ນໍາໃຊ້ລະບົບຊັບສິນທາງປັນຍາ ເພື່ອການພັດທະນາເສດຖະກິດ

469

ໃນຕອນເຊົ້າຂອງວັນທີ 15 ມັງກອນ 2020 ນີ້, ກົມຊັບສິນທາງປັນຍາ, ກະຊວງວິທະຍາສາດ ແລະ ເຕັກໂນໂລຊີ ສປປ ລາວ ຮ່ວມກັບ ສໍານັກງານສິດທິບັດ ປະເທດ ຍີ່ປຸ່ນ (JPO) ໄດ້ຈັດກອງປະຊຸມ ສຳມະນາພາຍໃຕ້ຫົວຂໍ້: “ການນໍາໃຊ້ລະບົບຊັບສິນທາງປັນຍາ ເພື່ອການພັດທະນາເສດຖະກິດ”, ກອງປະຊຸມດັ່ງກ່າວໄດ້ຈັດຂຶ້ນຢູ່ ໂຮງແຮມ ວຽງຈັນພລາຊາ, ນະຄອນຫຼວງວຽງຈັນ

ໂດຍພາຍໃຕ້ການເປັນປະທານຂອງ ທ່ານ ປອ. ນາງ ຂັນລາສີ ແກ້ວບຸນພັນ, ຫົວໜ້າກົມຊັບສິນທາງປັນຍາ ແລະ ທ່ານ Masashi Nemoto, ຫົວໜ້າພະແນກ ຮ່ວມມືຕ່າງປະເທດ, ສໍານັກງານສິດທິບັດ ປະເທດ ຍີ່ປຸ່ນ, ຊຶ່ງມີບັນດານັກວິທະຍາກອນ, ສຳມະນາກອນ ທີ່ມາຈາກພາກສ່ວນຕ່າງໆ ພາກລັດ ແລະ ບໍລິສັດຕົວແທນຈົດທະບຽນຊັບສິນທາງປັນຍາ ທັງພາຍໃນ ແລະ ຕ່າງປະເທດ ເຂົ້າຮ່ວມ 40 ກວ່າຄົນ.

ຈຸດປະສົງຂອງກອງປະຊຸມສຳມະນາດັ່ງກ່າວ ແມ່ນເພື່ອຮັບຟັງການລາຍງານກ່ຽວກັບການພັດທະນາ ແລະ ການບໍລິຫານລະບົບຊັບສິນທາງປັນຍາໃນ ສປປ ລາວ ແລະ ຮັບຟັງລາຍງານສະພາບການໃນປັດຈຸບັນຂອງການບໍລິຫານຊັບສິທາງປັນຍາອຸດສາຫະກໍາໃນປະເທດຍີ່ປຸ່ນ.

ເພື່ອເປັນການເຜີຍແຜ່ເຖິງບົດບາດຂອງຊັບສິນທາງປັນຍາໃນການພັດທະນາເສດຖະກິດ ໃນ ສປປ ລາວ ແລະ ຍີ່ປຸ່ນ, ການປົກປ້ອງເຄື່ອງໝາຍການຄ້າໂດຍຜ່ານລະບົບມາດຼິດ ໃນ ສປປ ລາວ ແລະ ຍີ່ປຸ່ນ. ພ້ອມນັ້ນ, ຍັງເປັນເວທີການສົນທະນາຖາມ-ຕອບ, ປະກອບຄຳເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນ.

ກອງປະຊຸມສຳມະນາດັ່ງກ່າວໄດ້ດຳເນີນໄປເປັນເວລາ 1 ວັນ ແລະ ປິດລົງດ້ວຍຜົນສຳເລັດອັນຈົບງາມ. 


ພາບ-ຂ່າວ: ແສງທອງ