ເຂດເສດຖະກິດສາມຫຼ່ຽມຄໍາ ລົງທຶນໄປແລ້ວ17 ພັນຕື້ກວ່າກີບ ເນລະມິດໃຫ້ເປັນເມືອງໃໝ່

394

ເຂດເສດຖະກິດພິເສດສາມຫຼ່ຽມຄໍາ ໄດ້ລົງທຶນພັດທະນາແລ້ວ 17.607 ຕື້ກີບ ເຊິ່ງການພັດທະນາໂດຍພື້ນຖານເຫັນເປັນຮູບຮ່າງຕົວເມືອງແລ້ວ ມາຮອດປັດຈຸບັນສາມາດດຶງດູດນັກລົງທຶນມາຮ່ວມລົງທຶນ 495 ຫ້າງຮ້ານ, ມີທຶນຈົດທະບຽນ 4.372 ຕື້ກີບ ແລະ ມອບພັນທະໃຫ້ລັດຖະບານ 458 ລ້ານໂດລາສະຫະລັດ.

ທ່ານ ຈັນທະຈອນ ວາງຟາເຊັງ ປະທານສະພາບໍລິຫານເຂດເສດຖະກິດພິເສດສາມຫຼ່ຽມຄໍາ ກ່າວວ່າ: ເຂດເສດຖະກິດພິເສດສາມຫຼ່ຽມຄໍາ ມີເນື້ອທີ່ສໍາປະທານທັງໝົດ 10 ພັນເຮັກຕາ. ໃນນັ້ນ, ແບ່ງອອກເປັນ 2 ເຂດ ຄື: ເຂດພັດທະນາຕົວເມືອງ 3 ພັນເຮັກຕາ ແລະ ເຂດປ່າສະຫງວນສາຍພູກິ່ວລົມ 7 ພັນເຮັກຕາ. ນັບແຕ່ໄລຍະບຸກເບີກມາເຖິງປັດຈຸບັນເປັນໄລຍະ 12 ປີ ເຂດເສດຖະກິດພິເສດສາມຫຼ່ຽມຄໍາ  ໄດ້ສຸມໃສ່ດຶງດູດການລົງທຶນ, ນັກທ່ອງທ່ຽວ, ພັດທະນາພື້ນຖານໂຄງລ່າງການກໍ່ສ້າງ ເປັນຕົ້ນແມ່ນການກໍ່ສ້າງເສັ້ນທາງ, ຄູຕ້ານເຈື່ອນ, ທ່າເຮືອສິນຄ້າ, ຕະຫຼາດສົດ, ລະບົບສີຂຽວ, ລະບົບນໍ້າປະປາ, ສະຖານີໄຟຟ້າ, ລະບົບສື່ສານ, ລະບົບສາທາລະນະສຸກ ແລະ ການປິ່ນປົວພື້ນຖານ, ຖະໜົນມິດຕະພາບ ລາວ  – ຈີນ, ຕະຫຼາດຈີນ, ຖະໜົນອາຫານແຄມແມ່ນໍ້າ, ໂຮງແຮມຫ້າດາວ ແລະ ໂຄງການທ່ອງທ່ຽວອື່ນໆ.

ທ່ານກ່າວວ່າ: ໄລຍະກວ່າ 12 ປີ ( 2017 – 2019 ) ໄດ້ລົງທຶນພັດທະນາທັງໝົດ 17.607  ຕື້ກີບ ຫຼື ປະມານ 2 ຕື້ໂດລາສະຫະລັດ. ໃນນັ້ນ, ໄດ້ພັດທະນາກໍ່ສ້າງເຂດຕົວເມືອງ ກວມເນື້ອທີ່ 200 ເຮັກຕາ ( ໂດຍພື້ນຖານເຫັນເຖິງຮູບຮ່າງຕົວເມືອງແລ້ວ ). ໃນນັ້ນ, ໄດ້ລົງທຶນກໍ່ສ້າງທ່າເຮືອສາກົນສາມຫຼ່ຽມຄໍາ ແລະ ຫ້ອງການພາສີ ( ໂດຍໃຫ້ເຈົ້າໜ້າທີ່ພາສີນໍາໃຊ້ໂດຍບໍ່ເສຍຄ່າ ) ຈໍານວນ 46 ຕື້ກວ່າກີບ ຫຼື ປະມານ 5,2 ລ້ານໂດລາສະຫະລັດ.

ເຂດເສດຖະກິດພິເສດໄດ້ມອບພັນທະອາກອນໃຫ້ລັດຖະບານນັບແຕ່ປີ 2012 ມາຮອດກາງປີ 2019 ຈໍານວນ 458 ລ້ານໂດລາສະຫະລັດ. ປັດຈຸບັນມີນັກທຸລະກິດເຂົ້າມາລົງທຶນໃນເຂດເສດຖະກິດພິເສດສາມຫຼ່ຽມຄໍາ ມີທັງໝົດ 495 ຫ້າງຮ້ານ, ມີທຶນຈົດທະບຽນ 4.372 ຕື້ກີບ ຫຼື ປະມານ 496 ລ້ານໂດລາສະຫະລັດ ( ສະຕິຖິເດືອນມິຖຸນາ 2019 ).

ດ້ານສະພາບແວດລ້ອມ ໄດ້ລົງທຶນສ້າງຂົວ ແລະ ປັບປຸງຮ່ອງນໍ້າ 3 ສາຍຢູ່ເຂດຕົວເມືອງ ຈໍານວນ 56,9 ຕື້ກີບ, ມາຮອດປັດຈຸບັນລົງທຶນກໍ່ສ້າງພື້ນທີ່ສີຂຽວປູກຕົ້ນໄມ້ປະດັບແຄມທາງຈໍານວນ 228,8 ຕື້ກີບ.

ດ້ານສາທາລະນະສຸກ ດຶງດູດນັກລົງທຶນຈໍານວນ 30 ລ້ານໂດລາ ສ້າງຕັ້ງໂຮງໝໍສາກົນລາວຕາເວັນອອກຮ່ວມມືກັບໂຮງໝໍເມືອງຕົ້ນເຜິ້ງ ແລະ ໂຮງໝໍຊຽງແສນ ປະເທດໄທ ສ້າງກົນໄກການປິ່ນປົວພະຍາດ ແລະ ອຸບັດເຫດ.

ດ້ານການສຶກສາ ດຶງດູດນັກລົງທຶນຈໍານວນ 133,9 ຕື້ກີບ ສ້າງໂຮງຮຽນອະນຸບານ, ໂຮງຮຽນປະຖົມ, ໂຮງຮຽນມັດທະຍົມ ປັດຈຸບັນກໍາລັງດໍາເນີນການກໍ່ສ້າງຄາດວ່າທ້າຍປີ 2020 ຈະໃຫ້ສໍາເລັດໂຄງການ; ດ້ານວັດທະນະທໍາ ໄດ້ລົງທຶນ 65 ຕື້ກີບ ສ້າງຕັ້ງວັດຊົງຊານ ເປັນການສົ່ງເສີມວັດທະນະທໍາດ້ານສາສະໜາ, ຊ່ວຍເຫຼືອທຶນໃນການກໍ່ສ້າງວັດ ແລະ ພະເຈົ້າໃຫຍ່ຢູ່ແຂວງບໍ່ແກ້ວ  ຈໍານວນ 2,63 ຕື້ກີບ.

ດ້ານການທ່ອງທ່ຽວໃນປີ 2018 ມີນັກທ່ອງທ່ຽວເຂົ້າມາຈໍານວນ 452.571 ຄົນ, ນັກທ່ອງທ່ຽວເຂົ້າມາທາງດ່ານສາກົນສາມຫຼ່ຽມຄໍາ ມີ 131.593 ຄົນ ທຽບໃສ່ປີຜ່ານມາເພີ່ມຂຶ້ນ 124,5%, ລາຍຮັບຈາກວີຊາກັບດ່ານປະມານ 22,5 ຕື້ກີບ ມາຮອດເດືອນກັນຍາ 2019 ເຂດເສດຖະກິດພິເສດສາມຫຼ່ຽມຄໍາ ມີໂຮງແຮມທັງໝົດ 13 ແຫ່ງ, ມີຫ້ອງພັກ 1.303 ຫ້ອງ ແລະ ຄາດວ່າຮອດທ້າຍປີຈະເພີ່ມຂຶ້ນ 3 ແຫ່ງ ແລະ ຈະມີຫ້ອງພັກຮອດ 1.600 ຫ້ອງ.

ຂ່າວ – ຮູບ: ພຸດຕີ້

ທີ່ມາ: ໜັງສືພິມ ເສດຖະກິດ-ການຄ້າ