ສະຫວັນສຸກຫັນສາເປີດແລ້ວ ສ່ວນນັກທ່ອງທ່ຽວຈີນມາທ່ຽວສະຫວັນນະເຂດ1.799 ຄົນ

559

ງານເທສະການ ສະຫວັນສຸກສັນຫັນສາ ແມ່ນເປັນເທສະການທຳອິດ ຫຼື ເປັນເທສະການທ່ອງທ່ຽວທີ່ຍິ່ງໃຫຍ່ຄັ້ງປະຫວັດສາດຂອງນະຄອນໄກສອນ ພົມວິຫານ ກໍ່ຄືແຂວງສະຫວັນນະເຂດກະວ່າໄດ້ ງານທ່ອງທ່ຽວຄັ້ງນີ້ ມັນໄດ້ສ້າງຄວາມຕື່ນຕາ,ຕື່ນໃຈ ແລະ ສ້າງຄວາມເບີກບານມ່ວນຊື່ນໃຫ້ກັບນັກທ່ອງທ່ຽວທັງພາຍໃນ ແລະ ຕ່າງປະເທດເປັນຈຳນວນບໍ່ໜ້ອຍ ເຊິ່ງງານເທສະການ ສະຫວັນສຸກສັນຫັນສາ ໄດ້ຈັດຂຶ້ນ ແລະ ສຳເລັດລົງໃນລະຫວ່າງວັນທີ 22 – 24 ພະຈິກ 2019 ນີ້ ຢູ່ທີ່ຕະຫຼາດສະຫວັນກາງຄືນນະຄອນໄກສອນ ພົມວິຫານ

ໂດຍ ການເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍຄະນະ,ເຈົ້ານະຄອນໄກສອນ ພົມວິຫານ ມີບັນດາທ່ານເຈົ້າເມືອງ, ຫົວໜ້າພະແນກການ, ກົງສູນໃຫຍ່ແຫ່ງ ສສ ຫວຽດນາມ, ກົງສູນໃຫຍ່ແຫ່ງລາຊະອານຈັກໄທ, ພ້ອມດ້ວຍມວນຊົນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າຮ່ວມຢ່າງຄຶກຄື້ນມ່ວນຊື່ນ.

ທ່ານ ແສງທອງ ວັງແກວມະນີ ເຈົ້ານະຄອນ ໄກສອນ ພົມວິຫານ ໄດ້ລາຍງານວ່າ: ງານເທສະການສະຫວັນສຸກສັນຫັນສາປະກອບມີນະຄອນ ໄກສອນ ພົມວິຫານ, ພະແນກ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ບໍລິສັດອິນທິລາ ກຣຸບ, ບໍລິສັດທ່ອງທ່ຽວ ໂກນເດີ້ນແລນ, ບໍລິສັດ sk ເຕັກໂນໂລຊີແລະ ຮ້ານອາຫານ ສະຫວັນສໍາລານ ແລະ ພາກສ່ວນອື່ນໆ ໄດ້ພ້ອມພຽງກັນ ຈັດງານສະຫວັນສຸກສັນຫັນສາຂຶ້ນເປັນຄັ້ງທໍາອິດຢູ່ນະຄອນໄກສອນ ພົມວິຫານ ຈຸດປະສົງຂອງການຈັດງານຄັ້ງນີ້ກໍ່ເພື່ອ ສົ່ງເສີມການທ່ອງທ່ຽວໃນເຂດຕົວເມືອງເກົ່າຂອງນະຄອນໄກສອນ ພົມວິຫານ ເຊິ່ງເປັນເຂດອະນຸລັກສະຖານປັດຕະຍະກໍາໃນຍຸກອານານິຄົມປະສົມປະສານສະໄໝປັດຈຸບັນ ເຊິ່ງມີບັນຊີອະນຸລັກເຮືອນເກົ່າເກືອບ 200 ຫລັງ ໃຫ້ກາຍເປັນມົນສະເຫນ່ດຶງດູດນັກທ່ອງທ່ຽວ ທັງພາຍໃນແລະຕ່າງປະເທດມາທ່ຽວຊົມ ແລະ ຮ່ວມກິດຈະກໍາຕ່າງໆຂອງງານທັງເປັນການກະຕຸ້ນເສດຖະກິດ ສົ່ງເສີມການຜະລິດການຄ້າເພີ່ມລາຍຮັບໃຫ້ແກ່ປະຊາຊົນ, ຜູ້ປະກອບການຕ່າງໆ ແລະ ເປັນການອະນຸລັກຮັກສາ ມູນເຊື້ອວັດທະນະທໍາອັນດີງານຂອງຊາດຂອງເຜົ່າທີ່ເປັນມໍລະດົກຕົກທອດໃຫ້ລູກຫລານສືບສານຕໍ່ກັນໄປ.

ສໍາລັບຜູ້ ທີ່ມາທ່ຽວງານເທສະການສະຫວັນສຸກສັນຫັນສາ ແມ່ນໄດ້ສຳຜັດກັບຫຼາຍກິດຈະກໍາ ໂດຍສະເພາະແມ່ນທາງດ້ານກິລາ, ສິລະປະວັດທະນະທໍາ ສະຖາປັດຕະຍະກໍາ,ຮູບເງົາ,ດົນຕີ,ອາຫານ ແລະ ອື່ນໆທີ່ມີລັກສະນະຢ້ອນຍຸກສ່ອງແສງໃຫ້ເຫັນຄວາມຫລາກ ຫລາຍ,ອຸດົມສົມບູນທາງດ້ານວັດທະນະທໍາຂອງປະຊາຊົນລາວບັນດາເຜົ່າຕິດພັນກັບການພັດທະນາແຕ່ລະຍຸກແຕ່ລະສະໄໝ ຮ່ວມກິດຈະກໍາ ການຍ່າງເພື່ອສຸຂະພາບ,ຂີ່ລົດຖີບເກົ່າ,ຂີ່ສາມລໍ້, ຊົມການວາງສະແດງລົດບູຮານ, ຊົມຮູບເງົາດັງໃນອາດີດ, ຊົມປາລັດຕື້,ຊົມການສະແດງສິລະປະວັນນະຄະດີຈາກສິລະປິນທັງພາຍໃນ ແລະ ຕ່າງປະເທດ,ການນຸ່ງຖືຊຸດບັນດາເຜົ່າຢ້ອນຍຸກ, ການວາງສະແດງຮູບພາບ,ປະກວດຮູບແຕ້ມ,ຮູບຖ່າຍ,ຮ່ວມຊີມອາຫານພື້ນບ້ານ, ການເສວະນາສະຖາປັດຕະຍະກໍາເມືອງເກົ່າ ພ້ອມທັງມີການວາງສະແດງສິນຄ້າໂອດັອບ ແລະ ຜະລິດຕະພັນຫັດຖະກໍາຊາວບ້ານ ແລະ ກິດຈະກໍາອື່ນໆເຊິ່ງລວມ ມີທັງໝົດ 120 ບູດ ແລະ 4 ເວທີການສະແດງ ໃນຂອບເຂດຈັດງານແມ່ນບໍລິເວນຕະຫລາດກາງຄືນໄປຫາ ໂຮງຮູບເງົາລາວຈະເລີນ.

ຈາກນັ້ນ ທ່ານ ຄໍາພູນ ຕຸນໄພທູນ ກໍ່ໄດ້ມີຄຳເຫັນຕື່ມອີກວ່າ: ງານເທສະການສະຫວັນສຸກວັນຫັນສາຈັດຂຶ້ນ ເພື່ອເປັນການສົ່ງເສີມການທ່ອງທ່ຽວຕົວເມືອງເກົ່າ ນະຄອນໄກສອນ ພົມວິຫານ ແລະ ທັງເປັນການແນ່ໃສສົ່ງເສີມການທ່ອງທ່ຽວໃນໂອກາດທີ່ລັດຖະບານ ສ ປປ ລາວ ເປີດປີທ່ອງທ່ຽວລາວ-ຈີນ 2019 ແລະ ການທ່ອງທ່ຽວເຂດຕົວເມືອງເກົ່າໃຫ້ມີຄວາມຫລາກຫລາຍສີສັນທັງເປັນການກະຕຸກຊຸກຍູ້ການທ່ອງທ່ຽວພາຍໃນໃຫ້ ຫລາຍຂຶ້ນ ເຊິ່ງມາຮອດປັດຈຸບັນມີນັກທ່ອງທ່ຽວຈາກ ສປ ຈີນ ເຂົ້າມາທ່ຽວສະຫວັນນະເຂດ ໃນ 10 ເດືອນ ມີຈໍານວນ 1.799 ຄົນ

ຈາກນັ້ນ ທ່ານ ສັນຕິພາບ ພົມວິຫານ ພ້ອມບັນດາແຂກ ກໍ່ຮ່ວມກັນຕັດແທບຜ້າ ເພື່ອເປັນການເປີດງານເທສະການສະຫວັນສຸກສັນຫັນສາ ຢ່າງເປັນທາງການ ແລະ ຮ່ວມຊົມການສະແດງຊຸດບັນດາເຜົ່າຂອງ ແຂວງສະຫວັນນະເຂດ ຊົມການສະແດງສິລະປະວັນນະຄະດີ ແລະ ເດີນຊົມການວາງສະແດງ ສິນຄ້າ, ຮູບພາບ,ຮູບຖາຍ ແລະ ອື່ນໆ.

ຂໍ້ມູນ: ວິທະຍຸກະຈາຍສຽງສະຫວັນນະເຂດ