ຍອມໃຈພໍ່ສຸດໂຫດ ພະຍາຍາມຄາຕະກຳລູກຊາຍຕົນເອງ

223

ທ່ານ ພັນຕີ ຄຳແສງ ຜົ້ງສາລີ ຮອງຫົວໜ້າພະແນກຕຳຫຼວດ ປກສ ເມືອງລອງ ໄດ້ໃຫ້ຮູ້ວ່າ: ຜ່ານການເອົາຄຳໃຫ້ການຈາກ ທ້າວ ພໍແຊະ ອາຍຸ 38 ປີ ( ຜູ້ຖືກຫາ ) ປະຊາຊົນຢູ່ບ້ານນ້ຳຮີ ເມືອງລອງ ແຂວງຫຼວງນ້ຳທາ ມາດຳເນີນການສືບສວນ – ສອບສວນໄດ້ຮັບສາລະພາບວ່າໄລຍະ 2 – 3 ປີຜ່ານມາ ຜູ້ກ່ຽວໄດ້ເສບຢາເສບຕິດປະເພດຢາຝິ່ນ, ຢາບ້າ. ຕົກມາຮອດປີ 2020 ຄອບຄົວເລີ່ມບໍ່ມີຄວາມສະຫງົບຈຶ່ງໄດ້ປະຮ້າງກັນກັບເມຍ ສ່ວນລູກຊາຍໜຶ່ງຄົນ ອາຍຸ 12 ປີ ແມ່ນຢູ່ນຳຜູ້ກ່ຽວ.

ກ່ອນເກີດເຫດເວລາ 6:00 ໂມງເຊົ້າ ຂອງວັນທີ 26 ສິງຫາ 2021 ຜູ້ກ່ຽວກັບລູກຕື່ນນອນແລ້ວໄດ້ໃຊ້ໃຫ້ລູກຊາຍໄປຂໍເຂົ້າສານນຳພີ່ນ້ອງທີ່ຢູ່ເຂດໃກ້ຄຽງແຕ່ບໍ່ໄດ້.ຈາກນັ້ນ, ຜູ້ກ່ຽວຈຶ່ງໄດ້ໄປຂໍນຳ ທ້າວ ອາຢາ ແລະ ທ້າວ ອາຊະໂກະ ແຕ່ກໍຖືກປະຕິເສດ.

ຈາກນັ້ນ, ຜູ້ກ່ຽວຈຶ່ງໄດ້ກັບມາເຮືອນແລ້ວຄິດນ້ອຍໃຈ, ອຸກໃຈ ຍ້ອນຄວາມທຸກຈົນຫາທາງອອກບໍ່ໄດ້, ຍາດຕິພີ່ນ້ອງ, ໝູ່ເພື່ອນໃຜກໍບໍ່ໃຫ້ການຊ່ວຍເຫຼືອ, ບໍ່ຮັກແພງ. ທ້າວ ພໍແຊະ ( ຜູ້ຖືກຫາ ) ຈຶ່ງໄດ້ວາງແຜນເອີ້ນເອົາລູກຊາຍເຂົ້າມານອນຫຼັບແລ້ວໃຊ້ພ້າຟັນເຂົ້າບໍລິເວນຄໍ ແລະ ໃບໜ້າ ປະມານ  2 – 3 ບາດ ແລ້ວຈັບເອົາປືນແກັບແລ່ນເຂົ້າໄປໃນປ່າແຄມບ້ານ ເພື່ອຈະໄປຂ້າຕົວຕາຍ ແຕ່ບໍ່ກ້າຍິງ. ຈາກນັ້ນ, ຈຶ່ງໄດ້ກັບມາເຮືອນເຫັນຍາດຕິພີ່ນ້ອງກຳລັງຊ່ວຍເອົາລູກຊາຍທີ່ຖືກບາດເຈັບໄປໂຮງໝໍ, ຜູ້ກ່ຽວກໍຖືກກັກຕົວມາດຳເນີນຄະດີ.

ປັດຈຸບັນເດັກນ້ອຍຜູ້ທີ່ຖືກເຄາະຮ້າຍປອດໄພແລ້ວ. ສ່ວນ ທ້າວ ພໍແຊະ ( ຜູ້ຖືກຫາ ) ແມ່ນໄດ້ກັກຕົວໄວ້ທີ່ຫ້ອງກັກຂັງຊົ່ວຄາວ ປກສ ເມືອງລອງ ເພື່ອດຳເນີນຄະດີຕາມລະບຽບກົດໝາຍ ໃນຂໍ້ຫາພົວພັນກັບຢາເສບຕິດແລ້ວພະຍາຍາມຂ້າຜູ້ອື່ນດ້ວຍເຈຕະນາ.