ພົບເຊື້ອພະຍາດ H5N6 ນໍາເປັດ ຫາກຕິດໃສ່ຄົນໂອກາດເສຍຊີວິດເຖິງ 60%

870

ແຂວງອຸດົມໄຊ ພົບເຊື້ອພະຍາດ H5N6 ໃນເປັດ ຫາກຕິດໃສ່ຄົນໂອກາດເສຍຊີວິດເຖິງ 60%, ໂດຍພົບຈາກຕົວຢ່າງສັດປີກທີ່ນໍາໄປກວດຈາກຕະຫຼາດບ້ານຖິ່ນ ເມືອງໄຊ ແຂວງອຸດົມໄຊ

ອີງຕາມບົດລາຍງານຂອງພະແນກກະສິກໍາ ແລະ ປ່າໄມ້ ແຂວງອຸດົມໄຊ, ສະບັບເລກທີ 415/ຂລປ.019 ລົງວັນທີ 3 ຕຸລາ 2019 ເລື່ອງສູນວິໄຈພະຍາດສັດກວດພົບເຊື້ອພະຍາດ H5N6 ຈາກສັດປີກຢູ່ຕະຫຼາດບ້ານຖິ່ນ, ເມືອງໄຊ ວ່າ: ຈາກໃນເນື້ອໃນບົດລາຍງານຂອງກອງປະຊຸມໄຂ້ຫວັດ ຄັ້ງວັນທີ 25-26 ກັນຍາ 2019 ທີ່ແຂວງຈໍາປາສັກ ມີການຢືນຢັນວ່າພົບເຊື້ອພະຍາດ H5N6 ໃນເປັດ ຢູ່ຕະຫຼາດບ້ານຖິ່ນ, ເມືອງໄຊ ເຊິ່ງເປັນເຊື້ອພະຍາດທີ່ສາມາດຕິດແປດໃສ່ຄົນ ແລະ ພາໃຫ້ເສຍຊີວິດໄດ້ເຖິງ 60%. ສ່ວນສັດປີກ ແມ່ນບໍ່ສະແດງອາການຫຍັງ.

ພາບປະກອບ

ສະນັ້ນ, ຂະແໜງລ້ຽງສັດ ແລະ ການປະມົງ ຈຶ່ງໄດ້ແຕ່ງຕັ້ງວິຊາການເກັບກໍາຂໍ້ມູນຄືນໃໝ່ດັ່ງລາຍລະອຍດລຸ່ມນີ້: ໃນວັນທີ 8 ສິງຫາ 2019 ທີມງານຂອງກົມລ້ຽງສັດ ແລະ ການປະມົງ ສົມທົບກັບວິຊາການກ່ຽວຂ້ອງຂອງເມືອງໄຊ ລົງເກັບຕົວຢ່າງສັດປີກ (ເປັດ, ໄກ່) ຈໍານວນ 61 ຕົວຢ່າງ ຢູ່ຕະຫຼາດບ້ານຖິ່ນເມືອງໄຊ ເພື່ອສົ່ງເຂົ້າຫ້ອງວິໄຈພະຍາດສັດຂອງກົມລ້ຽງສັດ ແລະ ການປະມົງ ເຊິ່ງຜົນຂອງການວິໄຈພົບເຊື້ອພະຍາດດັ່ງກ່າວຢູ່ນໍາຕົວຢ່າງເປັດ. ການເກັບຕົວຢ່າງໃນຄັ້ງນີ້ແມ່ນນໍາມາຈາກຜູ້ປະກອບການທີ່ນໍາເອົາສັດປີກມາຈາກປະເທດເພື່ອນບ້ານ ທີ່ນໍາເຂົ້າມາຜ່ານດ່ານສາກົນແຂວງບໍ່ແກ້ວ ມາສົ່ງຕໍ່ໃຫ້ແມ່ຄ້າຢູ່ຕະຫຼາດບ້ານຖິ່ນ ທີ່ນໍາເຂົ້າມາຄັ້ງລະ 300-400 ໂຕ.

ພາບປະກອບ