ຄໍາ-ນໍ້າມັນດິບໃນຕະຫຼາດໂລກແພງຂຶ້ນຈາກບັນຫາການເມືອງ

716

ລາຄາຄໍາໃນຕະຫຼາດໂລກຂຶ້ນສູງສຸດນັບຕັ້ງແຕ່ປີ2013,ຂະນະທີ່ລາຄານໍ້າມັນດິບເບຣນສ້າງສະຖິຕິສູງທີ່ສຸດໃນຮອບ3ເດືອນສະແດງໃຫ້ເຫັນເຖິງຄວາມກັງວົນຂອງນັກລົງທຶນຕໍ່ສະຖານະການຄວາມເຄັ່ງຕຶງທາງການເມືອງລະຫວ່າງອາເມຣິກາກັບອີຣານວ່າອາດຈະຮ້າຍແຮງກາຍເປັນສົງຄາມ.

ດ້ານລາຄາຄໍາໃນຕະຫຼາດໂລກຂຶ້ນເຖິງ1.588,13ໂດລາຕໍ່ອອນໃນໄລຍະໜຶ່ງຂອງການຊື້ຂາຍເມື່ອວັນຈັນທີ່ຜ່ານມາຖືເປັນສະຖິຕິສູງສຸດນັບຕັ້ງແຕ່ເດືອນ ເມສາປີ2013ເຊິ່ງການຊື້ຂາຍຄໍາຖືເປັນໜຶ່ງໃນຊັບສິນປອດໄພຂອງນັກລົງທຶນທົ່ວໂລກເຊິ່ງບົ່ງບອກເຖິງຄວາມກັງວົນຂອງຕະຫຼາດທີ່ມີຕໍ່ສະຖານະການໃນຕາເວັນອອກກາງ.

ສ່ວນສັນຍາຊື້ຂາຍນໍ້າມັນດິບເບຣນທະເລເໜືອລອນດອນງວດສົ່ງມອບເດືອນ ມີນາເພີ່ມຂຶ້ນມາຢູ່ທີ່70,74ໂດລາຕໍ່ບາເຣວໃນໄລຍະໜຶ່ງຂອງການຊື້ຂາຍເມື່ອວັນຈັນເຊັ່ນກັນສູງທີ່ສຸດນັບຕັ້ງແຕ່ເດືອນ ກັນຍາປີກ່ອນ.

ທັງນີ້,ສະຖານະການຄວາມເຄັ່ງຕຶງທາງການເມືອງໃນຕາເວັນອອກກາງຂຶ້ນສູ່ລະດັບສູງສຸດໃນຮອບຫຼາຍທົດສະວັດຈາກການທີ່ກອງທັບອາເມຣິກາໂຈມຕີທາງອາກາດໃກ້ສະໜາມບິນສາກົນໃນນະຄອນຫຼວງ ແບັກແດດຂອງປະເທດ ອີຣັດເມື່ອອາທິດທີ່ຜ່ານມາສັງຫານນາຍພົນອີຣານຄົນສໍາຄັນ.