ກະຕໍ້ທີມຄູ່ຍິງ ຄວ້າຫຼຽນເງິນ ປົດລັອກ ຮ່າໂນ້ຍ ເກມ ພ້ອມຈະໄລ່ລ່າອີກ 2 ຫຼຽນຄຳ ໃນມື້ນີ້

124
ທັນຂ່າວ

ໜັງສືພິມສຶກສາທິການແລະກີລາ ລາຍງານວ່າ: ທັບນັກກິລາກະຕໍ້ທີມຊາດລາວ ປະເພດທີມຄູ່ຍິງ ລົງສະໜາມ ໃນນັດສຸດທ້າຍ ໄລ່ເອົາຊະນະ ກຳປູເຈຍ 2-0 ເຊັດ ໃນຕອນບ່າຍ 19 ພຶດສະພາ 2022 ລວມ 3 ນັດ ຊະນະ 2 ແລະ ເສຍ 1 ໄດ້ອັນດັບທີ 2 ຫຼື ຄວ້າ ຫຼຽນເງິນ ການແຂ່ງຂັນກິລາກະຕໍ້ ປະເພດທີມຄູ່ຍິງ ເປັນຫຼຽນທຳອິດ ສ້າງຂວັນກຳລັງໃຈໃຫ້ທັບນັກກິລາກະຕໍ້ ປະເພດທີມ 4 ຄົນ ອີກ 2 ລາຍການ ໄລ່ລ່າ 2 ຫຼຽນຄຳ ໃນວັນທີ20 ພຶດສະພາ 2022.


ທັບນັກກິລາກະຕໍ້ທີມຊາດລາວ ປະເພດທີມຄູ່ຍິງ ປະກອບມີ ຮ້ອຍຕີ ນາງ ກ້ອຍ ໄຊຍະວົງ ສັງກັດຢູ່ ກອງກິລາ ກະຊວງປ້ອງກັນປະເທດ ຫຼື ປກຊ, ຮ້ອຍໂທ ນາງ ນໍຄໍາ ວົງໄຊ ສັງກັດກົມກິລາກະຊວງປ້ອງກັນຄວາມສະຫງົບ (ປກສ) ແລະ ນາງ ສອນສະຫວັນ ແກ້ວສຸລີຍາ.

ໃນນັດທຳອິດ ຊະນະ ຫວຽດນາມ 2-1 ເຊັດ, ນັດທີ 2 ເສຍ ມຽນມາ 0-2 ເຊັດ ແລະ ນັດສຸດທ້າຍ ຊະນະ ກຳປູເຈຍ 2-0 ເຊັດ ຄວ້າຫຼຽນເງິນ, ສ່ວນ ຫຼຽນຄຳ ຕົກເປັນຂອງ ມຽນມາ ຊະນະ 3 ນັດລວດ ແລະ ຫວຽດນາມ ຊະນະ 1 ແລະ ເສຍ 2 ໄດ້ຫຼຽນທອງ.