ທຳລາຍພືດຜັກນຳເຂົ້າບໍ່ຖືກຕ້ອງຕາມລະບຽບກົດໝາຍຫຼາຍກ່ວາ 1ໂຕນ

563

ໃນວັນທີ 7 ພະຈິກ 2019 ເຈົ້າໜ້າທີ່ພາສີປະຈຳຢູ່ດ່ານສາກົນມິດຕະພາບ ລາວ-ໄທ 1 ໄດ້ກວດພົບພຶດຜັກທີ່ນຳເຂົ້າບໍ່ຖືກຕ້ອງຕາມລະບຽບກົດໝາຍຈໍານວນຫຼາຍ

ເຊິ່ງເປັນຂອງທ້າວ ໂຕເລັກ ອາຍຸ 30 ປີ ບ້ານໜອງສະ ເມືອງນາຊາຍທອງ ນ.ວ ນຳເຂົ້າໂດຍລົດເມປະຈຳທາງ ອຸດອນ-ວຽງຈັນ ຈຳນວນ 12 ລາຍການ ໃນນັ້ນ ມີໝາກເຜັດ 350 ກິໂລ, ໝາກລິ້ນໄມ້ 20 ກິໂລ, ຫອມບົ່ວ 170 ກິໂລ, ດອກຜັກ100 ກິໂລ, ໝາກແຕງ 50 ກິໂລ, ໝາກງຸງ້ຽວ120 ກິໂລ, ໝາກຖົ່ວ 80 ກິໂລ, ໝາກຖົ່ວພູ 20 ກິໂລ, ຜັກກາດ 90 ກິໂລ, ໝາກຮະ 30 ກິໂລ, ຫົວຜັກກາດຂາວ 20 ກິໂລ ແລະ ເຜືອກ 20 ກິໂລ ລວມທັງໝົດ 1.070 ກິໂລກຣາມ

ສິນຄ້າດັ່ງກ່າວບໍ່ມີໃບອະນຸຍາດນຳເຂົ້າ, ບໍ່ມີໃບຢັ້ງຢືນດ້ານສຸຂະອະນາໄມ ແລະ ບໍ່ເສຍພາສີ ເຊິ່ງເຈົ້າໜ້າທີ່ກໍ່ໄດ້ແນະນຳໃຫ້ປະຕິບັດຕາມລະບຽບໃຫ້ຖືກຕ້ອງ ແຕ່ຜູ້ກ່ຽວບໍ່ມາຕິດຕໍ່ພົວພັນຈົນຮອດປັດຈຸບັນ.​

ດັ່ງນັ້ນ ພາກສ່ວນທີ່ກ່ຽວຂ້ອງ ຈຶ່ງໄດ້ນຳເອົາພຶດຜັກທີ່ຍຶດໄດ້ມາທຳລາຍຖິ້ມ ຢູ່ທີ່ສະຖານີກັກກັນພືດ ດົງໂພສີ ໃນຕອນບ່າຍຂອງວັນທີ 12 ພະຈິກຜ່ານມາ ໂດຍມີ ທ່ານ ວັນນາ ຄຳໂພໂຊ ຫົວໜ້າດ່ານປ້ອງກັນພືດ ສາກົນ ດົງໂພສີ, ທ່ານ ຄຳພັດ ສີລາວົງ ຮອງຫົວໜ້າດ່ານພາສີສາກົນຂົວມິດຕະພາບ 1 ພ້ອມດ້ວຍຜູ້ຕາງໝ້າອົງການອາຫານ ແລະ ຢາ, ຂະແໜງປູກຝັງ, ແພດປະຈຳດ່ານ ຕະຫຼອດຮອດພາກສ່ວນທີ່ກ່ຽວຂ້ອງເຂົ້າຮ່ວມ.

ທີ່ມາ: ສະຖານີວິທະຍຸໂທລະພາບ ນເຄອນຫຼວງວຽງຈັນ