ທະຫານຊາຍແດນຫວຽດນາມ ມອບເຄື່ອງຊ່ວຍເຫຼືອໃຫ້ທະຫານແຂວງສະຫວັນນະເຂດ

214

ໃນວັນທີ 14 ຕຸລາ 2021 ກອງບັນຊາການທະຫານຊາຍແດນແຂວງກວາງຈິ ສສ ຫວຽດ ນາມ ນຳໂດຍ ສະຫາຍ ພັນໂທ ຫງວ໊ຽນ ບ໊າຢຽດ ຮອງຫົວໜ້າຫ້ອງການທະຫານກອງບັນຊາການທະຫານຊາຍແດນແຂວງກວາງຈິ ສສ ຫວຽດນາມ ພ້ອມຄະນະ ໄດ້ມອບເຄື່ອງອຸປະກອນສື່ສານແກ່ກອງບັນຊາການທະຫານແຂວງສະຫວັນນະເຂດ.

ປະກອບດ້ວຍເຄື່ອງສື່ສານຫຼັກອັງແຕກ ແລະ ເຄື່ອງສົ່ງສັນຍານໂຟນີ, ເຄື່ອງລະບົບອັງແຕກຂອງຈັກສື່ສານ, ຈັກໂຟນີຮັບສັນຍານໄລຍະສັ້ນ-ໂຟນີພາຍໃສ່ບ່າໄລ່ຍະຍາວ, ກ້ອງເນັ້ງ 1 ເຄື່ອງ ແລະ ກ້ອງວິດີໂອ 1 ເຄື່ອງ ພ້ອມເຄື່ອງມືຮັບໃຊ້ວຽກງານການທະຫານອີກຈໍານວນໜຶ່ງ ເພື່ອຊ່ວຍເຫຼືອກອງບັນຊາການທະຫານແຂວງສະຫວັນນະເຂດ.

ພິທີມອບ – ຮັບແມ່ນໄດ້ຈັດຂຶ້ນຢູ່ທີ່ດ່ານສາກົນລາວບາວ – ແດນສະຫວັນ ເຊິ່ງສະຫາຍ ພັນໂທ ພັນວິໄລ ລາດສະຍົນ ຫົວໜ້າຫົວໜ້າການທະຫານ ຫົວໜ້າຫ້ອງເສນາທິການກອງບັນຊາການທະຫານແຂວງສະຫວັນນະເຂດ ໄດ້ຕາງໜ້າຄະນະຂຶ້ນຮັບ ພ້ອມທັງຂຶ້ນລາຍງານສະພາບການເຄື່ອນໄຫວໂດຍຫຍໍ້ວຽກງານການທະຫານພາຍໃນແຂວງສະຫວັນນະເຂດ ໂດຍສະເພາະລຽບຕາມຊາຍແດນຖືວ່າມີຄວາມປອດໄພ100%.

ຈາກນັ້ນສະຫາຍຍັງໄດ້ກ່າວຄໍາອວຍພອນຕໍ່ການນຳທະຫານຊາຍແດຍ ໂດຍສະເພາະກໍແມ່ນກະຊວງປ້ອງກັນປະເທດ ສສ ຫວຽດນາມ ທີ່ໄດ້ເປັນຫ່ວງເປັນໃຍ ແລະ ເຫັນຄວາມສຳຄັນຕໍ່ກຳລັງປະກອບອາວຸດທ້ອງຖິ່ນທະຫານແຂວງສະຫວັນນະເຂດ.

ສະຫາຍຍັງໃຫ້ຄຳໝັ້ນສັນຍາວ່າຈະນຳເອົາເຄື່ອງອຸປະກອນດັ່ງກ່າວນຳໄປຮັບໃຊ້ໜ້າທີ່ວຽກງານປ້ອງກັນຊາດ-ປ້ອງກັນຄວາມສະຫງົບທົ່ວແຂວງສະຫັວນນະເຂດ ໃຫ້ເກີດຜົນປະໂຫຍດຢ່າງສູງ.

ຈາກ: ວິທະຍຸກະຈາຍສຽງ ແຂວງສະຫວັນນະເຂດ