ສຳມະນາ ການນຳໃຊ້ເຕັກໂນໂລຊີດິຈິຕ໋ອລ ໃນຍຸກ 4.0

502

ກົມເຕັກໂນໂລຊີດິຈິຕ໋ອລ ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມສຳມະນາ ໃນຫົວຂໍ້ “ສະພາບການພັດທະນາ ແລະ ການນໍາໃຊ້ເຕັກໂນໂລຊີດິຈິຕ໋ອນ ໃນຍຸກ 4.0 ເຂົ້າໃນການພັດທະນາເສດຖະກິດສັງຄົມຂອງ ສປປ ລາວ ແລະ ເຜີຍແຜ່ການນຳໃຊ້ບັນດາຊອບແວຣ໌ຂອງໂຄງການຄົ້ນຄວ້າວິທະຍາສາດ”.

ຈຸດປະສົງກໍ່ເພື່ອເຜີຍແຜ່ ແລະ ສ້າງຄວາມເຂົ້າໃຈໃຫ້ຜູ້ເຂົ້າຮ່ວມເຫັນໄດ້ກ່ຽວກັບບົດບາດ, ຄວາມໝາຍຄວາມສໍາຄັນ ແລະ ທິດທາງແນວໂນ້ມການພັດທະນາ-ການນຳໃຊ້ເຕັກໂນໂລຊີດິຈິຕ໋ອລເຂົ້າໃນການຜະລິດ, ນໍາໃຊ້ເຂົ້າໃນການດໍາລົງຊີວິດປະຈໍາວັນ, ຍົກສູງປະສິດທິພາບຂອງການປະຕິບັດວຽກງານເຂົ້າໃນການຄຸ້ມຄອງ-ບໍລິຫານລັດໃນຍຸກອຸດສາຫະກໍາ 4.0 ນີ້.

ໃນກອງປະຊຸມສຳມະນາດັ່ງກ່າວ, ຜູ້ເຂົ້າຮ່ວມໄດ້ຮັບຟັງການນຳສະເໜີ ແລະ ບັນຍາຍຈາກບັນດານັກວິທະຍາກອນທີ່ມີບົດຮຽນ ແລະ ປະສົບການຈາກກົມເຕັກໂນໂລຊີດິຈິຕ໋ອລ ກ່ຽວກັບການຄຸ້ມຄອງ-ບໍລິຫານລັດແບບດິຈິຕ໋ອນ.

ຄຽງຄູ່ກັນນັ້ນ, ຍັງໄດ້ຮັບຟັງກ່ຽວກັບການພັດທະນາ ແລະ ການນຳໃຊ້ເຕັກໂນໂລຊີດິຈິຕ໋ອລເຂົ້າໃນການຜະລິດ, ການຄ້າ ແລະ ບໍລິການສັງຄົມ ເຊັ່ນ: ລະບົບອິນເຕີເນັດແຫ່ງຊັບພະສີ່ງ (loT: Internet of Thing), ຖານຂໍ້ມູນມະຫາສານ (Big Data), ລະບົບຄັງຂໍ້ມູນ (Cloud Computing), ປັນຍາປະດິດ (AI: Artificial Intelligence) ແລະ ລະບົບຖານຂໍ້ມູນຜູກພັນ (Block Chain). ລະບົບກອງປະຊຸມທາງໄກ, ລະບົບຄຸ້ມຄອງຊັບສິນ, ລະບົບຄຸ້ມຄອງພະນັກງານ, ລະບົບນັບຄະແນນສຽງ, ລະບົບເອກະສານຂາເຂົ້າ-ຂາອອກ ແລະ ອື່ນໆ ເປັນຕົ້ນ.

ພິເສດໄປກວ່ານັ້ນ, ຜູ້ເຂົ້າຮ່ວມຍັງໄດ້ຮັບຟັງການນໍາສະເໜີສູນຂໍ້ມູນດິຈິຕ໋ອນ (DATA CENTER) ຂອງກະຊວງວິທະຍາສາດ ແລະ ເຕັກໂນໂລຊີ ຊຶ່ງເປັນພື້ນຖານໂຄງລ່າງທີ່ສໍາຄັນໃນການພັດທະນາອຸດສະຫະກຳດິຈິຕ໋ອລຂອງລາວ ເຊິ່ງການສ້າງຕັ້ງສູນດັ່ງກ່າວເປັນການປະກອບສ່ວນທີ່ສຳຄັນຂອງການຫັນເປັນອຸດສະຫະກຳ. ໂອກາດດຽວກັນນີ້, ຍັງໄດ້ມອບຄອມພິວເຕີໃຫ້ພະແນກວິທະຍາສາດ ແລະ ເຕັກໂນໂລຊີແຂວງວຽງຈັນ ເພື່ອຮັບໃຊ້ເຂົ້າໃນການປະຕິບັດວຽກງານ.

ງານສໍາມະນາດັ່ງກ່າວ, ຈັດຂຶ້ນໃນວັນທີ 27 ທັນວາ 2019 ຜ່ານມາ ທີ່ຫ້ອງວ່າການແຂວງວຽງຈັນ ໂດຍໃຫ້ກຽດເຂົ້າຮ່ວມເປັນຄະນະປະທານຂອງທ່ານ ແກ້ວນະຄອນ ໄຊສຸລຽນ ຫົວໜ້າກົມເຕັກໂນໂລຊີດິຈິຕ໋ອລ, ທ່ານ ບົວພັນ ສີວົງໄຊ ຮອງຫົວໜ້າຫ້ອງວ່າການແຂວງວຽງຈັນ, ທ່ານ ພົມມະລາ ນັນທະວົງ ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງວຽງຈັນ ພ້ອມດ້ວຍຜູ້ຕາງໜ້າຈາກ ພວຕ ນະຄອນຫຼວງວຽງຈັນ, ບັນດາພະແນກການ 18 ພະແນກອ້ອມຂ້າງແຂວງ ແລະ ບັນດາຫ້ອງການເມືອງ 4 ຕົວເມືອງເຂົ້າຮ່ວມ.