ທ່ານເກຍເຮັດທຸລະກິດ40ກວ່າປີພ້ອມຊ່ວຍເຫຼືອສັງຄົມຈົນກາຍເປັນນັກພັດທະນາດີເດັ່ນແຫ່ງຊາດ

660

ພາຍຫຼັງສະຖາປານາ ສປປລາວ ທ່ານ ເກຍ ອູ໊ສິດທິເດດ ນັກພັດທະນາດີເດັ່ນແຫ່ງຊາດ, ເຈົ້າຂອງໂຮງງານຜະລິດນໍ້າດື່ມແລະນໍ້າກ້ອນໂລມາຄໍາ ກໍ່ກ້າວມາສູ່ເວທີການດໍາເນີນທຸລະກິດຈົນກ້າວເປັນນັກທຸລະກິດທີ່ມີຊື່ສຽງຂອງແຂວງສະຫັວນນະເຂດ.ທ່ານເກຍອູ໊ສິດທິເດດ ເກີດເມື່ອວັນທີ 5 ກໍລະກົດ 1957 ທີ່ບ້ານທ່າໂຂ່ງ ເມືອງເຊໂປນ ແຂວງສະຫວັນນະເຂດ,ເຊື້ອສາຍຈີນ,ສັນຊາດລາວ ປັດຈຸບັນເປັນເຈົ້າຂອງໂຮງງານຜະລິດນ້ຳດື່ມ ແລະ ນ້ຳກ້ອນ ໂລມາຄຳ, ບໍລິສັດອຸດົມຊັບກໍ່ສ້າງຂົວທາງ ແລະ ບໍລິສັດອຸດົມຊັບແຮ່-ຊາຍ, ນະຄອນໄກສອນພົມວິຫານ ແຂວງສະຫວັນນະເຂດ

ປະຫວັດຄວາມເປັນມາ ເສັ້ນທາງທີ່ຕົນໄດ້ເດີນຜ່ານໃນການດຳເນີນທຸລະກິດ,ເລີ່ມແຕ່ການຜະລິດຂະໜາດນ້ອຍ ຄ່ອຍຂະຫຍາຍຕົວເທື່ອລະກ້າວດັ່ງນີ້:ປີ1976 ໄດ້ລົງມາຢູ່ແຂວງສະຫວັນນະເຂດ ເປັນຜູ້ຮັບຈ້າງນຳເຖົ້າແກ່ພ້ອມໆກັບຊື້ເຄື່ອງຍ່ອຍໃຊ້ສອຍ,ເອົາເມືອໃຫ້ຄອບຄົວຂາຍຢູ່ບ້ານທ່າໂຂ່ງ ເມືອງເຊໂປນ.ປີ1977ໄດ້ຮັບຈ້າງຂົ້ວກາເຟໃຫ້ບໍລິສັດການຄ້າແຂວງ

ປີ1985ໄດ້ເຮັດໂຮງງານຕົ້ມເຫຼົ້າ90ໃຫ້ບໍລິສັດສະບຽງອາຫານແຂວງເພື່ອຕອບສະໜອງໃຫ້ໂຮງໝໍແຂວງ,ພ້ອມກັບລ້ຽງໝູ,ລ້ຽງງົວ.ປີ1987ໄດ້ຕັ້ງໂຮງງານຊອຍໄມ້,ເຮັດເຟີນີເຈີ້,ປີ1990ຂະຫຍາຍເປັນໂຮງງານເລື່ອຍໄມ້ຫຼັກ4,ປີ1996ຕົນເອງໄດ້ຢຸດເຊົາເຮັດໂຮງເລື່ອຍໄມ້ເນື່ອງຈາກຂ້າພະເຈົ້າຍັງມີພາລະປັບປຸງໂຮງງານນ້ຳກ້ອນທີ່ໄດ້ສັນຍາຊື້ຈາກລັດໃນປີ1989ໃນເງື່ອນໄຂສັນຍາໃຫ້ສືບຕໍ່ທຳການຜະລິດ.ດັ່ງນັ້ນ,ຈຶ່ງໄດ້ລົງທຶນປັບປຸງຊື້ເຄື່ອງຈັກຜະລິດນ້ຳກ້ອນແທ່ງ ແລະ ນ້ຳກ້ອນຫຼອດ ເຂົ້າມາຕິດຕັ້ງທຳການຜະລິດ

ເພື່ອຕອບສະໜອງຄວາມຕ້ອງການຂອງຜູ້ບໍລິໂພກ,ປັດຈຸບັນສາມາດຜະລິດນ້ຳກ້ອນແທ່ງ ແລະ ນ້ຳກ້ອນຫຼອດໄດ້ 300 ໂຕນຕໍ່ວັນ.ປີ 2006 ໄດ້ຊື້ເຄື່ອງຈັກຜະລິດນ້ຳດື່ມເຂົ້າມາຕິດຕັ້ງ, ມື້ໜຶ່ງຜະລິດໄດ້ 20 ມ3,ໄດ້ໃສ່ເຄື່ອງໝາຍການຄ້າ ປາໂລມາຄຳ.ໃນເມື່ອເຫັນຄວາມຕ້ອງການຂອງຜູ້ບໍລິໂພກ ຊົມໃຊ້ນ້ຳເພີ່ມຂຶ້ນ, ປີ 2012 ຈຶ່ງໄດ້ ຊື້ເຄື່ອງຈັກຜະລິດນ້ຳດື່ມຂະໜາດໃຫຍ່ຂຶ້ນ ແລະ ທັນສະໄໝ ເຂົ້າມາທົດແທນ,ສາມາດຜະລິດນ້ຳດື່ມໄດ້ວັນໜຶ່ງ 575 ມຕອບສະໜອງໃຫ້ຜູ້ບໍລິໂພກໄດ້ຢ່າງກວ້າງຂວາງພໍສົມຄວນ

ປີ2015 ໂຮງງານແຫ່ງນີ້ ຖືກຄັດເລືອກເປັນໂຮງງານຕົວແບບຂອງແຂວງ, ຂ້າພະເຈົ້າ ໄດ້ຖືກຄັດເລືອກໃຫ້ຂຶ້ນໄປລາຍງານຕໍ່ກອງປະຊຸມໃຫຍ່ ຂອງອົງຄະນະພັກແຂວງຊຸດທີ 8, ຫຼາຍສິບປີຜ່ານມາ, ຕົນໄດ້ຮັບການຍ້ອງຍໍຈາກອົງການຈັດຕັ້ງພັກ-ລັດຫຼາຍຂັ້ນ ແລະ ໃນວັນທີ 25 ທັນວາ 2015, ຂ້າພະເຈົ້າ ໄດ້ຮັບປະດັບຫຼຽນນາມມະຍົດ ນັກພັດທະນາດີເດັ່ນແຫ່ງຊາດ. ເພື່ອຕໍ່ຍອດຜົນງານການປະກອບສ່ວນໃນການສ້າງສາ ແລະ ພັດທະນາປະເທດຊາດ ທ່ານ ເກຍ ອູ໊ສິດທິເດດ ໄດ້ຕັດສິນໃຈ ຍື້ມືເຂົ້າມາຊ່ວຍປະຊາຊົນ ບ້ານຄໍາປາແໜ ແລະ ບ້ານປ່າກ້ວຍ ເຊິ່ງໄລຍະທີ1 ກຳນົດ 1ປີ (2016) ມີ 27 ຄອບຄົວ ຈໍານວນ174 ຄົນ

ມາຮອດເດືອນມີນາ – ມິຖຸນາ ປີ 2016 ກໍ່ໄດ້ຮັບການຊ່ວຍເຫຼືອເພີ່ມອີກ 50 ຄອບຄົວລວມເປັນ 77 ຄອບຄົວ, ຈຳນວນ 482 ຄົນ. ໄລຍະທີ 2 ກຳນົດ 2 ປີ (2017–2018).ຜ່ານການລົງມືພາປະຊາຊົນເຮັດຕົວຈິງໃນ3ປີ ໄດ້ໃຊ້ທຶນຂອງຕົນເອງ 15 ຕື້ກວ່າກີບ ເຮັດໃນ 18 ໜ້າວຽກຫຼັກໄດ້ເຮັດບັນລຸຈຸດປະສົງເປົ້າໝາຍ ຄາດໄວ້  ທີ່ໄດ້ເຊັນບົດບັນທຶກໄວ້ກັບອໍານາດການປົກຄອງເມືອງຈໍາພອນ.ນອກຈາກນັ້ນ ຍັງໄດ້ຮັບການຊ່ວຍເຫຼືອຈາກພາກສ່ວນຕ່າງໆ ບໍ່ວ່າຈະເປັນອົງການຈັດຕັ້ງຂອງພັກ-ລັດຖະບານ,ອົງການຈັດຕັ້ງມະຫາຊົນ ພາກທຸລະກິດຊາວຄ້າຂາຍ ທັງພາຍໃນ ແລະ ຕ່າງປະເທດ ມູນຄ່າ 7 ຕື້ກວ່າກີບ ລວມທັງໝົດ 22 ຕື້ກວ່າກີບ

ລ້າສຸດ ໂຮງງານຜະລິດນ້ຳດື່ມ ແລະ ນ້ຳກ້ອນ ໂລມາຄຳ ກໍ່ໄດ້ຮັບລາງວັນປະກອບສ່ວນໃນການພັດທະນາສັງຄົມ (CSR) ໄດ້ຮັບທີ່ນະຄອນຫຼວງວຽງຈັນ ສປປ ລາວ ໃນວັນທີ 4 ຕຸລາ 2019 ແລະ ບາງກອກ ປະເທດໄທ ວັນທີ 2 ພະຈິກ 2019, ລາງວັນ ຕົວແບບໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ (RDPE) ໄດ້ຮັບທີ່ ເນປີດໍ ປະເທດມຽນມາ ໃນວັນທີ 8 ພະຈິກ 2019

ຂໍ້ມູນຈາກໜັງສືພິມເສດຖະກິດການຄ້າ