ອພສ ເມືອງໄຊພູທອງ ມອບເຄື່ອງຊ່ວຍເຫລືອໃຫ້ສູນກັກກັນ

490

ວັນທີ 1 ເມສາ 2020 ນີ້, ຍາທ່ານ ທອງດໍາ ຈັນທະວົງ ເຈົ້າຄະນະ ອົງການພຸດທະສາສະໜາສຳພັນລາວ(ອພສ) ເມືອງໄຊພູທອງ ແຂວງສະຫວັນນະເຂດ ພ້ອມດ້ວຍຄະນະສົງ ແລະ ການນໍາຂອງເມືອງ ໄດ້ນໍາເອົານໍ້າດື່ມຈໍານວນ 580 ແພັກ, ໝີ່ 88 ແກັດ ແລະ ກາແຟຈຳນວນໜຶ່ງທີ່ໄດ້ຈາກການບໍລິຈາກຂອງອອກຕົນຍາດໂຍມພາຍໃນເມືອງ ລວມມູນຄ່າທັງໝົດ 14.760.000 ກີບ

ມາມອບໃຫ້ສູນກັກກັນ ຜູ້ທີ່ກັບມາຈາກການໄປອອກແຮງງານ ຢູ່ປະເທດທີ່ມີຄວາມສ່ຽງຕໍ່ການຕິດເຊື້ອພະຍາດ ໂຄວິດ-19 ຈໍານວນ 8 ສູນ ໂດຍກຳນົດເອົາໂຮງຮຽນເປັນສູນກັກກັນ ຄື: ໂຮງຮຽນໄຊພູທອງ, ນາຄຳ, ຫົວຫາດ, ທ່າໂພ, ເຮືອນຫີນ, ພູມມະເຈດີ, ມ່ວງໄຂ່, ນ້ຳພຸ, ບຸ່ງນາດີ ແລະ ໂຮງຮຽນນາໂມງ

ໂອກາດນີ້, ບັນດາເລຂາພັກບ້ານ-ນາຍບ້ານໃນແຕ່ລະຈຸດ ຕ່າງກໍໄດ້ສະແດງຄວາມຂອບໃຈ ຍ້ອງຍໍຊົມເຊີຍນໍ້າໃຈຂອງພະສົງ ແລະ ການນໍາຂອງເມືອງ ທີ່ປະກອບສ່ວນຊ່ວຍເຫລືອໃຫ້ສູນກັກກັນ ໃນແຕ່ລະແຫ່ງພາຍໃນເມືອງໄຊພູທອງ ເຊິ່ງມັນເປັນທ່າແຮງອັນສໍາຄັນໃນການຕ້ານ ແລະ ສະກັດກັ້ນການລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (covid 19), ໃນ 8 ສູນ ລວມມີຜູ້ຖືກກັກກັນທັງໝົດ 1.931 ຄົນ, ຍິງ 969 ຄົນ, ເຊິ່ງບຸກຄົນທີ່ຖືກກັກກັນ ແມ່ນຈະໄດ້ມີການຕິດຕາມກວດກາດ້ານສຸຂະພາບຢ່າງໃກ້ຊິດ ຈາກພະນັກງານແພດໝໍປະຈຳສູນ ຈົນກວ່າຈະເຖິງກຳນົດ 14 ວັນຖ້າຫາກວ່າບໍ່ພົບກໍລະນີສົງໃສ ຫລື ເປັນໄຂ້ ທາງສູນແມ່ນຈະອະນຸຍາດໃຫ້ບຸກຄົນດັ່ງກ່າວກັບຄືນບ້ານເຮືອນຂອງຕົນເອງ.

ຂໍ້ມູນຂ່າວສານປະເທດລາວ