ຊາວໜຸ່ມຈົ່ງເປັນເຈົ້າການ ປຸກລະດົມຈິດສຳນຶກຮັກສາຄວາມສະອາດແກ່ປະຊາຊົນທີ່ມາທ່ຽວໃນງານບຸນ

450

ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ ( ສຊປລ ) ໄດ້ເຂົ້າພົບປະ ແລະ ໂອ້ລົມຕໍ່ຄະນະຊາວໜຸ່ມອາສາສະໝັກຮັກສາ ຄວາມສະອາດໃນງານບຸນນະມັດສະການພະທາດຫຼວງວຽງຈັນ ເມື່ອວັນທີ 10 ພະຈິກ 2019 ທີ່ອະນຸສາວະລີນັກຮົບນິລະນາມ ໂດຍມີ ທ່ານ ຄຳສະຫວັນ ໂພດໄຊ ຮອງເຈົ້າເມືອງໄຊເສດຖາ, ທ່ານ ນາງ ສຸມາລີ ທຳມະວົງ ເລຂາຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວ ນະຄອນຫຼວງວຽງຈັນ ພ້ອມດ້ວຍບັນດາອາສາສະໝັກທົ່ວນະຄອນຫຼວງວຽງຈັນ ຈຳນວນ 600 ສະຫາຍເຂົ້າຮ່ວມ.

ໂອກາດນີ້ ທ່ານ ອາລຸນໄຊ ສູນນະລາດ ໄດ້ສະແດງຄວາມພາກພູມໃຈ ແລະ ຊົມເຊີຍຕໍ່ ຄວາມຫ້າວຫັນຂອງສະມາຊິກຊາວໜຸ່ມອາສາທັງຫຼາຍ ທີ່ເຂົ້າຮ່ວມກິດຈະກຳຂະບວນການຊາວໜຸ່ມຕະລຸມບອນ ເພື່ອຊ່ວຍເຫຼືອສັງຄົມໃນງານບຸນນະມັດສະການພະທາດຫຼວງວຽງຈັນ ປີ 2019 ພາຍໃຕ້ຄຳຂວັນ “ ຊາວໜຸ່ມຍຸກໃໝ່ໃສ່ໃຈຄວາມສະອາດ ”.

ທ່ານ ອາລຸນໄຊ ສູນນະລາດ ໄດ້ເນັ້ນ 3 ປະເດັນຫຼັກ ທີ່ຊາວໜຸ່ມອາສາສະໝັກທັງຫຼາຍຕ້ອງໄດ້ຈັດຕັ້ງປະຕິບັດຄື:

1 ໃຫ້ອາສາສະໝັກຊາວໜຸ່ມທັງຫຼາຍ ຈົ່ງພ້ອມໃຈກັນຊ່ວຍເຫຼືອ ແລະ ປຸກລະດົມຈິດສຳນຶກໃນການຮັກສາຄວາມສະອາດແກ່ປະຊາຊົນທີ່ມາທ່ຽວໃນງານບຸນໃນປີນີ້ໃຫ້ສົມກັບຄຳວ່າ “ ຊາວໜຸ່ມແມ່ນແຂນຂວາຂອງພັກ ແມ່ນກະດູກສັນຫຼັງຂອງຊາດ ເປັນຜູ້ສືບທອດພາລະກິດປະຕິວັດຢ່າງແທ້ຈິງ ” ເຮັດແນວໃດໃຫ້ພະທາດຫຼວງໃນງານບຸນມີຄວາມສະອາດຈົບງາມໃຫ້ສົມກັບເປັນປີທ່ອງທ່ຽວ ລາວ – ຈີນ, ເຮັດແນວໃດໃຫ້ບັນລຸ 6 ສ.

2 ຊາວໜຸ່ມມີພາລະບົດບາດທີ່ສຳຄັນທີ່ສຸດຂອງຊາດ ເຊິ່ງໄດ້ນາມມະຍົດເປັນ “ ແຂນຂວາຂອງພັກ ” ແລະ ເປັນ “ ຜູ້ສືບທອດພາລະກິດຂອງການປະຕິວັດ ” ເຊິ່ງໝາຍຄວາມວ່າເປັນຜູ້ທີ່ຈົງຮັກພັກດີທີ່ສຸດຕໍ່ປະເທດຊາດ ແລະ ກຽມພ້ອມສະເໝີໃນການຮັບໃຊ້ຊາດ. ສະນັ້ນ, ບັນດາສະຫາຍຕ້ອງພຽບພ້ອມໄປດ້ວຍຄຸນສົມບັດຫຼາຍປະການ ເປັນຕົ້ນຝຶກຝົນຫຼໍ່ຫຼອມຕົນເອງໃຫ້ຮັບປະກັນ 3 ຢ່າງ ຄື: ຕ້ອງເປັນຄົນທີ່ມີ ຄວາມຮູ້ໃນລະດັບແນ່ນອນທາງດ້ານການເມືອງ – ການປົກຄອງ, ຄວາມຮູ້ທາງດ້ານວິທະຍາສາດສະເພາະໃນຍຸກ 4.0 ແລະ ມີຄວາມຮູ້ທາງດ້ານສິ່ງແວດລ້ອມ, ຕ້ອງມີ ຄວາມສາມາດສູງ ເປັນຕົ້ນແມ່ນບັນດາທັກສະໃນການເວົ້າ, ການຄິດ, ການເບິ່ງບັນຫາ ແລະ ການຈັດຕັ້ງປະຕິບັດ, ຕ້ອງເປັນຄົນທີ່ມີຄຸນສົມບັດສິນທຳປະຕິວັດ, ຖ້າຫາກຂາດຄຸນສົມບັດເຖິງວ່າຈະມີຄວາມຮູ້ – ຄວາມສາມາດກໍໃຊ້ການບໍ່ໄດ້.

3 ບັນດາຊາວໜຸ່ມອາສາສະໝັກ ຕ້ອງເຂົ້າຮ່ວມຂະບວນການ ແລະ ປະຕິບັດໜ້າທີ່ໃຫ້ສຸດກົກສຸດປາຍ, ຕ້ອງເຕົ້າໂຮມຄວາມສາມັກຄີ ແລະ ສ້າງສາຍສຳພັນທີ່ດີຕໍ່ກັນ ເພື່ອພ້ອມກັນອາສາສະໝັກໃນວຽກງານຊາວໜຸ່ມຄັ້ງຕໍ່ໆໄປ ແລະ ຈົ່ງພ້ອມກັນມາຮັບໃຊ້ຊາດເມື່ອໃດທີ່ຊາດຕ້ອງການ. ພ້ອມກັນນັ້ນ, ສະມາຊິກຊາວໜຸ່ມທັງຫຼາຍຈົ່ງສືບຕໍ່ຝຶກຝົນຫຼໍ່ຫຼອມຕົນເອງ, ໃຫ້ຄິດສະເໝີວ່າເຮົາເປັນແຂນຂວາຂອງພັກ ແລະ ເປັນຜູ້ສືບທອດຂອງຊາດ.

( ຂ່າວ: ກາວຊົ່ງ; ຮູບ: ວິລະສັກ )

ທີ່ມາ: ໜັງສືພິມ ເສດຖະກິດ-ການຄ້າ