ສົມຊື່ເປັນເຂດເສດຖະກິດພິເສດ! ດຶງການລົງທຶນຈາກຕ່າງປະເທດໄດ້ຫຼາຍກວ່າ 800ບໍລິສັດ

1042

ໃນໄລຍະ 7 ປີຜ່ານມາ, ເຂດເສດຖະກິດພິເສດຢູ່ປະເທດເຮົາສາມາດດຶງເອົາບໍລິສັດລາຍໃຫຍ່ທີ່ມີຊື່ສຽງ ແລະ ມີຄຸນນະພາບຈາກຕ່າງປະເທດເຂົ້າມາລົງທຶນໃນລາວໄດ້ເຖິງ 806 ບໍລິສັດ, ໃນນັ້ນເດັ່ນກວ່າໝູ່ແມ່ນ ເຂດສະຫວັນ-ເຊໂນ(ຈຸດ C), ເຂດເສດຖະກິດກວມລວມໄຊເຊດຖາ, ເຂດນິຄົມອຸດສາຫະກໍາ ການຄ້າວຽງຈັນ-ໂນນທອງ, ເຂດບໍ່ເຕ່ນແດນງາມ ແລະ ເຂດສາມຫຼ່ຽມຄໍາ, ສະເພາະປີ 2019 ມີບໍລິສັດເຂົ້າມາລົງທຶນ 202ບໍລິສັດ.

ກອງປະຊຸມ ສະຫລຸບວຽກງານການພັດທະນາ ແລະ ຄຸ້ມຄອງເຂດເສດຖະກິດພິເສດ ປະຈຳປີ 2019 ຈັດຂຶ້ນໃນວັນທີ 14 ມັງກອນ 2020 ທີ່ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ, ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ, ມີບັນດາຮອງເຈົ້າແຂວງ ຮອງເຈົ້າຄອງໃນເຂດເສດຖະກິດພິເສດ ຕັ້ງຢູ່ ພ້ອມດ້ວຍບັນດາຮອງລັດຖະມົນຕີ, ຄະນະກົມ ແລະ ພາກສ່ວນກ່ຽວຂ້ອງໃນທົ່ວປະເທດເຂົ້າຮ່ວມ.

ໃນກອງປະຊຸມ ທ່ານ ສອນໄຊ ສີພັນດອນ ໃຫ້ຮູ້ວ່າ: ອີງໃສ່ການຖອດຖອນບົດຮຽນຈາກສາກົນ ການພັດທະນາເຂດເສດຖະກິດພິເສດ ໄດ້ມີການປັບປຸງໃຫ້ເຂົ້າກັບສະພາບ ແລະ ຄຸນລັກສະນະຂອງປະເທດເຮົາ, ຈຶ່ງໄດ້ສ້າງຕັ້ງເຂດສະຫວັນ-ເຊໂນ ຂຶ້ນເປັນແຫ່ງທຳອິດຂອງລາວໃນປີ 2003 ຕາມແລວທາງເສດຖະກິດຕາເວັນອອກ-ຕາເວັນຕົກ (EWEC)

ຫຼັງຈາກນັ້ນ ປີ 2010 ກໍ່ໄດ້ມີການຍົກລະດັບໂຄງການລົງທຶນທົ່ວໄປຂຶ້ນເປັນເຂດເສດຖະກິດພິເສດ ພ້ອມສ້າງຕັ້ງຂຶ້ນໃໝ່ຈຳນວນ 12 ເຂດ, ແຕ່ການພັດທະນາໄດ້ເລີ່ມມີການເຕີບໃຫຍ່ຂະຫຍາຍຕົວຢ່າງເປັນຮູບປະທໍາແມ່ນນັບແຕ່ປີ 2013 ເປັນຕົ້ນມາ.

ໃນຕະຫຼອດໄລຍະ 7ປີຜ່ານມາ ວຽກງານດັ່ງກ່າວໄດ້ຮັບການປັບປຸງດີຂຶ້ນເລື້ອຍໆ, ມີຄວາມຄືບໜ້າ ແລະ ປະກອບສ່ວນສຳຄັນຕໍ່ກັບການພັດທະນາເສດຖະກິດ-ສັງຄົມ ໂດຍສະເພາະການພັດທະນາພື້ນຖານໂຄງລ່າງ ແລະ ອື່ນໆ.

ນອກຈາກນັ້ນ ການພັດທະນາເຂດເສດຖະກິດພິເສດ ຍັງໄດ້ສ້າງຄວາມເຊື່ອໝັ້ນ ເຊິ່ງສາມາດດຶງເອົາບໍລິສັດລາຍໃຫຍ່ທີ່ມີຊື່ສຽງ ແລະ ມີຄຸນນະພາບຈາກຕ່າງປະເທດເຂົ້າມາລົງທຶນນັບມື້ນັບຫຼາຍຂຶ້ນ ໂດຍສະເພາະຢູ່ເຂດສະຫວັນ-ເຊໂນ (ຈຸດ C), ເຂດກວມລວມໄຊເຊດຖາ, ເຂດນິຄົມອຸດສາຫະກໍາ ການຄ້າວຽງຈັນ-ໂນນທອງ, ເຂດບໍ່ເຕ່ນແດນງາມ ແລະ ເຂດສາມຫລ່ຽມຄໍາ ທີ່ມາຮອດປະຈຸບັນມີບໍລິສັດເຂົ້າມາລົງທຶນທັງໝົດ 806 ບໍລິສັດ

ສະເພາະປີ 2019 ກໍ່ມີບໍລິສັດເຂົ້າມາລົງທຶນ 202 ບໍລິສັດ, ໄດ້ມອບພັນທະເຂົ້າງົບປະມານຂອງລັດ 122,09 ຕື້ກີບ, ສົ່ງອອກສິນຄ້າໄດ້ 394,4 ລ້ານໂດລາສະຫະລັດ ແລະ ສ້າງວຽກເຮັດງານທຳໄດ້ 26.756 ຄົນ (ລາວ 2.607 ຄົນ ກວມເອົາ 9.74%)

ຂອບໃຈຂໍ້ມູນຈາກ: ຂ່າວເສດຖະກິດການຄ້າ