ຕ່າງປະເທດລາຍງານ ທ່ານຍິ່ງລັກ ອະດີດນາຍົກໄທ ໄດ້ຮັບສັນຊາດເຊີເບຍ

365

ສຳນັກຂ່າວເອພີ ລາຍງານຈາກນະຄອນຫຼວງເບລເກຣດ ສາທາລະນະລັດເຊີເບຍ ເມື່ອວັນພະຫັດ ທີ 8 ສິງຫາ ວ່າ ສຳ ນັກຂ່າວຕັນຈຸກຂອງທາງການເຊີເບຍ ໄດ້ລາຍງານ ເມືອວັນພະຫັດ ວ່າ ລັດຖະບານເຊີເບຍ ໄດ້ອະນຸມັດສິດອັນຊອບທໍາໃນຖານະພົນລະເມືອງເຊີເບຍ ໃຫ້ທ່ານນາງຍິ່ງລັກ ຊິນນະວັດ ອະດີດນາຍົກລັດຖະມົນຕີຂອງປະເທດໄທ “ເພາະຈະມີຜົນປະໂຫຍດຕໍ່ປະເທດ” ຂະນະທີ່ເຈົ້າໜ້າທີ່ເຊີເບຍປະຕິເສດທີ່ຈະໃຫ້ຄຳເຫັນ ກ່ຽວກັບ ເຫດຜົນໃນການຕັດສິນໃຈຂອງລັດຖະບານ.

ດໍາລັດລັດຖະບານຂອງປະເທດເຊີເບຍ ທີ່ເປັນຫຼັກຖານຢັ້ງຢືນ ວ່າ ທ່ານນາງຍິ່ງລັກ ໄດ້ຮັບສັນຊາດເຊີເບຍ ຖືກເຜີຍແຜ່ປະກາດຂອງທາງການ ເມື່ອເດືອນມິຖຸນາ ຜ່ານມາ ໃນລາຍງານລະບຸວ່າ ຈາກການໄດ້ຮັບສັນຊາດ ແລະ ສາມາດຖືພາສປອດ ຫຼື ເອກະສານເດີນທາງຂອງເຊີເບຍ ທ່ານນາງຍິ່ງລັກ ສາມາດເດີນທາງຢ້ຽມຢາມປະເທດຕ່າງໆ ໂດຍບໍ່ຈຳເປັນຕ້ອງຍື່ນຂໍວີຊາ ກວ່າ 100 ປະເທດທົ່ວໂລກ ລວມເຖິງສະມາຊິກສ່ວນໃຫຍ່ຂອງ 28 ປະເທດ ເຄືອຂ່າຍສະຫະພາບເອີຣົບ ຫຼື ອີຢູ.