ຄຣິສຕີນາ Miss Universe Lao 2020 ເຊີນຊວນຮ່ວມໃຈກັນບໍລິຈາກເລືອດ

104

ຕາຮັກ ຕາແພງ ງາມແຖມມີຈິດໃຈດີ ຄຣິສຕີນາ ລາຊະສິມມາ Miss Universe laos 2020 ກັບການເຊີນຊວນແຟນໆ ແລະ ທຸກຄົນໃນສັງຄົມລາວ ຮ່ວມໃຈກັນໃນການບໍລິຈາກເລືອດ ເພື່ອຊ່ວຍຕໍ່ຊີວິດໃຫ້ກັບອີກໜຶ່ງຄົນໃຫ້ໄດ້ໃຊ້ຊີວິດຢູ່ລອດຢູ່ໃນໂຮງໝໍຕ່າງໆໃນທົ່ວປະເທດ ໂດຍໃນບົດສໍາພາດນ້ອງຄຣິສຕີນາ ບອກວ່າ ປັດຈຸບັນນີ້ທາງສູນເລືອດແຫ່ງຊາດແມ່ນຂາດແຄນເລືອດຢ່າງໜັກ ເນື່ອງຈາກສະຖານະການລະບາດຂອງພະຍາດໂຄວິດ – 19 ເຊິ່ງເຮັດໃຫ້ສູນເລືອດແຫ່ງຊາດ ແລະ ສູນເລືອດແຕ່ລະແຂວງທົ່ວປະເທດບໍ່ສາມາດອອກໄປຮັບບໍລິຈາກເລືອດໄດ້ຕາມສະຖານທີ່ຕ່າງໆບໍ່ວ່າຈະເປັນສະຖານການສຶກສາ ຫຼື ສໍານັກງານອົງການຕ່າງໆແມ່ນໄດ້ປິດການຕອບສະໜອງເລືອດ ໃນປັດຈຸບັນແມ່ນບໍ່ພຽງພໍຕໍ່ຄວາມຕ້ອງການຂອງຄົນເຈັບ ຈຶ່ງຢາກເຊີນຊວນໃຫ້ທຸກຄົນມາຮ່ວມແຮງຮ່ວມໃຈກັນບໍລິຈາກເລືອດ ເພື່ອໃຫ້ຜ່ານວິກິດການໃນການຂາດເລືອດໄປນໍາກັນ.

ພ້ອມນີ້, ສາວຄຣິສຕີນາ ຍັງໄດ້ໂພສຜ່ານເຟສບຸ໊ກສ່ວນຕົວຂອງຕົນເອງຕື່ມວ່າ: “ ໃນໄລຍະການແຜ່ລະບາດຂອງພະຍາດໂຄວິດ – 19 ການຕອບສະໜອງເລືອດແມ່ນບໍ່ພຽງພໍຕໍ່ກັບຄວາມຕ້ອງການຂອງຄົນເຈັບ ຄຣິສຕີນາ ລາຊະສິມມາ ມິສຢູນີເວີດລາວ ປະຈຳປີ 2020 ( Miss Universe laos 2020 ) ໃນນາມທີ່ເປັນຕົວແທນຂອງຊາວໜຸ່ມ ກໍໄດ້ເຊີນຊວນຊາວໜຸ່ມເຂົ້າຮ່ວມບໍລິຈາກເລືອດກຸບ A, B, O, AB ເພື່ອເປັນການຊ່ວຍເຫຼືອເພື່ອນມະນຸດດ້ວຍກັນ ໂດຍສະເພາະແມ່ນຊ່ວຍເຫຼືອຄົນເຈັບທີ່ຕ້ອງການໃສ່ເລືອດຢູ່ໂຮງໝໍແຫ່ງຕ່າງໆ ເພື່ອກອບກູ້ເອົາຊີວິດ ແລະ ເຮັດໃຫ້ສາມາດກັບຄືນມາດຳລົງຊີວິດຮ່ວມກັນໃນສັງຄົມໄດ້ຢ່າງເປັນປົກກະຕິ.

ເນື່ອງໃນໂອກາດສະເຫຼີມສະຫຼອງວັນສ້າງຕັ້ງຄະນະຊາວໜຸ່ມປະຊາຊົນ ປະຕິວັດລາວ ຄົບຮອບ 67 ປີ ສູນກາງຊາວໜຸ່ມປະຊາຊົນ ປະຕິວັດລາວ ຮ່ວມກັບອົງການກາແດງແຫ່ງຊາດລາວ ຈະໄດ້ຈັດຂະບວນການບໍລິຈາກເລືອດ ຂຶ້ນໃນວັນທີ 29 ເມສາ 2022 ທີ່ສູນການຄ້າລາວ – ໄອເຕັກ ຕຶກໃໝ່ຊັ້ນ 4 ເວລາ 8:00 – 15:00 ໂມງ ພາຍໃຕ້ຫົວຂໍ້ “ 67 ປີມີໄຊ ຊາວໜຸ່ມລາວຜູ້ສືບທອດ ອາດຫານ ຂານອາສາບໍລິຈາກເລືອດ ”.

ທ່ານສາມາດລົງທະບຽນຮ່ວມບໍລິຈາກເລືອດລ່ວງໜ້າໄດ້ ເພື່ອນຳລາຍຊື່ໄປແລນດັອມຜູ້ໂຊກດີໃນມື້ຈັດງານບໍລິຈາກເລືອດ ເພື່ອຮັບຂອງລາງວັນ ສາມາດລົງທະບຽນໄດ້ທີ່: ກົມຂະບວນການຊາວໜຸ່ມ ສຊປລ 021 453 565; ນາງ ສົມບູນ ມະຫາວົງ 020 9871 7197; 020 5989 7933; 020 9811 1067.

ນັກຮົບຂະບວນການຊາວໜຸ່ມ Lao Youth Union ສູນກາງຊາວໜຸ່ມປະຊາຊົນ ປະຕິວັດລາວ ”.

ເຊິ່ງເວົ້າໄດ້ວ່າ: ການອອກມາເຊີນຊວນສັງຄົມຮ່ວມແຮງຮ່ວມໃຈກັນໄປບໍລິຈາກເລືອດໃນຄັ້ງນີ້ ເປັນສິ່ງທີ່ດີຕໍ່ກັບສັງຄົມເປັນທີ່ສຸດ ງາມແຖມໃຈບຸນ ອອກມາເປັນກະບອກສຽງໃນສິ່ງທີ່ເປັນປະໂຫຍດແກ່ສັງຄົມຕະຫຼອດມາ ທີມຂ່າວບັນເທີງຕ້ອງຂໍສະແດງ ຄວາມຊົມເຊີຍເປັນທີ່ສຸດ. ສະນັ້ນ, ເພື່ອເປັນການສະໜັບສະໜູນໂຄງການດັ່ງກ່າວ ແລະ ເປັນການຊ່ວຍເຫຼືອສັງຄົມດ້ວຍ ເຊີນຊວນທຸກຄົນໄປຮ່ວມບໍລິຈາກເລືອດນໍາກັນຫຼາຍໆເດີ ແລະ ຕິດຕາມຜົນງານການເຄື່ອນໄຫວຂອງສາວງາມຄົນນີ້ດ້ວຍທີ່ເຟສ ບຸ໊ກ Christina Lasasimma ນັ້ນເອງ.

[ ຮູບ: Christina Lasasimma ]