ສະພາບນໍ້າຖ້ວມຢູ່ເມືອງສອງຄອນ ກະທົບ 12 ກຸ່ມບ້ານ

317

ສະພາບນໍາ້ຖ້ວມຢູ່ 36 ບ້ານ ຢູ່ 7ກຸ່ມບ້ານໃນ12 ກຸ່ມບ້ານຢູ່ເມືອງສອງຄອນ ລຽບຕາມເຊບັງຫຽງ ເຖິງວ່່າລະດັບນໍ້າໃນວັນທີ10 ກັນຍາ2019ຫລຸດລົງແລ້ວປະມານ10 ຊັງຕີແມັດ, ແຕ່ປະຊາຊົນຍັງມີຄວາມກັງວົນແລະສືບຕໍ່ຂົນເຄື່ອງຂອງ, ສັດລ້ຽງ ຂຶ້ນຢູ່ບ່ອນປອດໄພໃນເຂດທີ່ອໍານາດການປົກຄອງເມືອງກໍານົດໄວ້ ແລະເຮືອນພີ່ນ້ອງທີ່ຢູ່ເຂດໃກ້ຄຽງທີ່ເປັນບ່ອນສູງ.

ທ່ານ ພຸດທະວົງ ພົມມະຈັກ ຮອງເຈົ້າເມືອງສອງຄອນ, ປະທານຄະນະກໍາມະການຄຸ້ມຄອງໄພພິບັດຂັ້ນເມືອງໄດ້ໃຫ້ສໍາພາດວ່າ: ສະພາບນໍ້າຖ້ວມຢູ່ເມືອງສອງຄອນເກີດຂຶ້ນຕັ້ງແຕ່ທ້າຍເດືອນສິງຫາຜ່ານມາ, ແຕ່ຮ້າຍແຮງຂຶ້ນແມ່ນນັບແຕ່ວັນທີ1 ກັນຍາ, ເລີ່ມມີການຍົກຍ້າຍປະຊາຊົນນັບແຕ່ວັນທີ3 ກັນຍາເປັນຕົ້ນມາ. ນໍ້າໄດ້ຖ້ວມເອົາ36 ບ້ານໃນ12 ກຸ່ມບ້ານ, ມີ3.300 ກວ່າຄອບຄົວ, ມີຈໍານວນ11.100 ກວ່າຄົນ ໄດ້ຮັບຜົນກະທົບ, ໃນນັ້ນມີ9ບ້ານຖືກຕັດກະແສໄຟຟ້າ, ເສັ້ນທາງເຂົ້າຫາຖືກນໍ້າຖ້ວມສູງໄປບໍ່ໄດ້ແລະໄດ້ຍົກຍ້າຍຂຶ້ນບ່ອນຢູ່ທີ່ປອດໄພ11 ບ້ານ ມີຈຳນວນຄົນທີ່ຖືກຍົກຍ້າຍ1.600 ຄົນ ເຊິ່ງຮ້າຍແຮງເປັນປະຫວັດສາດໃນຮອບ 41 ປີ. ເນື້ອທີ່ນາປີຖືກນໍ້າຖ້ວມເສຍຫາຍເກືອບ7.000 ເຮັກຕາ ໃນເນື້ອທີ່ນາທັງໝົດເກືອບ16.000 ເຮັກຕາ.

ທ່ານຮອງເຈົ້າເມືອງສອງຄອນຍັງໃຫ້ຮູ້ວ່າ: ເມືອງສອງຄອນປະກອບມີ17 ກຸ່ມບ້ານ, ຖືກນໍ້າຖ້ວມ12 ກຸ່ມບ້ານຄື ກຸ່ມບ້ານລະຫານໍ້າ, ກຸ່ມບ້ານສອງຄອນ, ກຸ່ມບ້ານຊະແຍກ, ກຸ່ມບ້ານເຊບັງນວນ, ກຸ່ມບ້ານເຊບັງຫຽງ, ກຸ່ມບ້ານເປືອຍຂາວແລະກຸ່ມບ້ານແກ້ງໂດນ ເຊິ່ງການຊ່ວຍເຫລືອຍົກຍ້າຍແລະຂົນເຄື່ອງຂອງພີ່ນ້ອງປະຊາຊົນທີ່ຖືກນໍ້າຖ້ວມແມ່ນໄດ້ປະຕິບັດດ້ວຍຄວາມເຄັ່ງຮ້ອນເຊິ່ງມີກໍາລັງປກຊ-ປກສ ເປັນກໍາລັງຫລັກ, ສ່ວນການຊ່ວຍເຫລືອດ້ານທີ່ຢູ່ອາໄສ ກໍ່ຄືເຄື່ອງອຸປະໂພກ-ບໍລິໂພກ ທາງເມືອງໄດ້ກໍານົດບ່ອນພັກຊົ່ວຄາວຢູ່ 11 ຈຸດ.

ທ່ານພັທ ຄຳສາ ຮຽມຈຳປາຄຳ ຫົວໜ້າການທະຫານ ກອງບັນຊາການທະຫານເມືອງສອງຄອນ ໄດ້ໃຫ້ສໍາພາດວ່າ: ໄດ້ມານໍາພາກໍາລັງຊ່ວຍເຫລືອປະຊາຊົນທີ່ຖືກນໍ້າຖ້ວມຕັ້ງແຕ່ວັນທີ1 ກັນຍາເຊິ່ງມາຮອດປັດຈຸບັນການຍົກຍ້າຍແມ່ນໄດ້ເລີ່ມໜ້ອຍລົງ, ລະດັບນໍ້າຫລຸດລົງເລັກນ້ອຍ, ການປະຕິໜ້າທີ່ຈະດໍາເນີນໄປຈົນກວ່າການດໍາລົງຊີວິດຂອງປະຊາຊົນຈະກັບເຂົ້າສູ່ຄວາມປົກກະຕິ, ຄວາມຫຍຸ້ງຍາກໃນການປະຕິບັດໜ້າທີ່ແມ່ນພາຫະນະຮັບໃຊ້ຄືເຮືອຖືວ່າບໍ່ພຽງພໍເມື່ອສົມທຽບຄວາມຕ້ອງການຕົວຈິງ ເຊິ່ງການປະຕິບັດວຽກທີ່ນີ້ມີເຮືອລວມແລ້ວບໍເຖິງ10 ລໍາ. ສ່ວນກໍາລັງອ້າຍນ້ອງທະຫານແມ່ນສົມທົບກັນມີກອງພັນທະຫານຮາບທີ5, ກໍາລັງຈາກແຂວງສະຫວັນນະເຂດແລະສ່ວນໜຶ່ງມາຈາກສູນກາງລວມແລ້ວປະມານ100 ກວ່າສະຫາຍ.

ມາຮອດປັດຈຸບັນສະພາບນໍ້າຖ້ວມຖືວ່າໄດ້ເລີ່ມຫລຸດລົງເລັກນ້ອຍ, ແຕ່ສະພາບໂດຍລວມຖືວ່າຍັງໜ້າເປັນຫ່ວງເພາະເຮືອນຊານ-ທົ່ງນາຍັງຢູ່ໃນນໍ້າທີ່ຖ້ວມເລິກຫລາຍແມັດ. ຖ້າວ່າບໍ່ມີຝົນຕົກລົງມາຫລືບໍ່ມີນໍ້າໄຫລຈາກແມ່ນໍ້າສາຂາໄຫລມາສົມທົບນໍ້າເຊບັງຫຽງໃນອາທິດນີ້, ນໍ້າອາດຈະຫລຸດລົງຫລາຍເພາະສັງເກດເຫັນວ່ານໍ້າເຊບັງຫຽງໄຫລດີໄຫລໄວສົມຄວນ. ສ່ວນຢູ່ບ້ານກົກພອກເຊິ່ງຢູ່ໃນກຸ່ມບ້ານກົກຂາມລຽນເຊິ່ງເປັນບ່ອນທີ່ອ່າວສູງແດ່ ແລະມີປະຊາຊົນເຂດໃກ້ຄຽງ ຄືກົກຂາມລຽນ ທີ່ຖືກນໍ້າຖ້ວມໝົດບ້ານເຂົ້າໄປຢູ່ຈໍານວນໜຶ່ງນັ້ນ ລະດັບນໍ້າໄດ້ຫລຸດລົງຫລາຍ, ມີເຮືອນສອງສາມຫລັງທີ່ນໍ້າບົກລົງສາມາດອະນາໄມພື້ນເຮືອນໄດ້ແລ້ວ.