະເທດຕ່າງໆໃນພາກພື້ນ ກໍຄື ສາກົນ ແລະ ອົງການອະນາໂມໂລກຢ່າງໃກ້ຊິດ ເພື່ອຕິດຕາມທ່າອ່ຽງ ຂອງການລະບາດພະຍາດດັ່ງກ່າວ ແລະ ຍາດແຍ່ງການຊ່ວຍເຫຼືອ, ໂດຍສະເພາະການສົ່ງຄະນະຜູ້ຊ່ຽວຊານດ້ານການແພດ ພ້ອມດ້ວຍອຸປະກອນເຄື່ອງມື, ຢາ, ແລະ ວັກຊິນປ້ອງກັນ ໃນກໍລະນີທີ່ມີການລະບາດໃຫຍ່.

ในภาพอาจจะมี หน้าจอ
ພ້ອມກັນນີ້, ຂໍໃຫ້ພົນລະເມືອງລາວຢູ່ຕ່າງປະເທດ ຕິດຕາມສະພາບ ການລະບາດພະຍາດດັ່ງກ່າວຢ່າງເປັນປົກກະຕິ ຜ່ານແຫຼ່ງຂໍ້ມູນທາງການຂອງກະຊວງສາທາລະນະສຸກ, ກະຊວງການຕ່າງປະເທດ ແຫ່ງ ສປປ ລາວ ແລະ ອົງການອະນາໄມໂລກ, ທີ່ສໍາຄັນຂໍໃຫ້ພົນລະເມືອງລາວ ຫຼີກລ່ຽງການເດີນທາງໄປຍັງບັນດາເຂດທີ່ມີການລະບາດພະຍາດດັ່ງກ່າວຢູ່ຕ່າງປະເທດ. ຖ້າພົນລະເມືອງລາວຢູ່ຕ່າງປະເທດ ຕ້ອງການຄວາມຊ່ວຍເຫຼືອ, ກະລຸນາຕິດຕໍ່ບັນດາສໍານັກງານຜູ້ຕາງໜ້າ ແຫ່ງ ສປປ ລາວ ປະຈໍາຢູ່ຕ່າງປະເທດ ຫຼື ກະຊວງການຕ່າງປະເທດ.

ທີ່ມາ: ເສດຖະກິດ-ການຄ້າ