ມາດີສຸດໆ ຊ້າງນ້ອຍ ເອັຟຊີ ເກັບໄຊຊະນະລາຍການລະດັບນາໆຊາດ

405

ສະໂສອນ ຊ້າງນ້ອຍ ເອັຟຊີ ທີມອັນດັບ 3 ໃນເປບຊີ ລາວພຣີເມຍລີກ 2019 ສາມາດເອົາຊະນະ Muhun Bagan AC ສະໂມສອນຈາກອິນເດຍ ໄປຫວຸດຫວິດ 2 – 1 ໃນການແຂ່ງຂັນບານເຕະລາຍການ Sheikh Kamal International Club Cup 2019 ທີ່ປະເທດບັງກລາເທດ ໃນວັນທີ 20 ຕຸລາທີ່ຜ່ານມາ ເຊິ່ງເປັນໄຊຊະນະນັດທໍາອິດ ແລະ ເປັນລາຍການທໍາອິດໃນລະດັບນາໆຊາດ.

ການແຂ່ງຂັນບານເຕະລາຍການ Sheikh Kamal International Club Cup 2019 ມີທີມເຂົ້າຮ່ວມທັງໝົດ 8 ທີມ ຈາກ 5 ປະເທດ ໄດ້ແກ່: ບັງກລາເທດ 3 ທີມ, ອິນເດຍ 2 ທີມ, ມາເລເຊຍ 1 ທີມ, ມານດີບ 1 ທີມ ແລະ ລາວ 1 ທີມ ໂດຍ ຊ້າງນ້ອຍ ເອັຟຊີ ຖືກຈັບຢູ່ຮ່ວມກຸ່ມ A ປະກອບມີ: T.C Sports Club ຈາກມານດີບ, Muhun Bagan AC ຈາກອິນເດຍ​ ແລະ Chittagong Abahani LTD ຈາກບັງກລາເທດ, ສ່ວນກຸ່ມ B ປະກອບມີ: Bashundhara Kings ຈາກບັງກລາເທດ, Chennai City Football Club ຈາກອິນເດຍ, Terengganu Football Club ຈາກມາເລເຊຍ ແລະ Abahani Limited Dhaka ຈາກບັງກລາເທດ.

ໃນວັນທີ 20 ຕຸລາ 2019 ເປັນການແຂ່ງຂັນມື້ທໍາອິດປາກົດວ່າ: ຊ້າງນ້ອຍ ເອັຟຊີ ສາມາດພິກເອົາຊະນະ Muhun Bagan AC ທີມຈາກອິນເດຍ ໄປຫວຸດຫວິດ 2 – 1 ຈາກການຍິງຂອງ ສົມໄຊ ແກ້ວຫານາມ ເໝົາຄົນດຽວ 2 ປະຕູ ພ້ອມໄດ້ຮັບລາງວັນດີເດັ່ນປະຈໍານັດດັ່ງກ່າວອີກດ້ວຍ, ສ່ວນຜົນຂອງອີກຄູ່ໃນກຸ່ມ A ທີ່ແຂ່ງຂັນນັດເປີດສະໜາມ CHITTAHONG ABHANI LTD ເອົາຊະນະ TC SPORTS CLUB ຈາກປະເທດມານດີບ 4 – 1 ເຮັດໃຫ້ CHITTAHONG ABHANI LTD ຂຶ້ນນໍາຈາກການມີ 3 ຄະແນນ ເທົ່າກັບອັນດັບ 2 ຊ້າງນ້ອຍ ເອັຟຊີ.

ສໍາລັບລາຍການດັ່ງກ່າວຈັດຂຶ້ນລະຫວ່າງວັນທີ 19 – 29 ຕຸລາ 2019 ທີ່ສະໜາມ M.A Aziz Stadium Chittagong ປະເທດບັງກລາເທດ, ສ່ວນນັດທີ 2 ຂອງ ຊ້າງນ້ອຍ ຈະພົບ Chittagong Abahani LTD ທີມຈາກເຈົ້າພາບ ໃນວັນທີ 22 ຕຸລາ 2019 ເວລາ 19:00 ໂມງ ແລະ ນັດສຸດທ້າຍຮອບແບ່ງກຸ່ມພົບກັບ T.C Sports Club ທີມຈາກມານດີບ.

( ຄໍາສອນ; ຮູບຈາກ: ສຕລ )

ທີ່ມາ: ໜັງສືພິມ ເສດຖະກິດ-ການຄ້າ