ກົມພັດທະນາການທ່ອງທ່ຽວ ກຽມສະຫຼອງແຊັມບານເຕະຍິງ ຊີງຂັນ ສຕລ ເສົານີ້ແບບບໍ່ມີຂໍ້ສົງໄສ

384

ການແຂ່ງຂັນບານເຕະຍິງ ຮຸ່ນທົ່ວໄປ ຊີງຂັນ ສຕລ ປະຈໍາປີ 2019 ມີ 7 ທີມເຂົ້າຮ່ວມການແຂ່ງຂັນ ໂດຍແຂ່ງຂັນພົບກັນໝົດ ເພື່ອຫາທີມທີ່ອັນດັບດີທີ່ສຸດເປັນແຊັມຂອງລາຍການ. ຜ່ານການແຂ່ງຂັນ 5 ອາທິດທີ່ຜ່ານມາ ປາກົດວ່າ: ກົມພັດທະນາການທ່ອງທ່ຽວ ສ້າງຜົນງານໂດດເດັ່ນຊະນະ 5 ນັດລວດມີ 15 ຄະແນນຢຶດທີມນໍາຕາຕະລາງຍິງໄປ 50 ປະຕູ ແລະ ບໍ່ເສຍປະຕູ. ຂະນະທີ່ອັນດັບ 2 ມະຫາວິທະຍາໄລ ວິທະຍາສາດ ສຸຂະພາບ ລົງ 5 ນັດມີ 12 ຄະແນນຍິງໄປ 33 ປະຕູ ແລະ ເສຍ 8 ປະຕູ.

ສ່ວນ ມສ ສາລາຄໍາ, ບໍລິສັດ ຈິນສີ ບໍລິການຂົນສົ່ງ, ເອັສຊີອີ ແລະ ມສ ໂຄກສີວິໄລ ອັນດັບ 3, 4, 5 ແລະ 6 ຕາມລໍາດັບມີ 6 ຄະແນນເທົ່າກັນ ໝົດລຸ້ນແຊັມເປັນທີ່ແນ່ນອນ ລວມເຖິງ ເຄພີເອັສ ເອັຟຊີ ມີ 3 ຄະແນນຢູ່ອັນດັບສຸດທ້າຍຂອງຕາຕະລາງ.

ຈາກສະຖານະການດັ່ງກ່າວ ເຮັດໃຫ້ ກົມພັດທະນາການທ່ອງທ່ຽວ ມີໂອກາດຈະໄດ້ສະຫຼອງແຊັມ ເຖິງວ່າຈະເສຍ ແລະ ອັນດັບ 2 ມະຫາວິທະຍາໄລ ວິທະຍາສາດ ສຸຂະພາບ ຕ້ອງການຊະນະສະຖານດຽວ ເພື່ອລຸ້ນແຊັມ. ຢ່າງໃດກໍຕາມ ປະຕູໄດ້ເສຍກໍຫ່າງກັນຮິບຮີ່ ເມື່ອກົມພັດທະນາການທ່ອງທ່ຽວ ມີປະຕູໄດ້ເສຍ +50 ໜ່ວຍ, ສ່ວນມະຫາວິທະຍາໄລ ວິທະຍາສາດ ສຸຂະພາບ ມີປະຕູໄດ້ເສຍ +25.

ສໍາລັບ ການແຂ່ງຂັນອາທິດສຸດທ້າຍຂອງບານເຕະຍິງລາຍການດັ່ງກ່າວ ຈະມີຂຶ້ນວັນເສົາ 21 ທັນວາ 2019 ດັ່ງນີ້:

– ເວລາ 09:30 ໂມງ ມສ ໂຄກສີວິໄລ ພົບ ບໍລິສັດ ຈັນສີ ບໍລິການຂົນສົ່ງ ທີ່ສະໜາມຫຍ້າທຽມ ສະຫະພັນບານເຕະແຫ່ງຊາດລາວ ( ສຕລ ) ສະໜາມ 1.

– ເວລາ 15:00 ໂມງ ກົມພັດທະນາການທ່ອງທ່ຽວ ພົບ ເຄພີເອັສທີ່ສະໜາມຫຍ້າທຽມ ສຕລ ສະໜາມ 1

– ເວລາ 15:00ໂມງ ມະຫາວິທະໄລວິທະຍາສາດສຸຂະພົບ ພົບ ມສ ສາລະຄຳ ທີ່ສະໜາມຫຍ້າທຽມ ສຕລ ສະໜາມ 2.

ແຫຼ໋ງທີ່ມາ​: ຂ່າວເສດຖະກິດການຄ້າ