ມູນນິທິຊາວພຸດຊື້ຈິຊ່ວຍເຫຼືອຜູ້ໄດ້ຮັບຜົນກະທົບຈາກໄພພິບັດນໍ້າຖ້ວມເມືອງຊົນນະບູລີ ມູນຄ່າ 3 ຕື້ກວ່າ

472

ປະຊາຊົນທີ່ໄດ້ຮັບຜົນກະທົບຈາກໄພພິບັດນ້ຳຖ້ວມເມືອງຊົນນະບູລີ ໄດ້ຮັບການຊ່ວຍເຫຼືອຈາກມູນນິທິຊາວພຸດຊື້ຈິ ລວມມູນຄ່າ 3 ຕື້ກວ່າກີບ.

ໃນວັນທີ 17 ທັນວາ 2019 ຜ່ານມາ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ຕາງໜ້າໃຫ້ແກ່ປະຊາຊົນຊາວ ເມືອງຊົນນະບູລີ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ໃນຊ່ວງລະດຸຝົນຜ່ານມາ ຮັບເຄື່ອງຊ່ວຍເຫຼືອຈາກມູນນິທິຊາວພຸດຊື້ຈິ (Tzuchi) ໃຕ້ຫວັນ ຈາກບາງກອກປະເທດ ໄທ, ໂດຍ ທ່ານ ນາງສຸ ກັນຍາ ຣິມພະນາເວດ ປະທານມູນນິທິຊື້ຈິ ພ້ອມດ້ວຍຄະນະ, ມອບ-ຮັບ ໂດຍຊ້ອງໜ້າບັນດາແຂກຈາກ ພະແນກການອ້ອມຂ້າງ ແຂວງ, ພ້ອມດ້ວຍບັນດາບໍລິສັດໃນ ເຂດເສດຖະກິດພິເສດສະຫວັນ-ເຊໂນ, ພາກສ່ວນທີ່ກ່ຽວຂ້ອງເຂົ້າຮ່ວມ.


ທ່ານ ບຸນລົບ ໂຄດຫຼັກຄຳ ຫົວໜ້າພະແນກແຮງງານ ແລະສະຫວັດດີການສັງຄົມ ແຂວງ ລາຍງານໃຫ້ຮູ້ວ່າ: ການ ປະກອບສ່ວນຊ່ວຍເຫຼືອໃນ ຄັ້ງນີ້ປະກອບດ້ວຍ: ເຂົ້າສານ ຈຳນວນ 381,16 ໂຕນ, ແນວເຂົ້າປູກ 280,62 ໂຕນ, ນໍ້າມັນພືດ 10.262 ລິດ, ເກືອໄອໂອດີນ 10.251ຖົງ, ນໍ້າຕານ 19.100 ກິໂລ, ລວມມູນຄ່າ 3 ຕື້ 651 ລ້ານ ກວ່າກີບ, ມາມອບໃຫ້ແຂວງສະ ຫວັນນະເຂດ ເພື່ອນຳໄປຊ່ວຍເຫຼືອປະຊາຊົນ ເມືອງຊົນນະບູລີ ຈຳນວນ 16 ບ້ານ, 3.133 ຄອບ ຄົວ.

ການຊ່ວຍເຫຼືອຄັ້ງນີ້ ແມ່ນໄດ້ຮັບການປະສານງານ ຈາກ ທ່ານ ອາໂສ ກະລາດຊະພົນ ກະຊວງການຕ່າງປະເທດ ແລະ ອາສາສະໝັກຂອງມູນນິທິ ຊື່ຈິກໍ່ໄດ້ລົງເກັບກຳຂໍ້ມູນໃນ ເດືອນຕຸລາທີ່ຜ່ານມາຈາກນັ້ນ ທາງມູນນິທິຮ່ວມກັບຫຼາຍພາກສ່ວນທັງພາກລັດ ແລະ ເອກະຊົນ, ອາສາສະໝັກກວ່າ 150 ຄົນ ແລະ 6 ປະເທດ ບ້ານໄກ້ຄຽງຂອງອາຊຽນຄື: ຫວຽດນາມ, ໄທ, ມຽນມາ, ມາເລເຊຍ, ອິນໂດເນເຊຍ, ໃຕ້ຫວັນ ແລະ ອາສາສະໝັກ ນັກຮຽນໂຮງຮຽນຈີນ, ສະມາຄົມຈີນສະຫວັນນະເຂດ, ປາກເຊ ໄດ້ເຂົ້າຮ່ວມໃນການແຈກຢາຍເຄື່ອງຊ່ວຍເຫຼືອດັ່ງກ່າວ ໃນຕົ້ນເດືອນທັນວານີ້ ແລະ ໃນຄັ້ງນີ້ ພາຫະນະຂົນສົ່ງແມ່ນໄດ້ ຈາກກອງພົນທະຫານຮາບທີ 4 ຈຳນວນ 12 ຄັນ ແລະ ຈາກກອງ ບັນຊາການທະຫານແຂວງ ອີກ 5 ຄັນ. ພ້ອມນັ້ນກໍ່ໄດ້ ຮັບຄວາມຮ່ວມມືຈາກບໍລິສັດ ສະຫວັນໂລຈິສຕິກ ທີ່ໃຫ້ການຊ່ວຍເຫຼືອທາງດ້ານສາງເກັບມ້ຽນ ພ້ອມລົດຂົນສົ່ງຕື່ມອີກ.


ປະທານມູນນິທິຊາວພຸດຊື່ຈິໃຕ້ຫວັນ ກ່າວວ່າ: ພາຍຫຼັງທີ່ຮູ້ວ່າ ສປປ ລາວ ໄດ້ປະສົບ ກັບໄພນໍ້າຖ້ວມກໍ່ໄດ້ມີການປະສານງານ ແລະມາເກັບກຳຂໍ້ມູນເພື່ອໃຫ້ການຊ່ວຍເຫຼືອ ແລະ ໃນໄລຍະຜ່ານມາກໍ່ໄດ້ໃຫ້ການຊ່ວຍເຫຼືອແກ່ຜູ້ປະສົບໄພພິບັດ ຕ່າງໆແລ້ວ 100 ກວ່າປະເທດ.

ຂ່າວຈາກ: ໜັງສືພິມສະຫວັນພັດທະນາ