ຮອງນາຍົກ ລົງກວດກາຄວາມພ້ອມກຽມຮັບມືການລະບາດຂອງພະຍາດສາຍພັນໃໝ່ ທີ່ໂຮງໝໍ 103

556

ວິທະຍຸກະຈາຍສຽງແຫ່ງຊາດໄດ້ລາຍງານໃນວັນທີ 8 ກຸມພາ  2020 ວ່າ: ທ່ານສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ທັງເປັນປະທານ ຄະນະກໍາມະການສະເພາະກິດ ກັນ ແລະ ຄວບຄຸມພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃຫມ່ ຫລື ໂຄໂລນາໄວຣັດ ພ້ອມດ້ວຍລັດຖະມົນຕີ, ຮອງລັດຖະມົນຕີກະຊວງທາສາລະນະສຸກ ພ້ອມດ້ວຍຄະນະ ລົງເຄື່ອນໄຫວເຮັດວຽກຢູ່ໂຮງຫມໍ103ນະຄອນຫລວງວຽງຈັນ ເພື່ອກວດກາ ດ້ານຕ່າງໆ ຂອງໂຮງຫມໍ103 ໃນການກຽມຄວາມພ້ອມເພື່ອຮັບມືກັບການລະບາດຂອງພະຍາດນີ້ ພາຍຫລັງທີ່ລັດຖະບານກໍານົດເອົາໂຮງຫມໍ 103ເປັນໜຶ່ງໃນສະຖານທີ່ປີ່ນປົວຄົນເຈັບທີ່ເປັນພະຍາດອັກເສບປອດສາຍພັນໃຫມ່ ເຖີງວ່າຢູ່ລາວຍັງບໍ່ພົບຄົນເປັນພະຍາດນີ້ກໍ່ຕາມ.

ພົນຈັດຕະວາ ບົວສີງ ອີນທະວົງ ຫົວຫນ້າກົມເສນາຮັກ ກະຊວງປ້ອງກັນປະເທດ ທັງຢູ່ໃນຄະນະຮັບຜິດຊອບກັນແລະຄວບຄຸມພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃຫມ່ ຫລື ໂຄໂລນາໄວຣັດ ໄດ້ລາຍງານສະພາບການຈັດຕັ້ງປະຕິບັດດ້ານວຽກງານຕ່າງໆ ໂດຍສະເພາະການກຽມຄວາມພ້ອມຂອງໂຮງຫມໍໃນການຮັບມືກັບພະຍາດນີ້ ຕາມທີ່ລັດບານກໍ່ຄືກະຊວງສາທາລະນະກໍານົດໃຫ້ເປັນຕົ້ນ:ການກະກຽມຫ້ອງແຢກປ່ຽວ,ອຸປະກອນການກວດຫາເຊື້ອທີ່ທັນສະໄຫມ,ຢາປີ່ນປົວພະຍາດ ແລະ ບຸກຄະລາແພດຫມໍຈໍານວນຫນື່ງ,ເຊີ່ງໂຮງຫມໍແຫ່ງນີ້ ຍັງເຮັດຫນ້າທີ່ຕິດຕາມເຝົ້າລະວັງກໍລະນີສົງໃສທີ່ອາດຕິດເຊື້ອພະຍາດອັກເສບປອດສາຍພັນໃຫມ່ ເຊີ່ງມາຮອດປັດຈຸບັນການກຽມຄວາມພ້ອມດ້ານຕ່າງໆ ເປັນສໍາເລັດເກືອບຮ້ອຍສ່ວນຮ້ອຍແລ້ວ.

ໂອກາດດຽວກັນນີ້ ທ່ານສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງີນ ທັງປະທານ ຄະນະກໍາມະການສະເພາະກິດ ກັນແລະຄວບຄຸມພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃຫມ່ ຫລື ໂຄໂລນາໄວຣັດ ໄດ້ສະແດງຄວາມຊົມເຊີຍຕໍ່ໂຮງຫມໍ103ທີ່ມີຄວາມພະຍາຍາມໃນການຈັດຕັ້ງປະຕິບັດວຽກງານຕະຫລອດມາ ພ້ອມທັງ ເນັ້ນຫນັກໃຫ້ບຸກລະລາກອນແພດຫມໍ ພາຍໃນໂຮງຫມໍ103ທຸກຄົນ ກະກຽມພ້ອມເຝົ້າລະວັງສະພາບການລະບາດຂອງພະຍາດອັກເສບປອດຢ່າງຕໍ່ເນື່ອງ ແລະ ສຸມທຸກເຮື່ອແຮງ ເຂົ້າໃນການຈັດຕັ້ງປະຕິບັດຫນ້າທີ່ວຽກງານທີ່ຖືກມອບຫມາຍຢ່າງແຂງແຮງ ເພື່ອບໍລິການຮັບໃຊ້ປະຊາຊົນ ດ້ວຍຄວາມເປັນເຈົ້າການ.

ທ່ານສົມດີ ດວງດີ ເນັ້ນຫນັກຕື່ມວ່າ:ສໍາລັບກໍລະນີ້ມີນັກສຶກສາຈີນຈໍານວນຫລາຍກວ່າ100ຄົນມີການພັກພາກທີ1ກັບເມືອຈີນແລ້ວເດີນທາງກັບຄືນມາລາວເພື່ອສືບຕໍ່ຮໍ່າຮຽນສຶກສາໃນພາກຮຽນ2ໃຫ້ພາກສ່ວນກ່ຽວຂ້ອງຕິດຕາມເຝົ້າລະວັງຢ່າງໃກ້ສິດ ໂດຍສະເພາະຈໍາກັດເຂດທີ່ພັກອາໃສຊົ່ວຄົວແລະຕິດຕາມອາການ ຈົນກວ່າຈະຄົບ14ວັນ ເພື່ອປ້ອງກັນການແຜ່ລະບາດຂອງພະຍາດອັກເສບປອດ ລວມເຖີງວຽກງານສໍາຄັນຈໍານວນຫນື່ງ.

ສໍາລັບຕົວເລກຜູ້ຕິດເຊື້ອ ແລະ ເສຍຊີວິດຈາກການເປັນພະຍາດອັກເສບປອດທີ່ເກີດຈາກເຊື້ອຈຸລະໂລກສາຍພັນໃຫມ່ ຫລື ໂຄໂລນາໄວຣັດຢູ່ຈີນ ຕາມການລາຍງານຂອງພາກສ່ວນກ່ຽວຂ້ອງຂອງຈີນມາຮອດວັນທີ7ກຸມພານີ້ ຈີນມີຜູ້ຕິເຊື້ອທັງຫມົດ34.546ຄົນ,ເສຍຊີວິດ722ຄົນ, ໃນນີ້ສະເພາະຢູ່ເມືອງອູຮານ ແຂວງຫູເປີຍມີທັງຫມົດ24.953ຄົນ ເສຍຊີວິດ699ຄົນ ແລະ ປົວດີເປັນກະຕິ1.115ຄົນ ສໍາລັບຢູ່ລາວຍັງບໍ່ພົບຜູ້ຕິດເຊື້ອຫລືເສຍຊີວິດຈາກການເປັນພະຍາດອັກເສບປອດສາຍພັນໃຫມ່ຈັກກໍລະນີ ແລະ ທຸກການກວດກາຫາເຊື້ອພະຍາດນີ້ແມ່ນໄດ້ຮັບການຢັ້ງຢືນຈາກອົງການອະນາໄມໂລກ.

ທີ່ມາ: ຂ່າວເສດຖະກິດການຄ້າ