ວາງສີລາລືກ 2 ໂຄງການ ຢູ່ເຂດເສດຖະກິດສະເພາະບຶງທາດຫຼວງ

400

ພິທີວາງສີລາລືກ ໂຄງການກໍ່ສ້າງສູນການຄຸ້ມຄອງບໍລິຫານເຂດບຶງທາດຫຼວງ, ໂຄງການວຽງຈັນນະຄອນສີຂຽວ  ແລະ ພິທີເປີດໂຮງແຮມໂປລີວຽງຈັນ ໄດ້ມີຂຶ້ນໃນວັນທີ 5 ພະຈິກ 2019 ທີ່ເຂດເສດຖະກິດສະເພາະບຶງທາດຫຼວງ ນະຄອນຫຼວງວຽງຈັນ ໂດຍການເຂົ້າຮ່ວມ ທ່ານ ສິນລະວົງ    ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ຈຳປາ ຄໍາສຸກໃສ ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ ແລະ ພາກສ່ວນທີ່ກ່ຽວເຂົ້າຮ່ວມ.

ທ່ານ ນາງ ຄຳຈັນ ວົງແສນບຸນ ຮອງລັດຖະມົນຕີກະຊວງແຜນການ ແລະ ການລົງທຶນ ກ່າວວ່າ: ກິດຈະການກ່ຽວກັບສູນກາງອາຄານນະຄອນສີຂຽວ, ຕະຫຼາດກະສິກຳ ແລະ ໂຮງແຮມແຫ່ງນີ້ ໄດ້ລະບຸຢູ່ໃນສັນຍາຮ່ວມມືພັດທະນາເຂດເສດຖະກິດສະເພາະບຶງທາດຫຼວງ ລະຫວ່າງ ກຸ່ມບໍລິສັດ ຫວານເຟີງຊຽງໄຮ້ ສປ ຈີນ ກັບ ລັດຖະບານ ສປປ ລາວ ໃນວັນທີ 28 ທັນວາ 2011 ແລະ ແຜນແມ່ບົດການພັດທະນາເຂດເສດຖະກິດສະເພາະບຶງທາດຫຼວງ ເຊິ່ງໄດ້ຮັບສິດການພັດທະນາທີ່ດິນກວມເອົາເນື້ອທີ່ 365 ເຮັກຕາ ແລະ ທັງໄດ້ສິດການນໍາໃຊ້ທີ່ດິນ 99 ປີ ແຜນການຈະສ້າງຫ້ອງການ, ສູນການຄ້າ, ໂຮງແຮມ, ພະພຸດທະຮູບ, ສະຖານທີ່ບັນເທີງ, ທີ່ພັກອາໄສ, ໂຮງໝໍ, ໂຮງຮຽນ, ສະຖາບັນການເງິນ ແລະ ອື່ນໆ.

ໂຄງການກໍ່ສ້າງສູນກາງອາຄານນະຄອນສີຂຽວ, ຕະຫຼາດກະສິກຳ ແລະ ໂຮງແຮມ ມີເປົ້າໝາຍເພື່ອພັດທະນາໃຫ້ຕົວເມືອງທັນສະໄໝລະດັບສາກົນ ແລະ ເປັນສັນຍະລັກອັນໜຶ່ງໃນນະຄອນຫຼວງ. ຄຽງຄູ່ກັນນີ້, ເພື່ອຮອງຮັບໃຫ້ການພັດທະນາຄວນມີລະບົບຄຸ້ມຄອງຕົວເມືອງໃໝ່ບຶງທາດຫຼວງ ແລະ ໜ່ວຍງານຕ່າງໆທີ່ຕາງໜ້າຈາກພາກລັດ ເພື່ອປະກອບເຂົ້າໃນໜ່ວຍງານຄຸ້ມຄອງຕົວເມືອງທີ່ສົມບູນ ທີ່ສາມາດເຊື່ອມຕໍ່ກັບພາກພື້ນ ແລະ ສາກົນ.

ທ່ານ ຮວງ ກົວຜິງ ປະທານເຂດເສດຖະກິດສະເພາະບຶງທາດຫຼວງ ກ່າວວ່າ: ໂຄງການກໍ່ສ້າງສູນການຄຸ້ມຄອງບໍລິຫານເຂດບຶງທາດຫຼວງ ແລະ ໂຄງການວຽງຈັນນະຄອນສີຂຽວ ຈະເປັນການປະກອບສ່ວນທາງປະຫວັດສາດໃນການປັບປຸງຊີວິດການເປັນຢູ່ຂອງປະຊາຊົນເຂດນະຄອນຫຼວງວຽງຈັນ, ເລັ່ງລັດການກໍ່ສ້າງຕົວເມືອງ, ຍົກສູງລາຍຮັບດ້ານພາສີອາກອນຂອງນະຄອນຫຼວງວຽງຈັນ, ຊ່ວຍພັດທະນາເສດຖະກິດຂອງນະຄອນຫຼວງ ແລະ ໃນອະນາຄົດຈະກາຍເປັນສູນລວມຂອງການທ່ອງທ່ຽວ, ການເງິນ, ການຄ້າ, ການຂົນສົ່ງ ແລະ ອຸດສາຫະກໍາອື່ນໆຂອງອາຊີອາຄະເນ.

ໂອກາດດັ່ງກ່າວຍັງມີພິທີໄດ້ເປີດ ໂຮງແຮມໂປລີວຽງຈັນ ຢ່າງເປັນທາງການ, ໂຮງແຮມໂປລີວຽງຈັນ ແມ່ນໂຮງແຮມຫຼູຫຼາລະດັບຫ້າດາວຂອງ ກຸ່ມບໍລິສັດ ຫຸ້ນສ່ວນສີຂຽວ ທີ່ຈັດເຂົ້າເປັນບໍລິສັດຍັກໃຫຍ່ໃນ 500 ແຫ່ງຂອງໂລກ ທີ່ນອນໃນການຄຸ້ມຄອງຂອງ ກຸ່ມບໍລິສັດ ບໍລິຫານໂຮງແຮມສາກົນສີຂຽວ ເຊິ່ງໂຮງແຮມດັ່ງກ່າວຕັ້ງຢູ່ເຂດສູນກາງຂອງເຂດເສດຖະກິດສະເພາະບຶງທາດຫຼວງ ແລະ ມີສິ່ງອຳນວຍ ຄວາມສະດວກທີ່ບໍ່ຄືໃຜ.

( ຂ່າວ: ສົມລົດ; ຮູບ: ສົມສະຫວິນ )

ທີ່ມາ: ໜັງສືພິມ ເສດຖະກິດ-ການຄ້າ