2 ທະນາຄານ ຮ່ວມມືຮັບຊໍາລະຄ່າທໍານຽມທາງ ແລະ ຄ່າພາສີທີ່ດິນ

408

ທະນາຄານການຄ້າຕ່າງປະເທດລາວ ມະຫາຊົນ ( ທຄຕລ ) ແລະ ທະນາຄານ ເອັສທີ ຈໍາກັດ ໄດ້ເຊັນສັນຍາການຮ່ວມມື ວ່າດ້ວຍການບໍລິການຊໍາລະຄ່າທໍານຽມທາງ ແລະ ຄ່າພາສີທີ່ດິນ ຜ່ານລະບົບທະນາຄານ ເພື່ອຂະຫຍາຍການບໍລິການດັ່ງກ່າວໃຫ້ກວ້າງຂວາງອອກໃນຂອບເຂດທົ່ວປະເທດ. ຂະນະທີ່ການຈັດເກັບລາຍຮັບຄ່າທໍານຽມທາງແຕ່ປີ 2017 ຮອດປັດຈຸບັນໄດ້ຫຼາຍກວ່າ 216 ຕື້ກີບ, ສ່ວນພາສີທີ່ດິນນັບແຕ່ທ້າຍປີ 2018 ຮອດປັດຈຸບັນ ເກັບໄດ້ 9 ຕື້ກວ່າກີບ.

ທ່ານ ພູຂົງ ຈັນທະຈັກ ຜູ້ອໍານວຍການໃຫຍ່ ທຄຕລ ກ່າວວ່າ: ໂດຍປະຕິບັດຕາມນະໂຍບາຍຂອງລັດຖະບານ ໃນການຫັນເປັນທັນສະໄໝເຂົ້າໃນວຽກງານເກັບລາຍຮັບງົບປະມານ ທຄຕລ ໄດ້ຮ່ວມມືກັບກົມສ່ວຍສາອາກອນຄັ້ງທໍາອິດ ໂດຍການຮັບຊໍາລະຄ່າທໍານຽມທາງຜ່ານ ທຄຕລ ໃນທ້າຍປີ 2017 ເຊິ່ງໂຄງການດັ່ງກ່າວໄດ້ປະສົບຜົນສໍາເລັດ ແລະ ສາມາດເກັບລາຍຮັບເຂົ້າງົບປະມານລັດໄດ້ເປັນຢ່າງດີ ແລະ ເຊື່ອຖືຈາກສັງຄົມຢ່າງກວ້າງຂວາງ.

ສືບເນື່ອງຈາກຄວາມສຳເລັດຂອງໂຄງການດັ່ງກ່າວ ກົມສ່ວຍສາອາກອນ ກະຊວງການເງິນ ແລະ ທຄຕລ ຈຶ່ງໄດ້ຮ່ວມມືກັນໃນໂຄງການຮັບຊຳລະຄ່າພາສີທີ່ດິນຜ່ານລະບົບທະນາຄານ ຕາມຂໍ້ຕົກລົງສະບັບເລກທີ 1630/ກງ ລົງວັນທີ 31 ພຶດສະພາ 2018 ທີ່ມອບໃຫ້ ທຄຕລ ເປັນໃຈກາງໃນການພັດທະນາລະບົບຮັບຊໍາລະຄ່າພາສີທີ່ດິນຜ່ານລະບົບທະນາຄານ ເຊິ່ງ ທຄຕລ ກໍໄດ້ສຸມໃສ່ການກະກຽມຄວາມພ້ອມໃນທຸກດ້ານ ເປັນຕົ້ນແມ່ນ: ການພັດທະນາລະບົບ, ການອອກຄຳແນະນຳ ແລະ ນິຕິກຳທີ່ກ່ຽວຂ້ອງ ລວມທັງຈັດຝຶກອົບຮົມການນຳໃຊ້ລະບົບໃຫ້ກັບພະນັກງານ ເພື່ອຮອງຮັບການບໍລິການດັ່ງກ່າວໄດ້ຢ່າງມີປະສິດທິຜົນ.

ເມື່ອເດືອນທັນວາ 2018 ຜ່ານມາ ທຕຄລ ໄດ້ເຊັນສັນຍາກັບ 7 ທະນາຄານທຸລະກິດໃນລາວ ໃຫ້ເປັນຕົວແທນໃນການຮັບຊໍາລະຄ່າທໍານຽມທາງ ແລະ ຄ່າພາສີທີ່ດິນ ເຊັ່ນ: ທະນາຄານສົ່ງເສີມກະສິກໍາ, ທະນາຄານຮ່ວມທຸລະກິດ ລາວ – ຫວຽດ, ທະນາຄານພັດທະນາລາວ, ທະນາຄານຮ່ວມພັດທະນາ, ທະນາຄານ ລາວ – ຈີນ, ທະນາຄານໄອຊີບີຊີ ແລະ ທະນາຄານອິນໂດຈີນ.

ທ່ານກ່າວຕື່ມວ່າ: ຜ່ານການຈັດຕັ້ງປະຕິບັດບໍລິການຮັບຊໍາລະຄ່າທໍານຽມທາງຜ່ານລະບົບທະນາຄານ ແຕ່ປີ 2017 ຮອດປັດຈຸບັນສາມາດເກັບລາຍຮັບເຂົ້າງົບປະມານໄດ້ຫຼາຍກວ່າ 216 ຕື້ກີບ ແລະ ເກັບພາສີທີ່ດິນເຂົ້າງົບປະມານ ນັບແຕ່ທ້າຍປີ 2018 ຮອດປັດຈຸບັນສາມາດເກັບລາຍຮັບໄດ້ 9 ຕື້ກວ່າກີບ.

ໂອກາດນີ້, ທ່ານ ຈິຣັດຊະນຸດ ອຳຍົງ ຜູ້ອຳນວຍການທະນາຄານ ເອັສທີ ຈໍາກັດ ກ່າວຕື່ມວ່າ: ຮູ້ສຶກເປັນກຽດຢ່າງຍິ່ງທີ່ໄດ້ຮ່ວມມືກັບ ທຄຕລ ໃນການຮັບຊຳລະຄ່າທຳນຽມທາງ ແລະ ພາສີທີ່ດິນ ເຊິ່ງຈະເປັນການເພີ່ມຊ່ອງທາງອໍານວຍຄວາມສະດວກໃຫ້ແກ່ສັງຄົມກໍຄືລູກຄ້າຂອງສອງທະນາຄານ ທັງເປັນການຜັນຂະຫຍາຍນະໂຍບາຍຂອງລັດຖະບານຫັນເປັນທັນສະໄໝ ເພື່ອເຮັດໃຫ້ການເກັບລາຍຮັບເຂົ້າງົບປະມານຂອງລັດຫຼາຍຂຶ້ນ.

ພິທີເຊັນສັນຍາດັ່ງກ່າວຈັດຂຶ້ນໃນຕອນແລງວັນທີ 6 ພະຈິກ 2019 ຜ່ານມາ ທີ່ສໍານັກງານໃຫຍ່ ທະນາຄານເອັສທີ ຈໍາກັດ ເຊິ່ງເປັນການລົງນາມຮ່ວມກັນຂອງ ທ່ານ ພູຂົງ ຈັນທະຈັກ ຜູ້ອໍານວຍການໃຫຍ່ ທຄຕລ ແລະ ທ່ານ ຈິຣັດຊະນຸດ ອຳຍົງ ຜູ້ອຳນວຍການ ທະນາຄານເອັສທີ ຈໍາກັດ, ໃຫ້ກຽດເຂົ້າຮ່ວມເປັນສັກຂີພິຍານໂດຍຄະນະຜູ້ບໍລິຫານ ພ້ອມດ້ວຍພະນັກງານຂອງທັງສອງຝ່າຍ.

[ ຂ່າວ – ຮູບ: ສົມສະຫວິນ ]

ທີ່ມາ: ໜັງສືພິມ ເສດຖະກິດ-ການຄ້າ