ໂຮງງານຊີມັງສາກົນຫົວພັນ – ອາງຊຶ ຈະທົດລອງຜະລິດໃນທ້າຍປີນີ້

399

ໂຮງງານຊີມັງສາກົນຫົວພັນ – ອາງຊຶ ເປັນກິດຈະການລົງທຶນຂອງ ບໍລິສັດ ຊີມັງສາກົນຫົວພັນ – ອາງຊຶ ຈຳກັດ ເຊິ່ງເປັນບໍລິສັດສັນຊາດຈີນ ໃນວົງເງິນລົງທຶນ 50 ລ້ານຢວນ ຫຼື 63 ຕື້ກີບ, ໂຮງງານຕັ້ງຢູ່ບ້ານກ້າງໂຄ້ງ ເມືອງວຽງໄຊ ແຂວງຫົວພັນ ປັດຈຸບັນໂຄງການກໍ່ສ້າງໄດ້ສຳເລັດແລ້ວ 90% ແລະ ຄາດວ່າຈະດຳເນີນການທົດລອງຜະລິດໃນທ້າຍປີ 2019 ນີ້.

ທ່ານ ໄຊຈົ້ງ ຫົວໜ້າໂຮງງານຊີມັງສາກົນຫົວພັນ – ອາງຊຶ ລາຍງານເມື່ອວັນທີ 7 ພະຈິກ 2019 ນີ້ວ່າ: ໂຄງການກໍ່ສ້າງໂຮງງານຊີມັງແຫ່ງນີ້ໄດ້ເລີ່ມລົງມືກໍ່ສ້າງມາແຕ່ທ້າຍປີ 2018 ໃນເນື້ອທີ່ 8,7 ເຮັກຕາ ເຊິ່ງປະກອບດ້ວຍໂຮງແຍກຫີນ, ໂຮງເກັບວັດຖຸດິບ, ໂຮງປະສົມຊີມັງ, ໂຮງບົດຊີມັງ, ຖັງເກັບຊີມັງ, ຫ້ອງຄວບຄຸມລະບົບເຮັດວຽກຂອງໂຮງງານ, ຫ້ອງຄວບຄຸມໄຟຟ້າ, ຫ້ອງວິໄຈ, ເຮືອນພັກຄົນງານ ແລະ ພື້ນຖານໂຄງລ່າງອີກຈຳນວນໜຶ່ງສຳເລັດແລ້ວ 100%. ສ່ວນການຕິດຕັ້ງລະບົບໂຮງໂມ້ຊີມັງແມ່ນຈະຕິດຕັ້ງໃຫ້ສຳເລັດໃນໄວໆນີ້ ເຊິ່ງເຄື່ອງອຸປະກອນຜະລິດຕ່າງໆແມ່ນນຳເຂົ້າມາຈາກ ສປ ຈີນ ແລະ ມາເຖິງໂຮງງານເປັນທີ່ຮຽບຮ້ອຍແລ້ວ.

ໂຮງງານແຫ່ງນີ້ສາຍການຜະລິດຊີມັງແມ່ນແນວເຕົາເຜົາແຫ້ງແບບໃໝ່ແບບລົມໝູນ 5 ລະດັບ ເຊິ່ງວັດຖຸດິບທີ່ຈະນຳມາປ້ອນໂຮງງານແມ່ນນຳໃຊ້ຊັບພະຍາກອນພາຍໃນປະເທດເປັນສ່ວນໃຫຍ່ ແລະ ຫຼັງຈາກໂຮງງານກໍ່ສ້າງ ແລະ ຕິດຕັ້ງສຳເລັດຄາດວ່າຈະມີກຳລັງຜະລິດໄດ້ສູງເຖິງ 2.500 ໂຕນຕໍ່ວັນ. ສ່ວນຂອບເຂດການບໍລິການແມ່ນຈະຈັດຈຳໜ່າຍຢູ່ພາຍໃນປະເທດ ໂດຍສະເພາະແມ່ນແຂວງຫົວພັນ ໃນມູນຄ່າໂຕນລະ 5 ແສນກວ່າກີບ. ນອກນັ້ນ, ຍັງມີແຜນສົ່ງອອກໄປຈຳໜ່າຍຢູ່ຕ່າງປະເທດຕື່ມອີກ.

( ຂ່າວ – ຮູບ: ໄອແກ້ວ )

ທີ່ມາ: ໜັງສືພິມ ເສດຖະກິດ-ການຄ້າ