ໄຟໄໝ້ລົດຕູ້ຢູ່ແຄມຂອງ ສັນນິຖານສາເຫດເບື້ອງຕົ້ນ ມາຈາກສາຍໄຟຊ໋ອດ

425

ພະແນກປ້ອງກັນສະກັດກັ້ນ ແລະ ຕ້ານອັກຄີໄພ ປກສ ນະຄອນຫລວງ ແຈ້ງໃຫ້ຮູ້ວ່າ: ໄດ້ເກີດໄຟໄໝ້ ລົດຕູ້ ສະຕາແລັກ ສີປອນ ປ້າຍທະບຽນ ຂຕ 0207 ນະຄອນຫລວງວຽງຈັນ ຢູ່ ເສັ້ນທາງເຈົ້າຟ້າງຸ່ມແຄມຂອງ ກົງກັນຂ້າມກັບໂຮງແຮມ ລ້ານຊ້າງ ແລະ ເດີ່ນຈອດລົດໃຫຍ່ຂອງສວນເຈົ້າ ອານຸວົງ ມື້ຕອນແລງຂອງມື້ວານນີ້ ວັນທີ 6 ມັງກອນ 2020 ເວລາປະມານ 19:00 ໂມງ.

ທ່ານ ຮ້ອຍເອກ ຂັນເພັດ ປາງຄຳນ້ອຍ ພະນັກງານ ສືບສວນ-ສອບສວນ ພະແນກ ປ້ອງກັນສະກັດກັ້ນ ແລະ ຕ້ານອັກຄີໄພ ປກສ ນະຄອນຫລວງ ໄດ້ກ່າວຕໍ່ທີມງານວຽງຈັນທາຍມື້ເຊົ້ານີ້ ກ່ຽວກັບເຫດການໄຟໄໝ້ລົດວ່າ: ລົດຄັນດັ່ງກ່າວແມ່ນລົດຂອງສູນພາສາ ອາດາ, ຄົນຂັບແມ່ນຄົນຕ່າງປະເທດ ສັນຊາດ ອາເມລິກາ ພ້ອມດ້ວຍຄອບຄົວ ຄື ເມຍ ແລະ ລູກ ລວມທັງໝົດ 5 ຄົນ, ລົດຕູ້ຄັນນັ້ນໄດ້ແລ່ນມາແຕ່ທ່າພະລານໄຊ ເພື່ອຈະກັບເຮືອນຂອງພວກກ່ຽວ ຢູ່ ບ້ານສີໄຄທ່າ ເມືອງສີໂຄດຕະບອງ.

ການໄໝ້ຂອງລົດ ແມ່ນໄດ້ເລີ່ມໄໝ້ມາຕັ້ງແຕ່ຂ້າງໂຮງໝໍ ມະໂຫສົດ ເຊິ່ງຫ່າງຈາກສຸດເກີດເຫດເກືອບ 1 ກິໂລແມັດ ແຕ່ຜູ້ຂັບຂີ່ບໍ່ຮູ້ສຶກໂຕ ທັງທີ່ມີຄົນທ້ວງແລ້ວວ່າມີໄຟໄໝ້ລົດຂອງລາວ, ສາເຫດທີ່ບໍ່ຮູ້ສຶກໂຕແມ່ນຜູ້ກ່ຽວບໍ່ເຂົ້າໃຈພາສາລາວ. ຈົນຮອດໜ້າໂຮງແຮມລ້ານຊ້າງ ມີຄົນທ້ວງອີກເທຶື່ອໜຶ່ງຈຶ່ງເຮັດໃຫ້ເກີດຄວາມສົ່ງໃສ ແລ້ວລາວຈຶ່ງຈອດລົດ ແລະ ກໍ່ໄດ້ຮູ້ວ່າໄຟໄດ້ໄໝ້ລົດ ແລະ ກຳລັງເລີ່ມໄໝ້ລຸກແຮງຈາກຫ້ອງເຄື່ອງຈັກຈົນບໍ່ສາມາດສະກັດກັ້ນໄດ້ແລ້ວ ແລະ ໄດ້ລາມໄປທົ່ວຄັນ ໂຊກດີທີ່ບໍ່ມີຜູ້ໄດ້ຮັບບາດເຈັບ.

ທ່ານ ຮ້ອຍເອກ ຂັນເພັດ ໄດ້ກ່າວຕື່ມວ່າ: ຕາມການສັນນິຖານໃນເບື້ອງຕົ້ນ, ສາເຫດທີ່ເກີດໄຟໄໝ້ດັ່ງກ່າວແມ່ນເກີດຈາກສາຍໄຟຊອດ ຫຼື ສາຍໄຟໝັດກັນ ເພາະວ່າ ກ່ອນໜ້ານີ້ ເຈົ້າຂອງລົດໄດ້ໄປຖ່າຍນໍ້າມັນເບກ ແລະ ເຊັກສາຍໄຟລົດຈຳນວນໜຶ່ງຢູ່ຫ້ອງຜູ້ໂດຍສານ, ສວນສາເຫດລະອຽດ ແມ່ນກຳລັງຢູ່ໃນຂັ້ນຕອນການສືບສວນ.