ຄັດເລືອກຜູ້ແຂ່ງຂັນ “ ເວົ້າເພື່ອຊາດ ”

278

ສູນກາງຊາວໜຸ່ມ ຮ່ວມກັບສະໂມສອນ “ ເຈົ້າເວົ້າໄດ້ ” ແລະ ວິທະຍາໄລ ລາວ – ອາເມຣິກາ ໄດ້ຈັດການແຂ່ງຂັນຄັດເລືອກເອົາຜູ້ແຂ່ງຂັນການເວົ້າຕໍ່ໜ້າມວນຊົນ ເພື່ອໄປແຂ່ງຂັນການເວົ້າໃນຫົວຂໍ້ “ ເວົ້າເພື່ອຊາດ ” ຂຶ້ນໃນວັນທີ 27 ຕຸລາ 2019 ທີ່ວິທະຍາໄລລາວ – ອາເມຣິກາ ໂດຍການເຂົ້າຮ່ວມຂອງ ທ່ານ ສຸລິຍາ ແກ້ວພິລາວົງ ຫົວໜ້າກົມຂະບວນການສູນກາງຊາວໜຸ່ມ ປະຊາຊົນ ປະຕິວັດລາວ ( ສຊປລ ), ທ່ານ ທອງດີ ພົມມະວົງສາ ປະທານສະໂມສອນ “ ເຈົ້າເວົ້າໄດ້ ” ພ້ອມດ້ວຍບັນດາຄູຝຶກ ແລະ ຜູ້ສະໝັກຈຳນວນ 40 ຄົນເຂົ້າຮ່ວມ.

ທ່ານ ສຸລິຍາ ແກ້ວພິລາວົງ ໄດ້ກ່າວວ່າ: ການຈັດການແຂ່ງຂັນໃນຄັ້ງນີ້ເປັນຄັ້ງທຳອິດທີ່ຈັດແຂ່ງຂັນ “ ເວົ້າເພື່ອຊາດ ” ເພື່ອຕ້ອນຮັບວັນຊາດ ແລະ ວັນສຳຄັນຕ່າງໆຂອງພັກ ແລະ ຂອງ ສຊປລ ທັງເປັນການປຸກລະດົມຈິດໃຈຂອງຜູ້ເຂົ້າຮ່ວມລະດົມທຶນ ເພື່ອຊ່ວຍເຫຼືອຜູ້ປະສົບໄພນໍ້າຖ້ວມທາງພາກໃຕ້ ແລະ ເປັນການສ້າງເວທີໃຫ້ຊາວໜຸ່ມລາວໃຫ້ກາຍເປັນຄົນກ້າເວົ້າຕໍ່ມວນຊົນ ແລະ ເວົ້າຢ່າງມີເຫດຜົນ.

ການແຂ່ງຂັນຄັ້ງນີ້ມີຜູ້ສະໝັກທີ່ຫຼາກຫຼາຍ ເຊັ່ນ: ນັກຮຽນ, ນັກສຶກສາ, ພະນັກງານ, ຄູ – ອາຈານ ແລະ ພະສົງຕ່າງໆ.

ນອກນັ້ນ, ທ່ານ ທອງດີ ພົມມະວົງສາ ໄດ້ກ່າວວ່າ: ການແຂ່ງຂັນ “ ເວົ້າເພື່ອຊາດ ” ໃນຄັ້ງນີ້ແມ່ນເພື່ອຄັດເລືອກເອົາຜູ້ແຂ່ງຂັນຈຳນວນ 31 ຄົນ ເພື່ອໄປແຂ່ງຂັນຕໍ່ໃນຮອບຄັດເລືອກເຫຼືອ 20 ຄົນ ເຊິ່ງແຕ່ລະຄົນຈະຂຶ້ນມານຳສະເໜີແນວຄວາມຄິດ ເຮັດແນວໃດປະເທດຊາດຈຶ່ງຈະພັດທະນາ ແລະ ຫຼຸດພົ້ນອອກຈາກຄວາມທຸກຍາກຕາມເປົ້າໝາຍຂອງລັດຖະບານ.

ການແຂ່ງຂັນຈະໄດ້ຈັດຢູ່ທີ່ຫ້ອງປະຊຸມ ສຊປລ ໃນວັນອາທິດທີ 3 ພະຈິກ 2019, ເມື່ອໄດ້ນັກເວົ້າ 20 ຄົນແລ້ວ ກໍຈະໃຫ້ 20 ຄົນນີ້ແຂ່ງຂັນກັນດ້ວຍການໂຕ້ວາທີແບບໜຶ່ງຕໍ່ໜຶ່ງ ເຊິ່ງຈະໃຫ້ແຕ່ລະຄົນຈົກສະຫຼາກຍັດຕິແລ້ວມາໂຕ້ວາທີກັນ ໃນວັນທີ 9 ພະຈິກ 2019 ຢູ່ທີ່ຫ້ອງປະຊຸມ ສຊປລ ແລ້ວຄັດເລືອກເອົາ 10 ຄົນ ທີ່ເຫດຜົນດີມີຫຼັກການຫຼາຍເພື່ອເຂົ້າໄປຊີງຊະນະເລີດໃນວັນທີ 16 ພະຈິກ 2019 ເວລາ 13:00 – 16:00 ໂມງ ທີ່ຊັ້ນ 2 ສູນການຄ້າ ລາວ – ໄອເຕັກ ຕຶກເກົ່າ.

ຂ່າວ: ກາວຊົ່ງ

ທີ່ມາ: ໜັງສືພິມ ເສດຖະກິດ-ການຄ້າ