ລາຄາກ໊າສທຳມະຊາດໃນຢູໂຣບ ພຸ່ງຂຶ້ນ24% ຫຼັງບໍລິສັດກ໊າສພຣອມ ຢຸດການສົ່ງກ໊າສໄປໂປແລນແລະບັລແກເຣຍ ທີ່ບໍ່ຍອມຈ່າຍຄ່າກ໊າສທຳມະຊາດເປັນເງິນຣູເບິລ

131
ທັນຂ່າວ

ສຳນັກຂ່າວຕ່າງປະເທລາຍງານວ່າ: ລາຄາກ໊າສທຳມະຊາດໃນຢູໂຣບ ພຸ່ງຂຶ້ນ24% ຫຼັງບໍລິສັດກ໊າສພຣອມ ຢຸດການສົ່ງກ໊າສໄປໂປແລນ ແລະ ບັລແກເຣຍ ທີ່ບໍ່ຍອມຈ່າຍຄ່າກ໊າສທຳມະຊາດເປັນເງິນຣູເບິລ.ຂະນະທີ່ມີລາຍງານວ່າມີຢ່າງນ້ອຍ 4 ປະເທດຢູໂຣບ ຍອມຊຳລະຄ່າກ໊າສທຳມະຊາດເປັນເງິນຣູເບິລໃຫ້ແກ່ຣັດເຊຍ ຕາມເງື່ອນໄຂໃໝ່ເຊິ່ງມີຜົນຕັ້ງແຕ່ວັນທີ 1 ເມສາທີີຜ່ານມາ.

ລາຄາຂາຍສົ່ງກ໊າສທຳມະຊາດໃນຢູໂຣບ ສັນຍາຊື້-ຂາຍລ່ວງໜ້າພຸ່ງຂຶ້ນ24% ໄປເຄື່ອນໄຫວທີ່127,50ຢູໂຣຕໍ່ເມກາວັດຊົ່ວໂມງ ໃນການຊື້ຂາຍໃນວັນທີ27 ເມສາ ສູງທີ່ສຸດນັບຕັ້ງແຕ່ວັນທີ1 ເມສາທີ່ຜ່ານມາ ແລະ ສູງກວ່າຊ່ວງເວລາດຽວກັນຂອງປີກ່ອນ 7ເທົ່າ.

ຄວາມເຄື່ອນໄຫວດັ່ງກ່າວ ຂອງລາຄາກ໊າສທຳມະຊາດ ມີຂຶ້ນຫຼັງຈາກບໍລິສັດພະລັງງານຍັກໃຫຍ່ຂອງຣັດເຊຍຢຸດການສົ່ງກ໊າສທຳມະຊາດ ແກ່ບຸລກາກ໊າສ ບໍລິສັດກ໊າສຂອງບັລແກເຣຍ ແລະ PGNiG ບໍລິສັດກ໊າສຂອງໂປແລນ ເມື່ອວັນທີ27 ເມສາ ເນື່ອງຈາກທັງສອງປະເທດບໍ່ຈ່າຍຄ່າກ໊າສເປັນເງິນຣູເບິລໃຫ້ແກ່ຣັດເຊຍ ຕາມເງື່ອນໄຂໃໝ່.

ດ້ານປະທານຄະນະກຳມາທິການຢູໂຣບ ກ່າວຫາຣັດເຊຍພະຍາຍາມໃຊ້ກ໊າສເປັນເຄື່ອງມືແບັກເມ ກໍລະນີລະງັບຈ່າຍກ໊າສທຳມະຊາດໃຫ້ບັລແກເຣຍ ແລະ ໂປແລນ ໂດຍລະບຸວ່າມັນເປັນການກະທຳທີ່ຂາດຄວາມຊອບທຳ ແລະ ເປັນສິ່ງທີ່ບໍ່ອາດຍອມຮັບໄດ້ ແລະກ່າວຫາຣັດເຊຍວ່າເປັນຜູ້ຈັດຫາກ໊າສທີ່ຂາດຄວາມໜ້າເຊື່ອຖືພ້ອມກັບຢໍ້າວ່າສະຫະພາບຢູໂຣບ ພ້ອມສະແດງຄວາມເປັນອັນໜຶ່ງອັນດຽວກັບໂປແລນ ແລະ ບັລແກເຣຍ ເຊິ່ງຈະໄດ້ຮັບອຸປະທານກ໊າສທຳມະຊາດຈາກປະເທດອື່ນໆຂອງອີຢູເພື່ອຮັບປະກັນວ່າທັງສອງປະເທດຈະບໍ່ຂາດແຄນກ໊າສ.

ຢ່າງໃດກໍຕາມ ສຳນັກຂ່າວບລູມເບິກລາຍງານໂດຍອ້າງແຫຼ່ງຂ່າວລາຍໜຶ່ງທີ່ໃກ້ຊິດກັບກ໊າສພຣອມວ່າມີຜູ້ນຳເຂົ້າເຊິ່ງເປັນປະເທດໃນຢູໂຣບ4 ປະເທດ ເລີ່ມປະຕິບັດຕາມເງື່ອນໄຂໃນການຊຳລະຄ່າກ໊າສທຳມະຊາດເປັນເງິນຣູເບິລແລ້ວ ລວມເຖິງຍັງມີບໍລິສັດຢູໂຣບ10ແຫ່ງ ທີ່ເປີດບັນຊີກັບກ໊າສຟຣອມແບັງແລ້ວ ຕາມຂໍ້ກຳນົດຊຳລະເງິນດ້ວຍຣູເບິລ