ກວຕ ອວຍພອນ ແລະ ມອບເຄື່ອງໃຫ້ແກ່ໂຮງຮຽນທິດສະດີການເມືອງກອງທັບ

648

ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ (20 ມັງກອນ 1949-20 ມັງກອນ 2020) ທີ່ໃກ້ຈະໝູນວຽນມາບັນຈົບຄົບຮອບອີກວາລະໜຶ່ງ. ທ່ານ ບັນດິດ. ສຈ ບໍ່ວຽງຄຳ ວົງດາລາ, ກຳມະການສູນກາງພັກ, ເລຂາຄະນະພັກ, ລັດຖະມົນຕີ, ກະຊວງວິທະຍາສາດ ແລະ ເຕັກໂນໂລຊີ (ກວຕ) ພ້ອມດ້ວຍຄະນະພັກ-ຄະນະນໍາ ແລະ ອົງການຈັດຕັ້ງມະຫາຊົນ ໄດ້ຢ້ຽມຢາມອວຍພອນ ແລະ ມອບເຄື່ອງຈໍານວນໜຶ່ງໃຫ້ແກ່ ໂຮງຮຽນທິດສະດີການເມືອງກອງທັບ ໃນຕອນເຊົ້າ ຂອງວັນທີ 10 ມັງກອນ 2020 ນີ້. ໂດຍໄດ້ຮັບການຕ້ອນຮັບຂອງ ທ່ານ ພັນເອກ ຄໍາຜາຍ ສະພັງເໜືອ, ຫົວໜ້າການເມືອງໂຮງຮຽນທິດສະດີການເມືອງກອງທັບ.

  

ໃນໂອກາດດັ່ງກ່າວ, ທ່ານ ພັນເອກ ຄຳຜາຍ ສະພັງເໜືອ ໄດ້ກ່າວສະແດງຄວາມຂອບໃຈຕໍ່ ທ່ານ ບັນດິດ ສຈ. ບໍ່ວຽງຄຳ ວົງດາລາ, ລັດຖະມົນຕິ ກວຕ ພ້ອມດ້ວຍຄະນະ, ທີ່ໄດ້ນຳເອົາຄໍາອວຍພອນ ແລະ ເຄື່ອງຈໍານວນດັ່ງກ່າວມາມອບໃຫ້ແກ່ໂຮງຮຽນໃນຄັ້ງນີ້ ຊຶ່ງຈະເປັນການປະກອບສ່ວນເຂົ້າໃນການພັດທະນາວຽກງານພາຍໃນໂຮງຮຽນທິດສະດີການເມືອງກອງທັບ ກໍຄືການພັດທະນາບຸກຄະລາກອນຂອງກອງທັບປະຊາຊົນລາວ ໃຫ້ມີຄວາມຮູ້ ມີຄວາມສາມາດ, ກຳໄດ້ແນວຄິດທິດສະດີການເມືອງຂອງກອງທັບ ແລະ ຈະນໍາໃຊ້ເຂົ້າໃນວຽກງານວິຊາສະເພາະການຮຽນ-ການສອນ ແລະ ກິດຈະກຳຕ່າງໆ ໃຫ້ເກີດປະໂຫຍດສູງສຸດ.

ພ້ອມກັນນີ້, ທ່ານ ລັດຖະມົນຕີ ກວຕ ກໍໄດ້ຕາງໜ້າຄະນະພັກ-ຄະນະນໍາ ແລະ ອ້າຍເອື້ອຍນ້ອງພາຍໃນ ກວຕ ກ່າວສະແດງຄໍາອວຍພອນໃຫ້ແກ່ບັນດານາຍ, ພົນທະຫານ ແລະ ນັກຮົບທົ່ວກອງທັບ ເນື່ອງໃນໂອກາດວັນສ້າງຕັ້ງກອງທັບຄົບຮອບ 71 ປີ (20 ມັງກອນ 1949-20 ມັງກອນ 2020) ທີ່ຈະມາເຖິງໃນມໍ່ໆນີ້.

ພ້ອມທັງສະແດງຄວາມຊົມເຊີຍ ແລະ ຍິນດີຕໍ່ການສ້າງໂຮງຮຽນທິດສະດີການເມືອງກອງທັບ ແຫ່ງນີ້ ແລະ ຫວັງຢ່າງຍິ່ງວ່າບັນດາອຸປະກອນທີ່ນໍາມາມອບໃຫ້ໃນຄັ້ງນີ້ ຈະເປັນການປະກອບສ່ວນໃນການພັດທະນາວຽກງານວິຊາສະເພາະ ການຮຽນ-ການສອນ ແລະ ກິດຈະກຳຕ່າງໆຂອງໂຮງຮຽນ. ທ່ານຍັງກ່າວຕື່ມວ່າ: ໃນຕໍ່ໜ້າຫວັງວ່າຈະໄດ້ໃຫ້ການຮ່ວມມື ໃນດ້ານວຽກງານວິທະຍາສາດ ແລະ ເຕັກໂນໂລຊີ ຮ່ວມກັນໃນການນຳໃຊ້ເຕັກນິກວິທະຍາສາດ ເຂົ້າໃນວຽກງານວິຊາສະເພາະ, ວຽກງານປ້ອງການຊາດ ປ້ອງກັນຄວາມສະຫງົບ ແລະ ເພື່ອເຮັດໃຫ້ກອງທັບເຮົາມີຄວາມເຂັ້ມແຂງຂຶ້ນເລື້ອຍໆ.

ເຄື່ອງທີ່ນໍາມາມອບໃນຄັ້ງນີ້ປະກອບມີ: ຄອມພິວເຕີແລັບທອບ ຈໍານວນ 3 ຊຸດ, ກ້ອງຖ່າຍຮູບ ຈໍານວນ 1 ໜ່ວຍ ແລະ ອຸປະກອນກິລາຈໍານວນໜຶ່ງ ລວມມູນຄ່າທັງໝົດ 30 ກວ່າລ້ານກີບ, ຊຶ່ງມອບໂດຍ ທ່ານ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ເລຂາຄະນະພັກ, ລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ແລະ ຮັບໂດຍ ທ່ານ ພັນເອກ ຄໍາຜາຍ ສະພັງເໜືອ, ຫົວໜ້າການເມືອງໂຮງຮຽນທິດສະດີການເມືອງກອງທັບ, ຊຶ່ງມີບັນດາຫົວໜ້າ, ຮອງຫົວໜ້າ ຫ້ອງການ, ກົມ, ສະຖາບັນ, ສາມອົງການຈັດຕັ້ງມະຫາຊົນ ຊາວໜຸ່ມ, ແມ່ຍິງ, ກຳມະບານ ພາຍໃນ ກວຕ ພ້ອມດ້ວຍ ນາຍ ແລະ ພົນທະຫານ ພາຍໃນໂຮງຮຽນດັ່ງກ່າວເຂົ້າຮ່ວມ.