ຄະນະແພດ ແລະ ຊ່ຽວຊານຈີນ ພ້ອມເຄື່ອງອຸປະກອນການແພດທີ່ມາຊ່ວຍເຫຼືອລາວ ເຖິງສະໜາມບິນວັດໄຕແລ້ວ

739

ສປ ຈີນ ສົ່ງທີມຄະນະແພດ ແລະ ຊ່ຽວຊານ 12 ທ່ານ ພ້ອມດ້ວຍອຸປະກອນການແພດມາຊ່ວຍເຫຼືອ ສປປ ລາວ ຕ້ານພະຍາດ COVID-19

ຈາກສະພາບລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (COVID-19) ໄດ້ລະບາດແຜ່ລາມອອກໄປທົ່ວໂລກຢ່າງກວ້າງຂວາງໃນທຸກມື້, ຢູ່ ສປປ ລາວເຮົາ ກໍໄດ້ພົບຜູ້ຕິດເຊື້ອເປັນຜົນບວກ ເຖິງ 8 ຄົນແລ້ວນັ້ນ, ເພື່ອສືບຕໍ່ການຮ່ວມມືລະຫວ່າງສອງປະເທດເພື່ອນມິດຍຸດທະສາດ ແລະ ຄູ່ຮ່ວມຊາຕາກຳ ລາວ-ຈີນ, ລັດຖະບານ ແຫ່ງ ສປ ຈີນ ໄດ້ປະກາດຊ່ວຍເຫຼືອ ສປປ ລາວ ໃນການຕ້ານ ແລະ ສະກັດກັ້ນກັບພະຍາດ COVID-19 ດັ່ງກ່າວ ໂດຍໄດ້ສົ່ງຄະນະແພດ ແລະ ຊ່ຽວຊານ ຈຳນວນ 12 ທ່ານ ພ້ອມດ້ວຍອຸປະກອນການແພດ ເພື່ອມາຊ່ວຍ ສປປ ລາວ ເຊິ່ງການຊ່ວຍເຫຼືອດັ່ງກ່າວໄດ້ເດີນທາງມາເຖິງສະໜາມບິນສາກົນວັດໄຕ ນະຄອນຫຼວງວຽງຈັນ ໃນເວລາ 10:30 ໂມງ ຂອງວັນທີ 29 ມີນາ 2020.

ທີ່ສະໜາມບິນສາກົນວັດໄຕ ໄດ້ຈັດພິທີຕ້ອນຮັບຄະນະແພດ ແລະ ຊ່ຽວຊານຢ່າງເປັນທາງການ ແລະ ສົມກຽດ, ໂດຍແມ່ນ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ COVID-19 ແລະ ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ, ພ້ອມດ້ວຍຄະນະ ແລະ ເຈົ້າໜ້າທີ່ຈາກສະຖານເອກອັກຄະລັດຖະທູດ ແຫ່ງ ສປ ຈີນ ປະຈໍານະຄອນຫຼວງວຽງຈັນ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ. ສຳລັບບັນຍາກາດໃນການຕ້ອນຮັບ ຄະນະແພດ ແລະ ຊ່ຽວຊານດັ່ງກ່າວ ແມ່ນເຕັມໄປດ້ວຍໄມຕີຈິດມິດຕະພາບອັນອົບອຸ່ນ ພາຍໃຕ້ຄຳຂວັນຮ່ວມກັນຂອງສອງປະເທດ ລາວ-ຈີນ ຄື: “ຮ່ວມມືກັນຕ້ານພະຍາດ ໂຄວິດ-19 ຮ່ວມທຸກຮ່ວມຍາກ”.

ສຳລັບແຜນການເຮັດວຽກ ຢູ່ ສປປ ລາວ ຂອງຄະນະແພດ ແລະ ຊ່ຽວຊານ ແມ່ນຈະດຳເນີນໄປໃນໄລຍະເວລາ 14 ວັນ ໂດຍຈະແບ່ງປັນປະສົບການກັບຝ່າຍລາວໃນການປ້ອງກັນ ແລະ ຄວບຄຸມພະຍາດດັ່ງກ່າວ, ກວດຄັດກອງຫາຜູ້ຕິດເຊື້ອ, ກວດວິເຄາະເຊື້ອພະຍາດຢູ່ຫ້ອງທົດລອງ ແລະ ປິ່ນປົວຄົນເຈັບ, ພ້ອມທັງຈະແລກປ່ຽນບົດຮຽນກັບກະຊວງສາທາລະນະສຸກ ແລະ ໂຮງໝໍສູນກາງຂອງ ສປປ ລາວ.

ຂ່າວ: Media Laos