ນ້ຳຖ້ວມໃນປະເທດອິນໂດເນເຊຍ ມີຜູ້ເສຍຊີວິດແລ້ວ 4 ຄົນ

435

ຝົນຕົກໜັກໝົດມື້ ໃນວັນສົ່ງທ້າຍປີເກົ່າຕ້ອນຮັບປີໃໝ່ ວັນທີ 31 ທັນວາ ສົ່ງຜົນໃຫ້ນໍ້າຖ້ວມໃນຫຼາຍພື້ນທີ່ນະຄອນຫຼວງອິນໂດເນເຊຍ ມີຜູ້ເສຍຊີວິດຢ່າງໜ້ອຍ ມີ 4 ຄົນ.

ສຳນັກຂ່າວເອເອັຟພີ ລາຍງານຈາກນະຄອນຫຼວງຈາກາຕ້າ ປະເທດອິນໂດເນເຊຍ ເມື່ອວັນທີ 1 ມັງກອນ ວ່າ ໄຟຟ້າຖືກຕັດ ໃນຫຼາຍຮ້ອຍຈຸດທົ່ວນະຄອນຫຼວງຈາກາຕ້າ ເມືອງທີ່ມີປະຊາຊົນອາໄສຢູ່ ປະມານ 30 ລ້ານຄົນ ເມື່ອວັນພຸດ ຫຼັງຈາກນໍ້າຖ້ວມຂັງເລິກຈາກຝົນຕົກໜັກໝົດມື້ ເຊິ່ງກ່ອນໜ້າທີ່ນ້ຳຈະຖ້ວມຍັງເຮັດໃຫ້ລົດໄຟໂດຍສານບາງເສັ້ນທາງໂຈະການໃຫ້ບໍລິການ ແລະ ສະໜາມບິນຮາລິມ ເຊິ່ງໃຫ້ບໍລິການທັງດ້ານໂດຍສານ ແລະ ຍົນທະຫານ ນໍ້າຖ້ວມຣັນເວຕ້ອງປິດຊົ່ວຄາວ ຫຼາຍຖ້ຽວບິນຕ້ອງປ່ຽນໄປລົງຈອດທີ່ສະໜາມບິນນານາຊາດໂຊກາຣ໌ໂນ-ຮັດຕາ ສະໜາມບິນໃຫຍ່ຂອງນະຄອນຫຼວງຈາກາຕ້າ.

ທ່ານຊູເບໂຈ ຜູ້ອຳນວຍການຫ້ອງການຄຸ້ມຄອງໄພພິບັດຂອງນະຄອນຫຼວງຈາກາຕ້າ ກ່າວວ່າ ມີຜູ້ເສຍຊີວິດຢ່າງໜ້ອຍ 4 ຄົນ ເຊິ່ງຜູ້ທຳອິດ ເປັນເດັກອາຍຸ 16 ປີ ຖືກໄຟຟ້າຊັອດ ອີກ 3 ຄົນ ເກີດຈາກອຸນຫະພູມໃນຮ່າງກາຍຕໍ່າກວ່າປົກກະຕິ ໃນຈຳນວນນີ້ ມີຄູ່ຜົວເມຍຜູ້ສູງອາຍຸ ທີ່ອາໄສຢູ່ເຮືອນສ່ວນໂຕທີ່ຖືກນ້ຳຖ້ວມຂັງເລິກ ປະມານ 4 ແມັດ. ນອກຈາກນີ້, ຍັງມີລາຍງານຜູ້ເສຍຊີວິດອີກ 3 ຄົນ ຈາກດິນເທິງພູເຈື່ອນລົງມາທັບຖົມບ້ານເຮືອນໃນເມືອງຊິເນເຣ ແຂວງຊະວາຕາເວັນຕົກ.

ນະຄອນຫຼວງຈາກາຕ້າຖືກນໍ້າຖ້ວມເປັນປະຈຳ ໃນໄລຍະລະດູຝົນຂອງອິນໂດເນເຊຍ ເຊິ່ງເລີ່ມໃນທ້າຍເດືອນພະຈິກຂອງທຸກໆປີ ໄພນ້ຳຖ້ວມເປັນໜຶ່ງໃນສາເຫດຫຼັກທີ່ລັດຖະບານ ນຳໂດຍປະທານາທິບໍດີໂຈໂຄ ວິໂດໂດ ຕັດສິນໃຈຍ້າຍນະຄອນຫຼວງ ເພື່ອໄປສ້າງໃໝ່ ທີ່ແຂວງກາລິມັນຕັນຕາເວັນອອກ ເທິງເກາະບໍນຽວ ຝັ່ງກົງຂ້າມທະເລຊະວາ ທາງທິດເໜືອຂອງຈາກາຕ້າ ໂດຍໂຄງການກໍ່ສ້າງມູນຄ່າ 33 ຕື້ ໂດລາ (ຫຼາຍກວ່າ 2,9 ແສນຕື້ກີບ) ຈະເລີ່ມຕົ້ນໃນປີ 2024.