ຫ້ອງການຊາວໜຸ່ມເມືອງ ວິລະບູລີ ຮ່ວມກັບບໍລິສັດ ລ້ານຊ້າງມີເນໂຣນສ໌ ລິມິເຕັດ ຊ່ວຍເຫຼືອໃຫ້ນ້ອງນັກຮຽນຜູ້ທີ່ຍັງຂາດເຂີນດ້ອຍໂອກາດ

208

ທ້າຍເດືອນຕຸລາ ຜ່ານມານີ້ ທາງຫ້ອງການຊາວໜຸ່ມເມືອງ ວິລະບູລີ ແຂວງສະຫວັນນະເຂດ ຮ່ວມກັບບໍລິສັດ ລ້ານຊ້າງມີເນໂຣນສ໌ ລິມິເຕັດ ໄດ້ລົງເຄື່ອນໄຫວມອບເຄື່ອງຊ່ວຍເຫຼືອປະເພດເຄື່ອງອຸປະໂພກ-ບໍລິໂພກ ໃຫ້ນ້ອງນັກຮຽນຜູ້ທີ່ຍັງຂາດເຂີນດ້ອຍໂອກາດ ແລະ ຄອບຄົວອະນາຖາຢູ່ເຂດຫ່າງໄກສອກຫຼີກຂອງເມືອງ

ໂດຍການໃຫ້ກຽດຮ່ວມພາທາງຂອງທ່ານນາງ ບຸນລັບ ທຳມະຈັກ ຄະນະປະຈຳພັກເມືອງ ປະທານແນວລາວສ້າງຊາດເມືອງ ຜູ້ຊີ້ນໍາວຽກງານອົງການຈັດຕັ້ງມະຫາຊົນຂັ້ນເມືອງ, ມີທ່ານນາງ ບຸນຄໍ້າ ອິນທິສານ ກໍາມະການພັກເມືອງ ເລຂາຄະນະບໍລິຫານງານຊາວໜຸ່ມເມືອງ, ທ່ານ ນາມສະນະ ໂພທິພັນ ຕາງໜ້າຈາກບໍລິສັດລ້ານຊ້າງ ມີເນໂຣນສ໌ ລິມິເຕັດ ພ້ອມດ້ວຍຄະນະທີມງານຂອງເມືອງ ແລະ ບໍລິສັດລ້ານຊ້າງ ມີເນໂຣນສ໌ ເຂົ້າຮ່ວມ.

ໃນການລົງມອບເຄື່ອງຊ່ວຍເຫຼືອໃຫ້ນ້ອງນັກຮຽນ ອະນຸຊົນ, ເຍົາວະຊົນ ແລະ ຄອບຄົວອະນາຖາ ຫຼື ຄອບຄົວຜູ້ດ້ອຍໂອກາດໃນຄັ້ງນີ້ແມ່ນໄດ້ໄປມອບຢູ່ທີ່ ບ້ານ ກົກໝາກ ແລະ ບ້ານ ທົ່ງຫຼວງ ທີ່ຂຶ້ນກັບກຸ່ມບ້ານທີ 1 ຂອງເມືອງວິລະບູລີ ແຂວງ ສະຫວັນນະເຂດ, ໂດຍໄດ້ມອບໃຫ້ໂຮງຮຽນຈຳນວນ 2 ແຫ່ງຄື : ໂຮງຮຽນ ປະຖົມສົມບູນກົກໝາກ ແລະ ໂຮງຮຽນປະຖົມສົມບູນທົ່ງຫຼວງ ເຊິ່ງມີຈຳນວນນັກຮຽນທັງໝົດ 19 ນ້ອງ, ມີ 11 ຄອບຄົວ

ເຄື່ອງທີ່ນໍາໄປມອບໃນຄັ້ງນີ້ປະກອບມີອຸປະກອນການຮຽນເຊັ່ນ : ເສື້ອຂາວແຂນຍາວ 19 ຜືນ, ໂສ້ງ 8 ຜືນ, ສິ້ນ 10 ຜືນ, ເກີບຜ້າໃບ ຊາຍ – ຍິງ 18 ຄູ່, ຖົງພາຍ 18 ຖົງ, ແພແດງ ( ເຍົາວະຊົນ ) 11 ຜືນ, ແພຟ້າ ( ອະນຸຊົນ ) 7 ຜືນ, ປຶ້ມຂຽນ 18 ຕັບ, ບິກຂຽນ 3 ກັບ, ສໍດໍາ 10 ກັບ, ບັນທັດ 5 ກັບ ແລະ ສໍສີ ຈໍານວນ 18 ກັບ ລວມມູນຄ່າ 5 ລ້ານກວ່າກີບ ເຊິ່ງແມ່ນໄດ້ມາຈາກການປະກອບສ່ວນຊ່ວຍເຫຼືອຂອງບໍລິລິສັດ ລ້ານຊ້າງມີເນໂຣນສ໌ ລິມິເຕັດ, ນອກຈາກນີ້ກໍ່ຍັງມີເຄື່ອງປະເພດເຄື່ອງນຸ່ງຫົ່ມ, ເຂົ້າສານ ແລະ ອາຫານແຫ້ງຕື່ມອີກຈໍານວນໜຶ່ງ ໂດຍແມ່ນໄດ້ມາຈາການປະກອບສ່ວນຊ່ວຍເຫຼືອຂອງທ່ານ ນາງ ບຸນລັບ ທຳມະຈັກ ຄະນະປະຈຳພັກເມືອງ ປະທານແນວລາວສ້າງຊາດເມືອງ ແລະ ຫ້ອງການໂຍທາທິການ ແລະ ຂົນສົ່ງເມືອງ ວິລະບູລີ.