ອຸບັດຕິເຫດລົດເມນັກທ່ອງທ່ຽວ ຕົກເຫວເສັ້ນທາງເມືອງນານ-ກາສີ

402

ໃນຕອນບ່າຍ ວັນທີ 19 ສິງຫາ 2019 ນີ້ ໄດ້ເກີດເຫດລົດເມຂົນສົ່ງນັກທ່ອງທ່ຽວທັງໝົດ 46 ຄົນ, ຍິງ 24 ຄົນ. ໃນນັ້ນ: ເປັນຄົນສັນຊາດຈີນຈໍານວນ 44 ຄົນ, ຍິງ 23 ຄົນ, ຄົນລາວ 2 ຄົນ, ຍິງ 1 ຄົນ ປີ້ນຢູ່ເຂດຂົວນ້ຳງາວ ເມືອງນານ ແຂວງ ຫຼວງພະບາງ ເຮັດໃຫ້ມີຜູ້ເສຍຊີວິດກັບທີ່ຈໍານວນ 13 ສົບ, ບາດເຈັບສາຫັດ 3 ຄົນ. ນອກນັ້ນ, ແມ່ນບາດເຈັບເລັກນ້ອຍ ປັດຈຸບັນ ໄດ້ນຳສົ່ງປີ່ນປົວຢູ່ໂຮງໝໍເມືອງນານ ແລະ ໂຮງໝໍແຂວງຫຼວງພະບາງ.

ພັນໂທ ບຸນສະຫວັດ ສົມພະໄຊ ຫົວໜ້າພະແນກຕໍາຫຼວດຈະລາຈອນ ກອງບັນຊາການປກສແຂວງຫຼວງພະບາງໃຫ້ສຳພາດວ່າ: ຈຳນວນນັກທ່ອງທ່ຽວທີ່ຢູ່ໃນລົດຄັນດັ່ງກ່າວ ແມ່ນໄດ້ຊື້-ຂາຍທົວຈາກປະເທດເພື່ອນບ້ານ ອອກຈາກນະຄອນຫຼວງວຽງຈັນ ຈະໄປປະເທດຈີນ ພໍມາຮອດຈຸດກັ່ງກ່າວໄດ້ເກີດອຸບັດຕິເຫດ. ພາຍຫຼັງທີ່ໄດ້ຮັບການແຈ້ງວ່າມີອຸບັດຕິເຫດ ອົງການປົກຄອງແຂວງຫຼວງພະບາງ ໄດ້ສົ່ງກຳລັງທະຫານ, ຕໍາຫຼວດ ແລະ ຊາວໜຸ່ມບ້ານໃກ້ກັບຈຸດເກີດເຫດ ເຂົ້າໃຫ້ການຊ່ວຍເຫຼືອເອົາຜູ້ບາດເຈັບ ແລະ ຜູ້ເສຍຊີວິດອອກຈາກລົດຄັນດັ່ງກ່າວ.

ເສັ້ນທາງທີ່ລົດຂົນສົ່ງນັກທ່ອງທ່ຽວດັ່ງກ່າວຜ່ານນັ້ນ ເປັນເສັ້ນທາງທີ່ໄດ້ຮັບການກໍ່ສ້າງໃໝ່ ນັບແຕ່ເປີດການນຳໃຊ້ເສັ້ນທາງດັ່ງກ່າວ ກົມໂຍທາທິການແລະຂົນສົ່ງ ກໍ່ຄືທຸກພາກສ່ວນທີ່ກ່ຽວຂ້ອງ ໄດ້ອອກແຈ້ງການຫ້າມບໍ່ໃຫ້ລົດຂົນສົ່ງໂດຍສານ ແລະ ລົດບັນທຸກໜັກ ຫຼື ລົດທີ່ສະພາບເຕັກນິກບໍ່ຮັບປະກັນ ຊົມໃຊ້ເສັ້ນທາງດັ່ງກ່າວ ເພາະມີຄວາມສ່ຽງທີ່ຈະເກີດອຸບັດຕິເຫດຫຼາຍຈຸດ.