ລັດຖະມົນຕີຕ່າງປະເທດຣັດເຊຍ ເຕືອນຄວາມສ່ຽງທີ່ຈະເກີດສົງຄາມໂລກຄັ້ງທີ 3 ອາດເປັນຈິງ ແລະ ມີຄວາມສ່ຽງສູງທີ່ຄວາມຂັດແຍ່ງຈະບານປາຍເຖິງຂັ້ນໃຊ້ອາວຸດນິວເຄລຍ

145
ທັນຂ່າວ

ລັດຖະມົນຕີຕ່າງປະເທດຣັດເຊຍ ເຕືອນຄວາມສ່ຽງທີ່ຈະເກີດສົງຄາມໂລກຄັ້ງທີ 3 ອາດເປັນຈິງ ແລະ ມີຄວາມສ່ຽງສູງທີ່ຄວາມຂັດແຍ່ງຈະບານປາຍເຖິງຂັ້ນໃຊ້ອາວຸດນິວເຄລຍ ລະບຸນາໂຕ້ກຳລັງເຮັດສົ່ງຄາມຕົວແທນກັບຣັດເຊຍ ແຕ່ສະແດງຄວາມເຊື່ອໝັ້ນວ່າຄວາມຂັດແຍ່ງ ຈະຈົບລົງດ້ວຍການລົງນາມໃນຂໍ້ຕົກລົງສັນຕິພາບ.

ສຳນັກຂ່າວຕ່າງປະເທດ ລາຍງານວ່າ: ທ່ານ ເຊີເກ ລາຟຣອບ ລັດຖະມົນຕີກະຊວງການຕ່າງປະເທດຣັດເຊຍ ໃຫ້າສຳພາດສະຖານີ ໂທລະພາບ Russian First Channel ຂອງຣັດເຊຍ ແລະ ສຳນັກຂ່າວ Interfax ຂອງຣັດເຊຍ ແລະ ສື່ອື່ນໆໃນຣັດເຊຍ ເມື່ອວັນທີ 25 ເມສາ ວ່າ: ເມື່ອພິຈາລະນາ ຈາກສະຖານະການໃນຕອນນີ້ອັນຕະລາຍທີ່ຈະເກີດສົງຄາມໂລກຄັ້ງທີ 3 ອາດເປັນຄວາມຈິງໄດ້.ພ້ອມເຕືອນວ່າມີຄວາມສ່ຽງສູງຫຼາຍ ທີ່ຄວາມຂັດແຍ່ງໃນຢູເຄນ ຈະບານປາຍ ແລະ ຍົກລະດັບຂຶ້ນໄປຈົນເຖິງຂັ້ນການໃຊ້ອາວຸດນິວເຄລຍ.

ຢ່າງໃດກໍຕາມ ທ່ານເຊີເກ ຣາຟຣອບ ຍືນຍັນວ່າຈຸດຢືນຂອງຣັດເຊຍຄືຕ້ອງການຫລີກລ່ຽງບໍ່ໃຫ້ເກີດຄວາມສ່ຽງ ອັນຈະເຮັດໃຫ້ຄວາມຂັດແຍ່ງບານປາຍໄປໄດ້ເຖິງຂັ້ນນັ້ນ ແຕ່ຍອມຮັບວ່າຂະນະນີ້ຄວາມສ່ຽງດັ່ງກ່າວກຳລັງເພີ່່ມຫຼາຍຂຶ້ນ ເບິ່ງເປັນຈິງເປັນຈັງຫຼາຍຂຶ້ນ ແລະ ບໍ່ຄວນປະເມີນອັນຕະລາຍເລົ່ານີ້ຕໍ່າເກີນໄປ. ການທີ່ປະເທດຕາເວັນຕົກສົ່ງອາວຸດໃຫ້ຢູເຄນ ໝາຍຄວາມວ່າອົງການນາໂຕ້ກຳລັງເຮັດສົງຄາມກບຣັດເຊຍ ໂດຍຜ່ານການເຮັດສົງຄາມຕົວແທນ ຜ່ານຢູເຄນ, ທ່ານເຊີເກ ຣາຟຣອບ ກ່າວ.


ທັງນີ້ ທ່ານເຊີເກ ຣາຟຣອບ ເຊື່ອໝັ້ນວ່າຄວາມຂັດແຍ່ງໃນຢູເຄນແລະທຸກສິ່ງທຸກຢ່າງ ຈະຈົບລົງດ້ວຍການລົງນາມໃນຂໍ້ຕົກລົງສັນຕິພາບຢ່າງແນ່ນອນ ແຕ່ເນື້ອຫາໃນຂໍ້ຕົກລົງສັນຕິພາບເປັນຈັງໃດນັ້ນ ກໍຂຶ້ນຢູ່ກັບສະຖານະການທາງທະຫານທີ່ເກີດຂຶ້ນໃນຊ່ວງເວລາທີ່ສົນທິສັນຍາສັນຕິພາບກຳລັງຈະກາຍເປັນຄວາມຈິງ ຈະເປັນຕົວຕັດສິນເນື້ອຫາໃນຂໍ້ຕົກລົງສັນຕິພາບ.