ປາກເຊ-ປາກຊ່ອງນໍ້າຖ້ວມ

410

ປັດຈຸບັນຫຼາຍແຂວງໃນທົ່ວປະເທດພວມປະເຊີນກັບໄພນໍ້າຖ້ວມ ເນື່ອງຈາກມີຝົນຕົກໜັກຕິດຕໍ່ກັນເປັນເວລາຫຼາຍວັນ ເຊິ່ງໃນຕົ້ນເດືອນສິງຫາຜ່ານມາແມ່ນຖ້ວມຢູ່ເຂດພາກເໜືອ ແຕ່ປັດຈຸບັນພາກໃຕ້ກໍພວມປະເຊີນກັບໄພພິບັດດັ່ງກ່າວເຊັ່ນກັນ. ຫຼ້າສຸດ, ມື້ນີ້ວັນທີ 3 ກັນຍາ 2019 ຫຼາຍເຂດໃນແຂວງຈໍາປາສັກ ຖືກນໍ້າຖ້ວມແລ້ວ ບາງເຂດຕ້ອງໃຊ້ເຮືອແທນລົດໃນການສັນຈອນ.

ຂໍ້ມູນຈາກປະຊາຊົນຢູ່ບ້ານບັງລຽງ ເມືອງປາກຊ່ອງ ແຂວງຈໍາປາສັກ ໃຫ້ຮູ້ວ່າ: ໃນເວລາປະມານ 1:00 ໂມງເຊົ້າ ຂອງວັນທີ 3 ກັນຍາ 2019 ນໍ້າໄດ້ເລີ່ມຖ້ວມເຂດບ້ານບັງລຽງ ເມືອງປາກຊ່ອງ ແຂວງຈໍາປາສັກ, ຕົ້ນຕໍຂອງເຫດນໍ້າຖ້ວມໃນຄັ້ງນີ້ແມ່ນມາຈາກຫ້ວຍໜອງຂີງຄໍາ ທີ່ມີລະດັບນໍ້າສູງຂຶ້ນຫຼາຍ ເນື່ອງຈາກຝົນຕົກຕໍ່ເນື່ອງກັນຫຼາຍວັນ ແຕ່ຍັງດີທີ່ຖ້ວມສະເພາະບ້ານເຮືອນຂອງປະຊາຊົນທີ່ຢູ່ເຂດຕໍ່າເທົ່ານັ້ນ, ສ່ວນລະດັບນໍ້າຖ້ວມສູງພຽງກົກຂາ, ປະຊາຊົນສາມາດຂົນເຄື່ອງຂອງອອກຈາກເຮືອນໄດ້ ຈຶ່ງບໍ່ມີຫຍັງເສຍຫາຍຫຼາຍ. ເຖິງຢ່າງໃດກໍຕາມ, ປັດຈຸບັນເຂດດັ່ງກ່າວຝົນຍັງສືບຕໍ່ຕົກໜັກ ເຊິ່ງຄາດວ່າຖ້າຝົນຍັງບໍ່ຢຸດລະດັບທີ່ຖ້ວມເຂດດັ່ງກ່າວຈະສູງຂຶ້ນອີກ.

ເຊັ່ນດຽວກັນກັບບ້ານໂພນສີໄຄ ເມືອງປາກເຊ ແຂວງຈໍາປາສັກ ຈາກການໃຫ້ຂໍ້ມູນຂອງປະຊາຊົນໃນເຂດດັ່ງກ່າວ ບອກວ່າ: ນໍ້າເຊໄດ້ໄຫຼຖ້ວມບ້ານເຮືອນຂອງປະຊາຊົນ ມາແຕ່ວັນທີ 2 ກັນຍາ 2019, ການສັນຈອນໃນເຂດດັ່ງກ່າວບໍ່ສາມາດນໍາໃຊ້ລົດໄດ້ ຕ້ອງນໍາໃຊ້ເຮືອແທນ.

ກ່ອນໜ້ານີ້, ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ໄດ້ອອກແຈ້ງການ ກ່ຽວກັບການເຝົ້າລະວັງ, ການປ້ອງກັນ ແລະ ຊ່ວຍເຫຼືອໄພນໍ້າຖ້ວມທົ່ວແຂວງຈໍາສັກ ສະບັບເລກທີ 015/ຈຂ.ຈສ ລົງວັນທີ 2 ກັນຍາ 2019 ໂດຍມີເນື້ອໃນວ່າ: ປະທານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງຂໍຖືເປັນກຽດແຈ້ງມາຍັງທ່ານເພື່ອຮັບຊາບພາຍຸ ດີເປຼຊັນ ທີ່ເພີ່ມກຳລັງແຮງຂຶ້ນເປັນພະຍຸໜູນເຂດຮ້ອນ ແລະ ຈະພັດຜ່ານບັນດາແຂວງພາກກາງ ແລະ ພາກໃຕ້ ໃນຕອນເຊົ້າຂອງວັນທີ 3 ກັນຍາ 2019 ຕາມການແຈ້ງເຕືອນຂອງກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ສະບັບເລກທີ 1227/ກອຕທ ລົງວັນທີ 2/9/2019 ສົມທົບກັບລະດັບນ້ຳຂອງ (ປາກເຊ) ປັດຈຸບັນ 11,42 ແມັດ (ເວລາ 16:00 ໂມງ ວັນທີ 2/9/2019) ເຂດລະວັງໄພ 11 ແມັດ ແລະ ເຂດອັນຕະລາຍ 12 ແມັດ ເຊິ່ງມີທ່າອ່ຽງຈະເພີ່ມຂຶ້ນອີກ. ສະນັ້ນ, ເພື່ອເປັນການຕອບໂຕ້ສະພາບດັ່ງກ່າວ ຈຶ່ງແຈ້ງເຕືອນມາຍັງອຳນາດການປົກຄອງທຸກພາກສ່ວນ ແລະ ພໍ່ແມ່ປະຊາຊົນຊາວແຂວງຈຳປາສັກ ໂດຍສະເພາະຄະນະກຳມະການ ແລະ ກອງເລຂາຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນຕ່າງໆ ຕ້ອງເປັນເຈົ້າການຕິດຕາມສະພາບໄພພິບັດ (ນ້ຳຖ້ວມ) ທີ່ອາດຈະເກີດຂຶ້ນ ເພື່ອແຈ້ງໄປຍັງພໍ່ແມ່ປະຊາຊົນກະກຽມຮັບມືຢ່າງທັນການ. ພ້ອມກັນນັ້ນ, ກໍໃຫ້ກວດກາສະພາບໄພພິບັດ (ຜູ້ປະສົບໄພ ແລະ ຜົນເສຍຫາຍ) ທີ່ເກີດຂຶ້ນລາຍງານຕໍ່ກອງເລຂາຂັ້ນແຂວງ ເພື່ອສັງລວມລາຍງານຂັ້ນເທິງພິຈາລະນາຊ່ວຍເຫຼືອໄດ້ຢ່າງທັນການ. ດັ່ງນັ້ນ, ຈຶ່ງແຈ້ງມາຍັງບັນດາທ່ານເພື່ອຊາບ ແລະ ຈັດຕັ້ງປະຕິບັດຕາມເນື້ອໃນແຈ້ງສະບັບນີ້ດ້ວຍ.