ສະແດງໄດ້ດີແຮງ! ຜົນງານສະແດງເອັມວີເພງ ຫຼ້າສຸດຂອງ ນັດຊະຍາ ໄຊໂກສີ

124

ແຟນໆໄດ້ຮັບຊົມກັນ ຫຼື ຍັງ! ຜົນງານການສະແດງເອັມວີໃໝ່ຂອງສາວນ້ອຍໄວໃສ ຈາກເວທີປະກວດ Miss Teen Laos ເຊິ່ງເປັນໂປຣເຈັກໃຫຍ່ ທໍາອິດຂອງນ້ອງທີ່ໄດ້ຮ່ວມສະແດງ ໂດຍຜົນງານໃໝ່ໃນການຮ່ວມສະແດງຂອງນ້ອງ ນັດຊະຍາ ໄຊໂກສີ ຫຼື ກົບນ້ອຍ ຈາກສັງກັດ The One Agency ໃນຄັ້ງນີ້ ເປັນບົດເພງທີ່ມີຊື່ວ່າ: “ ຕອນມີບໍ່ຮັກ ” ແລະ ທີມຂ່າວບັນເທີງກໍໄດ້ມີໂອກາດສໍາພາດນ້ອງ ໂດຍນ້ອງກົບນ້ອຍ ບອກວ່າ:

ການຮ່ວມສະແດງເອັມວີເພງ ກົບນ້ອຍ ກໍພໍມີປະສົບການມາແດ່ແລ້ວ ແຕ່ນີ້ເປັນຄັ້ງທຳອິດທີ່ເປັນ project ໃຫຍ່ທີ່ທາງອ້າຍ PAO LASER ເພິ່ນໃຫ້ໂອກາດ ແລະ ໄດ້ຮ່ວມງານນຳບັນດາທີມງານທີ່ມີແຕ່ຄົນເກັ່ງໆຮູ້ສຶກຕື່ນເຕັ້ນ ແລະ ດີໃຈຫຼາຍ ທີ່ໄດ້ເປີດປະສົບການໃໝ່ໃນການຮຽນຮູ້ ແລະ ຮ່ວມງານກັບທີມງານທີ່ມີຄຸນນະພາບ.

ສໍາລັບບົດທີ່ໄດ້ຮັບ ຈະຮັບບົດເປັນນາງເອກໃນເລື່ອງທີ່ເສຍໃຈກັບຄວາມຮັກທີ່ບໍ່ເຄີຍຖືກເຂົາໃຫ້ຄວາມສົນໃຈ ແລະ ຄວາມຮັກທີ່ແທ້ຈິງ ຈົນມື້ທີ່ເຮົາເຂັ້ມແຂງ ແລະ ຮູ້ສຶກຢູ່ຕົວຄົນດຽວໄດ້ ໂດຍບໍ່ຕ້ອງເພິ່ງໃຜ ແລະ ເຮັດໃຫ້ເຮົາຮູ້ສຶກຮັກ ແລະ ເຫັນຄຸນຄ່າຂອງຕົວເອງຫຼາຍຂຶ້ນ ຈຶ່ງນຳພາຕົນເອງລຸກຂຶ້ນໄປສູ່ຊີວິດທີ່ມີຄວາມສຸກຄັ້ງໃໝ່, ສຳລັບສິ່ງທີ່ປະທັບໃຈໃນບົດນີ້ກໍຄືການເຮັດວຽກຂອງທີມງານ ແລະ ນັກສະແດງ ບໍ່ວ່າຈະຜ່ານອຸປະສັກທີ່ຫຍຸ້ງຍາກພຽງໃດ ທຸກຄົນກໍເຕັມທີ່ ແລະ ເຮັດບົດເພງນີ້ອອກມາໄດ້ຢ່າງສົມບູນຄົບຖ້ວນ.

ສ່ວນເນື້ອຫາເພງແມ່ນເປັນປະມານວ່າ ໃນຕອນທີ່ຮັກກັນຢູ່ ບໍ່ເຄີຍເຫັນຄຸນຄ່າຂອງຄວາມຮັກທີ່ອີກຝ່າຍມີໃຫ້ ຈົນມື້ໜຶ່ງທີ່ຕ້ອງເສຍຄົນໆນັ້ນໄປ ຈຶ່ງກັບມາຫວນຄືນ ແລະ ນຶກຄິດເຖິງ ຄວາມຮັກທີ່ເຄີຍມີຢູ່ ແຕ່ສຸດທ້າຍທຸກຢ່າງກໍສາຍເກີນແກ້ໄຂ ແລະ ສູນເສຍຄົນທີ່ຮັກໄປໂດຍບໍ່ມີວັນຫວນຄືນກັບມາ.

ໃນຕອນທ້າຍ ນ້ອງກົບນ້ອຍກໍຍັງຂໍຝາກຜົນງານໃນການສະແດງຄັ້ງນີ້ດ້ວຍ ແລະ ຂໍຝາກເພງນີ້ໃຫ້ທຸກຄົນໄດ້ຕິດຕາມຮັບຊົມ ແລະ ຮັບຟັງ, ພ້ອມນີ້ຍັງຫວັງວ່າບົດເພງດັ່ງກ່າວຈະເປັນບົດເພງທີ່ຢູ່ໃນໃຈຂອງທຸກຄົນຕະຫຼອດໄປ.

ສໍາລັບນ້ອງກົບນ້ອຍ ເປັນໜຶ່ງໃນຜູ້ເຂົ້າປະກວດ Miss Teen Laos 2021 ແລະ ເປັນນ້ອງຄົນໜຶ່ງທີ່ມີຜົນງານໃນວົງການບັນເທີງມາແລ້ວບໍ່ໜ້ອຍ ບໍ່ວ່າຈະເປັນເດີນແບບ, ຖ່າຍແບບ, ຣີວິວສິນຄ້າຕ່າງໆ. ພ້ອມນີ້, ຍັງເປັນນັກຮຽນເກັ່ງທີ່ຄວ້າລາງວັນມາແລ້ວອີກດ້ວຍ ເອີ້ນໄດ້ວ່າທັງງາມທັງເກັ່ງອີ່ຫຼີເລີຍ.

ສິ່ງທີ່ເຮັດໃຫ້ນ້ອງຄົນນີ້ກາຍເປັນເດັກໄວໜຸ່ມທີ່ເກັ່ງ ແລະ ມີຄວາມຮູ້, ຄວາມສາມາດຮອບດ້ານເລີຍ ກໍຄືຍາມວ່າງກໍຈະຊອກຫາວິດີໂອໃຫ້ຂໍ້ຄິດເບິ່ງ ໃຫ້ແຮງບັນດານໃຈຕ່າງໆ ເພື່ອເປັນຄຳສອນເຕືອນໃຈໃນການດຳລົງຊີວິດຂອງນ້ອງ. ນອກຈາກນັ້ນ, ກໍຍັງມັກພົບປະກັບໝູ່ຄູ່ ອອກໄປຖ່າຍຮູບ ຫຼື ພັກຜ່ອນ ເພື່ອເປັນການຜ່ອນຄາຍຊີວິດຂອງຕົນເອງອີກດ້ວຍ.

ສຸດທ້າຍນີ້ທີມຂ່າວບັນເທີງກໍຂໍຝາກແຟນຂ່າວທຸກຄົນຕິດຕາມທຸກໆຜົນງານ ແລະ ການເຄື່ອນໄຫວຂອງນ້ອງດ້ວຍ ຜ່ານທາງເຟສບຸ໊ກ Natsaya Saykosy.

[  ຮູບ: Natsaya Saykosy ]