ປກສ ແຂວງຫຼວງນໍ້າທາ ໄດ້ຮັບອຸປະກອນປ້ອງກັນເຊື້ອໄວຣັສໂຄວິດ-19 ຈາ​ກ ສ​ປ ຈີນ

444

ເພື່ອສະກັດກັ້ນ ແລະ ຕ້ານການແຜ່ລະບາດຂອງເຊື້ອໄວຣັສໂຄວິດ-19 ທ້າຍເດືອນເມສາ 2020 ຢູ່ທີ່ດ່ານສາກົນບໍ່ຫານ ສປ ຈີນ ກອງບັນຊາການຕຳຫຼວດ ແຂວງກວາງຕົງ ສປ ຈີນ ໄດ້ມອບອຸປະກອນເປັນຜ້າອັດປາກ-ດັງ ຈຳນວນ 10 ແກັດ ມາມອບໃຫ້ກອງບັນຊາການ ປກສ ແຂວງຫຼວງນ້ຳທາ ຕາງໜ້າກອງບັນຊາການຕຳຫຼວດ ແຂວງກວາງຕົງ ມອບໂດຍ ທ່ານ ຊູນຈ້ຽນ ຕຳຫຼວດເສດຖະກິດເມືອງຫຼາ ແລະ ກ່າວຮັບໂດຍ ທ່ານ ພັນໂທ ດວງຈັນ ໄຕບົວວອນ ຮອງຫົວໜ້າກອງບັນຊາການ ປກສ ແຂວງຫຼວງນ້ຳທາ

ໂອກາດດັ່ງກ່າວ, ທ່ານ ພັນໂທ ດວງຈັນ ໄຕບົວວອນ ໄດ້ຕາງໜ້າຄະນະພັກ-ຄະນະບັນຊາ, ພະນັກງານ-ນັກຮົບ ກ່າວສະແດງຄວາມຂອບອົກຂອບໃຈຕໍ່ກອງບັນຊາການ ແຂວງກວາງຕົງ ພ້ອມທັງສັນຍາວ່າຈະນຳເອົາອຸປະກອນດັ່ງກ່າວແຈກຢາຍຢູ່ບັນດາກົມກອງ, ປກສ ເມືອງ, ປກສ ເຂດໄດ້ນຳໃຊ້ເຂົ້າໃນວຽກງານເພື່ອການແຜ່ລະບາດເຊື້ອໄວຣັສໂຄວິດ-19 ຢູ່ ສປປ ລາວ ເວົ້າລວມ-ເວົ້າສະເພາະ ແຂວງຫຼວງນ້ຳທາ. ຂ່າວຍັງໃຫ້ຮູ້ຕື່ມອີກວ່າ: ທ້າຍເດືອນເມສາ 2020 ຢູ່ທີ່ດ່ານສາກົນບໍ່ຫານ ສປ ຈີນ, ຫ້ອງການຄະນະກຳມະການ ເພື່ອກວດກາ ແລະ ຄວບຄຸມຢາເສບຕິດແຫ່ງຊາດຈີນ ໂດຍຜ່ານກອງທຶນຄວບຄຸມຢາເສບຕິດຂອງ ສປ ຈີນ ໄດ້ສະໜອງເຄື່ອງອຸປະກອນປ້ອງກັນໂຄວິດ-19 ເພື່ອຊ່ວຍໃນການເຄື່ອນໄຫວປະຕິບັດໜ້າທີ່ວຽກງານຂອງຫ້ອງການກວດກາ ແລະ ຄວບຄຸມຢາເສບຕິດ ກະຊວງປ້ອງກັນຄວາມສະຫງົບຂອງ ສປປ ລາວ

ສຳລັບເຄື່ອງ ແລະ ອຸປະກອນທີ່ນຳມາມອບຄັ້ງນີ້ ປະກອບມີ: ຜ້າອັດປາກແບບທຳມະດາ ຈຳນວນ 8.000 ອັນ, ຜ້າອັດປາກ ເຄເອັນ 95 ຈຳນວນ 2.000 ອັນ, ຊຸດແວ່ນປ້ອງກັນໃບໜ້າ ຈຳນວນ 500 ຊຸດ, ຖົງມືປ້ອງກັນ ຈຳນວນ 4.000 ຄູ່ ແລະ ເຄື່ອງວັດແທກອຸນຫະພຸມ ຈຳນວນ 50 ອັນ. ໂອກາດດັ່ງກ່າວ, ທັງສອງຝ່າຍກໍໄດ້ເຊັນບົດບັນທຶກ ແລະ ພ້ອມທັງມອບ-ຮັບເຄື່ອງອຸປະກອນຢ່າງເປັນທາງການ. ຕາງໜ້າຝ່າຍຈີນກ່າວມອບໂດຍ ທ່ານ ພົນຕີ ລີລິຊິງ ຮອງຫົົວໜ້າຄະນະກຳມະການປາບປາມຢາເສບຕິດກິ່ງ ແຂວງສິບສອງພັນນາ ແຂວງຢູນນານ ແລະ ຕາງໜ້າຝ່າຍລາວກ່າວຮັບໂດຍ ທ່ານ ພັນໂທ ກອງແກ້ວ ສິງມີໄຊ ຄະນະປະຈຳພັກ ຮອງຫົວໜ້າກອງບັນຊາການ ປກສ ແຂວງຫຼວງນ້ຳທາ ໂດຍຊ້ອງໜ້າພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຄີພິຍານ

ພ້ອມດຽວກັນນີ້, ທ່ານ ນາງ ສີມອນ ອຳນວຍການບໍລິສັດສີມອນພັດທະນາກະສິກຳ ແລະ ບໍລິການຂາເຂົ້າ-ຂາອອກຈຳກັດຜູ້ດຽວ ໄດ້ນຳເອົາອຸປະກອນປ້ອງກັນໂຄວິດ-19 ປະເພດຜ້າອັດປາກ-ດັງ ຈຳນວນ 560 ອັນ ມາມອບກອງບັນຊາການ ປກສ ແຂວງ, ຕາງໜ້າກ່າວຮັບໂດຍ ພັນໂທ ຄຳຕຸ່ນ ບຸນລຽນຂັນ ຮອງຫົວໜ້າກອງບັນຊາການ ປກສ ແຂວງ ໂດຍຊ້ອງໜ້າຄະນະສອງພາກສ່ວນເຂົ້າຮ່ວມ.
ຂ່າວ: ຮທ ທະວີສັກ ປກສ ແຂວງຫຼວງນ້ຳທາ