ກຽມເສື້ອກັນໜາວ ເຮັດຮ່າງກາຍໃຫ້ອົບອຸ່ນ! ວັນທີ 3 ຫາ 10 ທັນວານີ້ ອຸນຫະພູມຫຼຸດລົງ 5-7 ອົງສາ

517

ໄລຍະວັນທີ 3 ຫາ 10 ທັນວານີ້ ເຂດແຂວງພາກເໜືອ ອຸນຫະພູມຈະຫຼຸດລົງ 5-7 ອົງສາ, ຂະນະທີ່ພາກກາງ ແລະ ພາກໃຕ້ ອຸນຫະພູມຈະຫຼຸດລົງ 3-5 ອົງສາ.

ກົມອຸຕຸນິຍົມ ແລະ ອຸທົກກະສາດ ອອກແຈ້ງເຕືອນໄພອາກາດໜາວເຢັນ ເລກທີ 1748 /ກອຕທ, ນະຄອນຫຼວງວຽງຈັນ, ວັນທີ 3 ທັນວາ 2019 ວ່າ: ໃນໄລຍະວັນທີ 3 ຫາ 10 ທັນວານີ້ ອາກາດໜາວເຢັນ ເນື່ອງຈາກວ່າມວນອາກາດໜາວເຢັນຈາກປະເທດຈີນໄດ້ມີກຳລັງແຮງເພີ່ມຂຶ້ນ ແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວດ້ວຍກຳລັງແຮງ, ສົມທົບກັບກະແສລົມຕາເວັນຕົກສ່ຽງເໜືອພັດປົກຄຸມເປັນສ່ວນໃຫຍ່ ໃນໄລຍະວັນທີ 4 ຫາ 10 ທັນວານີ້ ຈະເຮັດໃຫ້ອຸນຫະພູມຫຼຸດລົງ 5-7 ອົງສາ ອາກາດຈະໜາວເຢັນ ຫາ ໜາວເຢັນຫຼາຍ ພ້ອມມີໝອກປົກຫຸ້ມໃນຕອນເຊົ້າຢູ່ເຂດແຂວງພາກເໜືອ, ແຂວງໄຊສົມບູນ ແລະ ເຂດພູພຽງບໍລິເວນ. ສ່ວນພາກກາງ ແລະ ພາກໃຕ້ ອາກາດເຢັນ ຫາ ໜາວເຢັນ ພ້ອມມີໝອກບາງປົກຫຸ້ມໃນຕອນເຊົ້າ ແລະ ມີລົມພັດແຮງເປັນບາງໂອກາດ ອຸນຫະພູມຈະຫຼຸດລົງ 3-5 ອົງສາ.

ພ້ອມນີ້, ກົມອຸຕຸນິຍົມ ແລະ ອຸທົກກະສາດ ຍັງໄດ້ແຈ້ງເຕືອນເຖິງພໍ່ແມ່ປະຊາຊົນ ຢູ່ບັນດາແຂວງຕ່າງໆໃຫ້ມີສະຕິລະມັດລະວັງຕໍ່ສະພາບອາກາດໜາວເຢັນ ແລະ ມີລົມພັດແຮງ, ໃຫ້ຮັກສາສຸຂະພາບ, ນຸ່ງຫົ່ມໃຫ້ຮ່າງກາຍອົບອຸ່ນຢູ່ສະເໜີ ພ້ອມໃຫ້ຕິດຕາມຂ່າວພະຍາກອນອາກາດຢ່າງຕໍ່ເນື່ອງ.