ສຸດເສົ້າ!! 5 ມື້ ມີຜູ້ເສຍຊີວິດຈາກອຸບັດເຫດເກືອບ 40 ລາຍ

667

ພາຍຫຼັງ ທີ່ລິເລີ່ມສະເຫຼີມສະຫຼອງບຸນປີໃໝ່ລາວ ພສ 2562 ນັບແຕ່ວັນທີ 13-17 ເມສາ 2019 ທົ່ວປະເທດມີອຸບັດເຫດເກີດຂຶ້ນທັງໝົດ 303 ລາຍ, ມີຜູ້ເສຍຊີວິດ 37 ຄົນ ປີນີ ແຂວງ ວຽງຈັນ ເສຍຊີວິດຫຼາຍກວ່າໝູ່.

ໃນວັນທີ 18 ເມສາ 2019 ນີ້ທີ່ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ ໄດ້ມີພິທີຖະແຫຼງຂ່າວ ສະຫຼຸບອຸບັດເຫດທີ່ເກີດຂຶ້ນ ໃນໄລຍະສະຫຼອງບຸນປີໃໝ່ລາວ ພສ 2562 ໂດຍການຖະແຫຼ່ງຮ່ວມຂອງ ພັນໂທ ກົງສີ ສຸວັນນະຕຸ້ມ, ຫົວໜ້າກົມຕຳຫຼວດຈະລາຈອນ, ກົມໃຫຍ່ຕຳຫຼວດ, ກະຊວງປ້ອງກັນຄວາມສະຫງົບ ແລະ ພັນໂທ ເພັງສະຫວັນ ທຳມາບູນ, ຫົວໜ້າພະແນກຕຳຫຼວດຈະລາຈອນ ປກສ ນະຄອນຫຼວງວຽງຈັນ, ມີບັນດາສື່ມວນຊົນເຂົ້າຮ່ວມ.

ພັນໂທ ກົງສີ ສຸວັນນະຕຸ້ມ ໄດ້ກ່າວວ່າ: ໃນໄລຍະການສະເຫຼີມສະຫຼອງປີໃໝ່ລາວ ພສ 2562 ນັບແຕ່ວັນທີ 13-17 ເມສາ 2019 ທົ່ວປະເທດມີອຸບັດເຫດເກີດຂຶ້ນທັງໝົດ 303 ລາຍ, ເພີ່ມຂຶ້ນ 16 ລາຍ; ພາຫະນະເປ່ເພ 503 ຄັນ, ເພີ່ມຂຶ້ນ 13 ຄັນ, ຄົນໄດ້ຮັບບາດເຈັບ 532 ຄົນ, ເພີ່ມຂຶ້ນ 04 ຄົນ, ແລະ ຄົນເສຍຊີວິດ 37 ຄົນ, ຫຼຸດລົງ 2 ຄົນ ເມື່ອທຽບໃສ່ປີຜ່ານມາ.

ສຳລັບແຂວງທີ່ເກີດອຸບັດເຫດຫຼາຍກວ່າແມ່ນ ແຂວງ ຈຳປາສັກ ຈຳນວນ 45 ລາຍ, ຮອງລົງມາ ແຂວງ ສະຫວັນນະເຂດ ຈຳນວນ 35 ລາຍ ແລະ ນະຄອນຫຼວງວຽງຈັນ 31 ລາຍ. ສະເພາະແຂວງ ທີ່ມີຜູ້ເສຍຊີວິດຫຼາຍກວ່າໝູ່ແມ່ນ ແຂວງ ວຽງຈັນ ຈຳນວນ 09 ລາຍ ຕາມມາດ້ວຍນະຄອນຫຼວງວຽງຈັນ ຈຳນວນ 05 ຄົນ ແລະ ແຂວງ ສະຫວັນນະເຂດ, ສາລະວັນ, ຫົວພັນ ແຂວງລະ 03 ຄົນ.

ໃນນັ້ນ, ມີພາຫະນະທີ່ເກີດອຸບັດເຫດຫຼາຍແມ່ນ ລົດຈັກຕຳລົດຈັກ ຈຳນວນ 104 ລາຍ, ເສຍຊີວິດ 13 ຄົນ, ລົດຈັກຕຳລົດຍົນ ຈຳນວນ 71 ລາຍ, ເສຍຊີວິດ 07 ລາຍ ແລະ ລົດຈັກລົ້ມເອງ 19 ລາຍ, ເສຍຊີວິດ 04 ຄົນ.

ສຳລັບເສັ້ນທາງທີ່ພາເກີດອຸບັດເຫດ ມີເສັ້ນທາງຂອງແຂວງ, ເມືອງ ແລະ ເສັ້ນທາງອື່ນໆ 169 ລາຍ, ເສັ້ນທາງ 13 ເໜືອ ຈໍານວນ 78 ລາຍ ແລະ ເສັ້ນທາງ 13 ໃຕ້ ຈໍານວນ 56 ລາຍ. ນອກນັ້ນ, ຍັງມີຂົງເຂດທີ່ເກີດອຸບັດເຫດເຊັ່ນ: ເທດສະບານ 245 ລາຍ, ເສຍຊີວິດ 11 ຄົນ, ນອກເທດສະບານ 58 ລາຍ, ເສຍຊີວິດ 26 ຄົນ.

ສຳລັບສາເຫດທີ່ພາໃຫ້ເກີດອຸບັດເຫດແມ່ນ ບັນດານັກຂັບຂີ່ຂັບລົດໄວ ມີຈຳນວນ 133 ກໍລະນີ, ເສຍຊີວິດ 16 ຄົນ, ດື່ມສິ່ງມຶນເມົາ ມີຈຳນວນ 120 ກໍລະນີ, ເສຍຊີວິດ 13 ລາຍ, ປ່ຽນທິດທາງ 15 ກໍລະນີ, ເສຍຊີວິດ 05 ຄົນ, ບໍ່ໄດ້ກວດກາສະພາບເຕັກນິກ ຈຳນວນ 15 ກໍລະນີ, ເສຍຊີວິດ 03 ຄົນ, ຊິງບໍ່ຮັບປະກັນ 10 ກໍລະນີ ແລະ ບໍ່ປ່ອຍສິດ 10 ກໍລະນີ.

ນອກຈາກນັ້ນ, ຍັງມີອຸບັດເຫດ ທີ່ພົວພັນກັບຄົນຕ່າງປະເທດມີ 03 ລາຍ, ຈຳນວນ 05 ຄົນ. ໃນນັ້ນ, ມີ ສັນຊາດຫວຽດນາມ ຈຳນວນ 02 ລາຍ, ມີຜູ້ໄດ້ຮັບບາດເຈັບ 04 ຄົນ, ສັນຊາດຈີນ ຈຳນວນ 01 ລາຍ ແລະ ມີໄດ້ຮັບບາດເຈັບ 01 ຄົນ.