ຟູດແພນດ້າ ມິຕິໃໝ່ຂອງການສັ່ງອາຫານພ້ອມສົ່ງເຖິງທີ່

719

ຟູດແພນດ້າ (foodpanda) ຜູ້ໃຫ້ບໍລິການຈັດສົ່ງອາຫານທີ່ມີສື່ສຽງລະດັບໂລກ ເຫັນວ່າເສດຖະ ກິດລາວເຕີບໂຕທຸກປີ ຈຶ່ງຕັດສິນໃຈຂະຫຍາຍທຸລະກິດມາລາວ ໂດຍສະເພາະແມ່ນບໍລິການຈັດສົ່ງອາ ຫານຕາມສັ່ງພ້ອມເຖິງທີ່ ພຽງແຕ່ສັ່ງຊື້ຜ່ານແອັບພລິເຄຊັ່ນຂອງຟູດແພນດ້າທ່ານຈະໄດ້ຮັບອາຫານສົດໃໝ່ພາຍໃນ 10-15 ນາທີ.

    ດ້ານຜູ້ອໍານວຍການເປີດເຜີຍ ປັດຈຸບັນມີຮ້ານຄ້າທີ່ຮ່ວມລາຍການ 300 ກວ່າຮ້ານ ແລະ ມີແຜນຂະຫຍາຍໄປຫຼວງພະບາງ ແລະ ຈໍາປາສັກ ໃນຕົ້ນປີ 2020. ຂະນະທີ່ທຸລະກິດດັ່ງກ່າວເນັ້ນ 3 ຜົນປະໂຫຍດຫຼັກ ຄື: ເປັນຄູ່ຮ່ວມທຸລະກິດ, ເປັນຜູ້ໃຫ້ບໍລິການ ແລະ ສ້າງວຽກເຮັດງານທຳທີ່ດີ.

ທ່ານ ນາງ ທັນຍາລັດ ຈະເລີນສຸກ ຜູ້ອຳນວຍການຟູດແພນດ້າລາວ ໃຫ້ສໍາພາດວ່າ: ຈຸດເດັ່ນຂອງຟູດແພນດ້າຕ່າງຈາກຄົນອື່ນແມ່ນເຮົານໍາໃຊ້ເທັກໂນໂລຊີທັນສະໄໝເຂົ້າມາຊ່ວຍຈັດການໃນທຸກໆຂັ້ນຕອນນັບແຕ່ລູກຄ້າສັ່ງຈົນເມນູໄປເຖິງຮ້ານຄ້າຮັບອາຫານ, ຂອດການຈັດສົ່ງ ແລະ ຈົນເຖິງມືລູກຄ້າ ເຊິ່ງທຸກຢ່າງຈະມີການຄິດໄລ່ຢູ່ໃນລະບົບແລ້ວວ່າຈະໃຊ້ເວລາເທົ່າໃດ? ແລະ ຈະຮອດມືລູກຄ້າຈັກນາທີ?.

ຄຽງຄູ່ກັນນັ້ນ,  ຈຸດເດັ່ນອີກຢ່າງໜຶ່ງແມ່ນເຮົາມີບໍລິການສົ່ງໄວກວ່າ, ມີຮ້ານທີ່ເຂົ້າຮ່ວມລາຍການຈໍານວນຫຼວງຫຼາຍຈະເຮັດໃຫ້ລູກຄ້າມີທາງເລືອກຫຼາຍກວ່າ.

ສໍາລັບເມນູທີ່ເປັນໄຮໄລຂອງຟູດແພນດ້າກໍ່ມີຫຼາຍຢ່າງ ເປັນຕົ້ນແມ່ນ: ອາຫານຕາມສັ່ງ ແລະ ປະເພດເຄື່ອງດື່ມທີ່ຫຼາກຫຼາຍໃນຈໍານວນ 300 ຮ້ານ;

ເວົ້າສະເພາະເມນູນທີ່ຂາຍດີອີງຕາມຕົວເລກສະຕິຖິຈະເປັນປະເພດອາຫານຕາມສັ່ງ, ສ່ວນລາຄາຂອງອາຫານແມ່ນສໍ່າກັບອາຫານທີ່ເຮົາຊື້ຮັບປະທານແບບທົ່ວໆໄປ. ສໍາລັບແຜນໃນປີ 2020 ເຊິ່ງໃນໄຕມາດ1 ຂອງປີຫນ້າຈະເປີດບໍລິການຢູ່ແຂວງຫຼວງພະບາງ ແລະ ຈໍາປາສັກ ຫຼັງຈາກນັ້ນຈະສືບຕໍ່ຂະຫຍາຍຕື່ມອີກຕາມແຜນແມ່ນໃຫ້ໄດ້ 8 ແຂວງທົ່ວປະເທດ.

ດ້ານທ່ານ ເຈຄັອບ ເຊບັດສະຕຽນ ແອັງເຈເລ (Jakob Sebastian Angele) ປະທານຜູ້ບໍລິຫານຂອງຟູດແພນດ້າ ປະຈຳພາກພື້ນອາຊີ-ປາຊີຟິກ ໃຫ້ສໍາພາດຕື່ມວ່າ: ຟູດແພນດ້າໄດ້ບໍລິການຢູ່ 9 ປະເທດໃນເຂດອາຊີ-ປາຊີຟິກ, ເຊິ່ງປະເທດລາວເປັນປະເທດທີ 9 ແລະ ເຫດຜົນທີ່ຂະຫຍາຍມາລາວກໍ່ຍ້ອນເສດຖະກິດຂະຫຍາຍຕົວຕໍ່ເນື່ອງບວກກັບວັດທະນະທຳການບໍລິໂພກຖືວ່າເປັນໜ້າສົນໃຈ; ຟູດແພນ ດ້າເອງຈະບໍ່ເນັ້ນຕະຫຼາດໃຫຍ່ຫຼາຍ, ແຕ່ເຊື່ອວ່າທ່າແຮງຂອງເສດຖະກິດໃນອະນາຄົດຈະເຮັດໃຫ້ພວກເຮົາມີທ່າກ້າວເຊັ່ນກັນ.

ຟູດແພນດ້າ ໄດ້ມີການເປີດໂຕຢ່າງເປັນທາງການໃນວັນທີ 22 ພະຈິກ 2019 ຜ່ານມາ ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ ໃຫ້ກຽດເຂົ້າຮ່ວມຕັດແຖບຜ້າຂອງທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ-ໂທລະຄົມມະນາຄົມ ແລະ ການສື່ສານ, ມີບັນດາແຂກຖຶກເຊີນ ແລະ ດາລາ-ນັກຮ້ອງ ແລະ ບັນດາຮ້ານຄ້າເຂົ້າຮ່ວມຢ່າງຫຼວງຫຼາຍ.