ອະລັງການ…ບຸນກິນຈຽງແຂວງຊຽງຂວາງ

586

ບຸນກິນຈຽງ ພາສາລາວມົ້ງ ເອີ້ນວ່າ ນໍ່ເປ້ເຈົາ ຫຼື ບຸນກິນຈຽງ ເປັນບຸນປີໃໝ່ຂອງຊົນເຜົ່າລາວມົ້ງ ໃນ1 ປີ ເຜົ່າມົ້ງຈະກິນຈຽງຄັ້ງໜຶ່ງ ເຊິງເຂົາເຈົ້າຈະຈັດຂຶ້ນຢູ່ ທ້າຍປີ ຫຼື ຕົ້ນປີ ປະຈຸບັນຖືເອົາປະຕິທິນລາວທົ່ວໄປ ຖືເອົາມື້ 1 ຄໍ່າ ເດືອນຈຽງ ເປັນມື້ຕ້ອນຮັບປີໃໝ່ ຂອງຊົນເຜົ່າລາວມົ້ງເຊິ່ງມີຫຼາຍໄລຍະຂັ້ນຕອນແຕ່ໂດຍລວມແລ້ວຮີດຄອງບຸນກິນຈຽງ

ເຜົ່າມົ້ງ ຢູ່ ສປປ ລາວມີກິດຈະກຳ ມີຮີດຄອງປະເພນີຫຼາຍຂັ້ນຕອນ, ເຜົ່າມົ້ງຈະມີຫຼາຍແຊງທີ່ແຕກຕ່າງກັນ ການແຕ່ງກາຍກໍຕ່າງກັນ ແລະ ບຸນນີ້ແມ່ນຈັດຕາມວັນເວລາປະມານ 30ວັນ.
ສໍາລັບກິດຈະກຳພາຍໃນງານກໍຈະມີ ຊົນງົວ , ສະແດງການຟ້ອນ-ເຕັ້ນ ,ໂຍນໝາກຄອນ ,ເປົ່າແຄນ ແລະອື່ນໆ

ຕາມຮີດຄອງປະເພນີ ບຸນກິນຈຽງ ຂອງເຜົ່າມົ້ງ ເຊິ່ງລວມມີສອງສ່ວນ ໃນນີ້ ມີສ່ວນພິທີບູຊາເສັ້ນໄຫວ້ ບັນພະບູລຸດ, ຜູກຂໍ່ ຕໍ່ແຂນ ແລະ ອີກສ່ວນແມ່ນການລະຫຼິ້ນພື້ນບ້ານຄື: ໝູນໝາກຂ່າງ, ຍູ້ໄມ້ສ້າວ ແລະ ອື່ນໆ ເຊິ່ງສ້າງຄວາມປະທັບໃຈກວ່າໝູ່ແມ່ນການຫຼິ້ນໂຍນໝາກຄອນທີ່ມີຄວາມໝາຍແບບການເຊື່ອຖືສາສະໜາ ແລະ ຄວາມສົມບູນພູນສຸກຢ່າງແທ້ຈິງ, ຂໍຮ້ອງສິ່ງສັກສິດຈົ່ງບັນດານ ໃຫ້ທຸກຄົນມີສຸຂະພາບແຂວງແຮງ, ພືດພັນຈະເລີນງອກງາມ ແລະ ໃນບຸນດັ່ງກ່າວ ຍັງເປັນໂອກາດດີໃນການສະແຫວງຫາຄວາມຮັກມັກແພງຂອງບ່າວສາວມົ້ງອີກດ້ວຍ

ໃນບັນຍາກາດມ່ວນຊື້ນຂອງວັນບຸນກິນຈຽງ ນັບແຕ່ຍິງສາວບ່າວໜຸ່ມຕະຫຼອດຮອດຜູ້ເຖົ້າແກ່ ຕ່າງກໍ່ເຂົ້າຮ່ວມການຫຼິ້ນໂຍນໝາກຄອນ ແລະ ທີ່ເຫັນວ່າຈັບອົກຈັບໃຈກວ່າໝູ່ແມ່ນພາບຍິງສາວເຜົ່າມົ້ງ ນຸ່ງຊຸດກະໂປ່ງບານລວດລາຍຕ່າງໆພ້ອມກັບປະດັບເອ້ຍ້ອງດ້ວຍຫຼຽນເງິນ  ພ້ອມກັບອ້າຍບ່າວເຜົ່າມົ້ງ ໃນຊຸດໂສ້ງດໍາ ສາຍແອວດ້ວຍແພລາຍດອກ ຢືນເປັນສອງແຖວຍາວໂຍນໝາກຄອນໃຫ້ກັນ  ແລະ ກັນ ອ້າຍບ່າວໜຸ່ມຊົມຜູ້ສາວມົ້ງ ທັງໂຍນໝາກຄອນທັງຂັບລໍາປະສານສຽງແຄນຕາມຈັງຫວະການຟ້ອນລໍາ ສ້າງເປັນສຽງກະທົບສັ່ນແລັກແກັກຂອງປອກເງິນ, ກ້ອງຄໍຕາມຈັງຫວະບາດກ້າວເດິນ ໃນງານບຸນກິນຈຽງ, ບ່າວສາວຫຼາຍຄົນ ໄດ້ກາຍເປັນຄູ່ຄອງຊີວິດກັນນັບແຕ່ມື້ນັ້ນມາ.