ສປປ ລາວເປັນເຈົ້າພາບຈັດປະຊຸມ ລັດຖະມົນຕີ ໄອຊີທີ ອາຊຽນຄັ້ງທີ 19 

361

ໃນວັນທີ 24-25 ຕຸລາ 2019 ທີ່ໂຮງແຮມແລນມາກ ນະຄອນຫຼວງວຽງຈັນ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ(ປທສ) ແຫ່ງ ສປປ ລາວ ໄດ້ເປັນເຈົ້າພາບເປີດກອງປະຊຸມລັດຖະມົນຕີ ໄອຊີທີ ອາຊຽນ ຄັ້ງທີ 19 ຂຶ້ນຢ່າງເປັນທາງການ ພາຍໃຕ້ຄຳຂັວນ “ສ້າງການເຊື່ອມຈອດທີ່ທັນສະໄໝ ເພື່ອການຫັນເປັນດີຈີຕອນ ຂອງອາຊຽນ”. ໂດຍໄດ້ມີການປຶກສາຫາລື, ແລກປ່ຽນດ້ານນະໂຍບາຍ ແລະ ລະບຽບການ ກັບ ປະເທດຄູ່ຮ່ວມເຈລະຈາ ລວມທັງການຮ່ວມມືກັບຄູ່ຮ່ວມພັດທະນາ, ຜູ້ປະກອບການພາກເອກະຊົນ ເພື່ອສົ່ງເສີມໃຫ້ເສດຖະກິດ-ສັງຄົມ ດີຈີຕອນ ມີການຂະຫຍາຍຕົວ, ສອດ ຄ່ອງກັບເປົ້າໝາຍປະຊາຄົມອາຊຽນ ເຊິ່ງປີນີ້ ໄດ້ກ້າວເຂົ້າສູ່ປີສຸດທ້າຍ ຂອງການປະຕິບັດແຜນແມ່ບົດອາຊຽນ ໄອຊີທີ 2020(AIM 2020) ເຊິ່ງໄດ້ປະກອບສ່ວນເຮັດໃຫ້ບັນດາປະເທດສະມາຊິກ ອາ ຊຽນ ມີຄວາມກ້າວໜ້າໃນແຕ່ລະດ້ານ ແລະ ຫັນເປັນ ດີຈີຕອນ ເທື່ອລະກ້າວ.

ທ່ານ ທັນສະໄໝ ກົມມະສິດ ລັດຖະມົນຕີກະຊວງ ປທສ ໄດ້ກ່າວວ່າ: 10 ປີ ທີ່ຜ່ານມາ ສປປ ລາວ ໄດ້ມີການວາງແຜນ ແລະ ສຸມຄວາມພະຍາຍາມ ໃນການປັບປຸງ ແລະ ຂະຫຍາຍພື້ນຖານໂຄງລ່າງໂທລະຄົມມະນາຄົມຂອງປະເທດ ແຕ່ສູນກາງຮອດທ້ອງຖິ່ນ ເພື່ອໃຫ້ການເຊື່ອມຕໍ່ເຄືອຂ່າຍໄດ້ມາດ ຕະຖານສູງ. ບັນດານິຕິກໍາຕ່າງໆ ແລະ ນະໂຍບາຍດ້ານເຕັກໂນໂລຊີການສື່ສານ ແລະ ຂໍ້ມູນຂ່າວສານ (ໄອຊີທີ) ກໍໄດ້ຮັບການປັບປຸງໃຫ້ແທດເໝາະກັບ ສະພາບການຂະຫຍາຍຕົວຂອງເສດຖະກິດ-ສັງຄົມ ແລະ ເຕັກໂນໂລຊີໃໝ່ ເຮັດໃຫ້ອັດຕາສ່ວນຂອງຜູ້ຊົມໃຊ້ໂທລະສັບ ແລະ ອິນເຕີເນັດ ມີການຂະຫຍາຍ ຕົວຢ່າງກ້າວກະໂດດ ເຊິ່ງມາຮອດປີ 2019 ແມ່ນຄົບຮອບ 52 ປີ ແຫ່ງການສ້າງຕັ້ງ ອາຊຽນ ແລະຄົບ ຮອບ 22 ປີ ທີ່ ສປປ ລາວ ເຂົ້າເປັນສະມາຊິກ.

ຕະຫລອດໄລຍະເວລາຜ່ານມາ ອາຊຽນ ໄດ້ມີການຮ່ວມມືຊ່ວຍເຫລືອເຊິ່ງກັນ ແລະ ກັນ ເພື່ອການພັດທະນາໃນຫລາຍໆດ້ານ ໂດຍສະເພາະດ້ານ ເສດຖະ ກິດ-ສັງຄົມ, ວັດທະນະທໍາ, ເຕັກນິກວິຊາການ, ການສຶກສາ ແລະ ອື່ນໆ ລວມທັງການສົ່ງເສີມ ສັນຕິ ພາບ, ສະຖຽນລະພາບ ແລະ ຄວາມໝັ້ນຄົງ ໃນພາກພື້ນອາຊຽນ. ປັດຈຸບັນ, ອາຊຽນ ໄດ້ກາຍເປັນຈຸດໃຈກາງອັນສຳຄັນໜຶ່ງໃນການຊຸກຍູ້ເສດຖະກິດ-ສັງຄົມ ດ້ວຍການ ນຳໃຊ້ນະວັດຕະກຳໃໝ່ທາງດ້ານ ໄອຊີທີ ແລະ ການຫັນເປັນ ດີຈີຕອນ ໃນການເຊື່ອມໂຍງ-ເຊື່ອມຈອດ. ໃນຖານະເປັນສະມາຊິກອາຊຽນ, ສປປ ລາວ ຈະສືບຕໍ່ຕັ້ງໜ້າເສີມຂະຫຍາຍຂີດຄວາມສາມາດຂອງຕົນ ແລະ ສະໜັບສະໜູນການຮ່ວມມືໃນທຸກຂົງເຂດວຽກງານ ທີ່ອາຊຽນໄດ້ຕົກລົງກັນ ເພື່ອໃຫ້ບັນລຸເປົ້າໝາຍຕາມແຜນພັດທະນາ ໃນດ້ານຕ່າງໆ ຂອງອາຊຽນ ກໍຄືການເຮັດໃຫ້ ວິໄສທັດປະຊາຄົມອາຊຽນ 2025 ປະກົດຜົນເປັນຈິງ.

ໃນໂອກາດນີ້, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ວ່າການລັດຖະມົນຕີ ກະຊວງແຜນການ ແລະ ການລົງທຶນ ແຫ່ງ ສປປ ລາວ ໄດ້ກ່າວວ່າ: ປັດຈຸບັນ ເຕັກໂນໂລຊີນັບມື້ມີການຂະຫຍາຍຕົວຢ່າງວ່ອງໄວ ແລະ ມີການພັດທະນາແບບກ້າວກະໂດດ ເຊິ່ງໄດ້ກາຍມາເປັນສ່ວນໜຶ່ງທີ່ສຳຄັນໃນຊີວິດປະຈຳວັນຂອງຄົນເຮົາ ແລະ ເປັນປັດໄຈສຳຄັນໃນ ການພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວຢ່າງກວ້າງຂວາງ ພ້ອມທັງໄດ້ສ້າງວິທີການໃໝ່ໆໃນການສື່ສານ, ສ້າງສັງຄົມທີ່ກວ້າງ ຂວາງ, ສ້າງທຸລະກິດຫລາຍຮູບແບບ ແລະ ສ້າງບັນດາຂະແໜງອຸດສາຫະກຳໃໝ່ໆຂຶ້ນ, ທັງໄດ້ປ່ຽນວິທີການໃຫ້ບໍລິການປະຊາຊົນຂອງພາກລັດ, ການຮັກສາສຸຂະພາບ ແລະ ການສຶກສາ ເປັນຕົ້ນ. ເພື່ອບັນລຸຄຳຂວັນດັ່ງກ່າວ, ພວກເຮົາຕ້ອງສ້າງພື້ນຖານໂຄ່ງລ່າງ ດ້ານໂທລະຄົມມະນາຄົມໃຫ້ມີຄວາມເຂັ້ມແຂງ, ສ້າງລະບົບການສື່ສານໃຫ້ມີປະສິດທິພາບ, ອຸປະກອນເຄື່ອງມືຕ້ອງທັນສະໄໝ, ທັງສົ່ງເສີມການສ້າງບຸກຄະລາກອນ ແລະ ການສ້າງນະວັດຕະກຳໃໝ່ ເພື່ອຮັບມືກັບການຫັນປ່ຽນສູ່ດີຈີຕອນ.

ຂໍ້ມູນ – ພາບ: ຂປລ