ຍທຂແຈ້ງດ່ວນ!!! ເດັດຂາດຫ້າມຫຼົງເຊື່ອຈ້າງແລ່ນໃບຂັບຂີ່ສາກົນ

545

ກະຊວງ ໂຍທາທິການ ແລະ ຂົນສົ່ງ ຈຶ່ງໄດ້ອອກແຈ້ງການ ສະບັບເລກທີ 27655/ຍທຂ.ຫກ ລົງວັນທີ 29 ຕຸລາ 2019 ເຖິງບັນດາກະຊວງ, ອົງການທຽບເທົ່າ, ບັນດາ ແຂວງ, ນະຄອນ, ພະນັກງານ, ທະຫານ, ຕໍາຫຼວດ ແລະ ປະຊາຊົນລາວບັນດາເຜົ່າໝົດທຸກຄົນຊາບ ເລື່ອງ: ກ່ຽວກັບ ກຸ່ມຄົນບໍ່ດີ ທີ່ແອບອ້າງເປັນເຈົ້າໜ້າທີ່ ແລະ ເປັນສະມາຄົມທີ່ບໍລິການເຮັດໃບຂັບຂີ່ສາກົນ.

ໂດຍອີງຕາມ ສື່ອອນລາຍ ທີ່ລົງໂຄສະນາໃນ Facebook ແລະ ສື່ອອນໄລຕ່າງໆ ເຊິ່ງມີເນື້ອໃນແອບອ້າງວ່າ ມີສະມາຄົມເຊິ່ງສາມາດເຮັດໃບຂັບຂີ່ສາກົນຂອງ ສປປ ລາວ ໄດ້ ແລະ ອີງຕາມການລາຍງານຂອງ ກົມຂົນສົ່ງ ສະບັບເລກທີ 27736/ຍທຂ.ຂສ, ລົງວັນທີ 25 ຕຸລາ 2019.

ໃນແຈ້ງການລະບຸວ່າ: ການແອບອ້າງຂອງກຸ່ມຄົນທີ່ບໍ່ຫວັງດີ ລົງໂຄສະນາຜ່ານສື່ອອນລາຍ ຫຼາຍຮູບແບບວ່າ ສາມາດເຮັດໃບຂັບຂີ່ສາກົນ ຂອງສະມາຄົມລົດໂອໂຕ ສາກົນ (IAA) ໄດ້ ເຊິ່ງມີອາຍຸການນໍາໃຊ້ໄດ້ເຖິງ 5 ປີ ແລະ ສາມາດຂັບລົດໄປໄດ້ 196 ປະເທດ ໃນທົ່ວໂລກໄດ້ນັ້ນ ແມ່ນບໍ່ມີມູນຄວາມຈິງ. ເປັນການຕົວະຍົວະຫຼອກລວງ ເພື່ອຫວັງຜົນປະໂຫຍດ ແລະ ຫວັງທໍາລາຍມ້າງເພຄວາມສະຫງົບສຸກຂອງຊາດ. ການອອກໃບຂັບຂີ່ສາກົນ ໃຫ້ບຸກຄົນໃດໜຶ່ງໄດ້ນັ້ນ ຕ້ອງແມ່ນອົງການທີ່ມີສິດອໍານາດເທົ່ານັ້ນ.

ສໍາລັບ ສປປ ລາວ ແມ່ນກົມຂົນສົ່ງ ກະຊວງ ໂຍທາທິການ ແລະ ຂົນສົ່ງ ທີ່ເປັນຜູ້ເຊັນຮັບຮອງ ແລະ ອະນຸຍາດໃຫ້ສະເພາະບຸກຄົນທີ່ມີໃບຂັບຂີ່ ຂອງ ສປປ ລາວ ທີ່ຖືກຕ້ອງຕາມກົດໝາຍ, ເຊິ່ງ ສປປ ລາວ ໄດ້ລົງນາມ ແລະ ເປັນພາຄີ ສົນທິສັນຍາສາກົນວ່າດ້ວຍ ການຈະລາຈອນທາງບົກ ຂອງອົງການສະຫະປະຊາຊາດ ເມື່ອປີ 1949 ທີ່ ເຊີແນວ ປະເທດ ສະວິດ. ດັ່ງນັ້ນ, ຈຶ່ງຂໍຖືເປັນກຽດແຈ້ງມາຍັງ ບັນດາທ່ານ, ພະນັກງານ, ທະຫານ, ຕໍາຫຼວດ ແລະ ປະຊາຊົນລາວໝົດທຸກຄົນຊາບ ແລະ ໃຫ້ທຸກຄົນມີສະຕິລະວັງຕົວ.