ທ່ານບົວສອນ ບຸບຜາວັນ ມອບເຂົ້າຊ່ວຍເຫຼືອປະຊາຊົນ 2 ບ້ານ ທີ່ໄດ້ຮັບຜົນກະທົບຈາກນໍ້າຖ້ວມ

463

ທ່ານ ບົວສອນ ບຸບຜາວັນ ອະດີດນາຍົກລັດຖະມົນຕີ ແຫ່ງ ສປປ ລາວ ໄດ້ມອບເຂົ້າສານໜຽວ 15 ໂຕນ ມູນຄ່າ 120 ລ້ານກີບ ໃຫ້ແກ່ປະຊາຊົນ 2 ບ້ານ ທີ່ໄດ້ຮັບຜົນກະທົບຈາກໄພນໍ້າຖ້ວມ ຄື: ບ້ານໂຊໂລໃຫຍ່ ແລະ ບ້ານໂຊໂລນ້ອຍ ເມືອງຊະນະສົມບູນ ແຂວງຈໍາປາສັກ ເພື່ອບັນເທົາທຸກແກ່ປະຊາຊົນ 2 ບ້ານດັ່ງກ່າວ.

ພິທີມອບ-ຮັບ ເຂົ້າຊ່ວຍເຫຼືອຄັ້ງນີ້ ຈັດຂຶ້ນຢູ່ວັດບ້ານໂຊໂລນ້ອຍ, ໃຫ້ກຽດຮັບໂດຍ ທ່ານ ສຸບັນ ໄຕໄຊຍະວົງ ຮອງເຈົ້າເມືອງໆຊະນະສົມບູນ. ມີ ທ່ານ ບົວລິນ ວົງພະຈັນ ຮອງເຈົ້າແຂວງໆຈໍາປາສັກ ປະທານຄະນະກໍາມະການປ້ອງກັນ, ຄວບຄຸມ ແລະ ຟື້ນຟູໄພພິບັດຂັ້ນແຂວງ, ການນໍາພະແນກການກົມກອງອ້ອມຂ້າງແຂວງ, ການນໍາສະມາຄົມມິດຕະພາບ ລາວ-ຍີ່ປຸ່ນ, ການນໍາກຸ່ມບໍລິສັດ ລາວ ເວີນ, ການນໍາຂະແໜງການຕ່າງໆຂອງເມືອງຊະນະສົມບູນ ຕະຫຼອດຮອດຄະນະພັກ-ອົງການປົກຄອງບ້ານ ແລະ ພໍ່ແມ່ປະຊາຊົນ ໃນ 2 ບ້ານເຂົ້າຮ່ວມເປັນສັກຂີພະຍານ.

ເຂົ້າສານໜຽວທີ່ມອບຄັ້ງນີ້ ແມ່ນໄດ້ຮັບການສະໜັບສະໜູນຈາກສະມາຄົມມິດຕະພາບ ລາວ-ຍີ່ປຸ່ນ ແລະ ກຸ່ມບໍລິສັດ ລາວ ເວີນ ຈໍານວນ 15 ໂຕນ, ລວມມູນຄ່າ 120 ລ້ານກີບ, ຈຸດປະສົງ ກໍ່ເພື່ອຊ່ວຍເຫຼືອບັນເທົາທຸກ ແກ່ພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ແຕ່ທ້າຍເດືອນສິງຫາ – ຕົ້ນເດືອນກັນຍາ 2019 ທີ່ຜ່ານມາ.

ສ່ວນການແຈກຢາຍເຂົ້າສານນັ້ນ ອໍານາດການປົກຄອງ 2 ບ້ານ ໄດ້ມອບໃຫ້ປະຊາຊົນຕາມຄວາມເສຍຫາຍຕົວຈິງ, ຄອບຄົວທີ່ໄດ້ຮັບຜົນກະທົບຫຼາຍ ກໍ່ໄດ້ 2 ສອບ/ຄອບຄົວ(ນໍ້າໜັກ 20 ກິໂລກຼາມ/ສອບ), ຄອບຄົວທີ່ໄດ້ຮັບຜົນກະທົບບໍ່ຫຼາຍ ກໍ່ໄດ້ 1 ສອບ/ຄອບຄົວ.

ຈາກສະພາບນໍ້າຖ້ວມໃນປີນີ້, ບ້ານໂຊໂລໃຫຍ່ ແລະ ບ້ານໂຊໂລນ້ອຍ ເມືອງຊະນະສົມບູນ ມີຜູ້ໄດ້ຮັບຜົນກະທົບ 478 ຄອບຄົວ, ພົນລະເມືອງ 1.855 ຄົນ, ຍິງ 880 ຄົນ, ເນື້ອທີ່ນາເສຍຫາຍ 146 ເຮັກຕາ, ສັດລ້ຽງ ເສຍຫາຍ ຄວາຍ 4 ໂຕ, ງົວ 33 ໂຕ, ໝູ 5 ໂຕ, ປາລ້ຽງເສຍຫາຍ 28.800 ໂຕ, ເປັດ-ໄກ່ ສູນຫາຍ 5.196 ໂຕ.

ນອກນີ້ ຍັງມີລົດໃຫຍ່-ລົດກະບະ ຈົມນໍ້າ 21 ຄັນ, ລົດຈັກ 1.037 ຄັນ, ໂທລະພາບ 182 ໜ່ວຍ, ຕູ້ເຢັນ 117 ໜ່ວຍ, ໂປມນໍ້າ 22 ໜ່ວຍ ແລະ ເຄື່ອງໃຊ້ໃນຄອບຄົວເສຍຫາຍເປັນຈໍານວນຫຼວງຫຼາຍ. ໃນທີ່ຜ່ານມາ ປະຊາຊົນ 2 ບ້ານດັ່ງກ່າວ ໄດ້ຮັບການຊ່ວຍເຫຼືອ ເຂົ້າສານ 14.150 ກິໂລກຼາມ, ໝີ່ປະເພດຕ່າງໆ 22.830 ຫໍ່, ປາປ໋ອງ 16.756 ປ໋ອງ, ນໍ້າດື່ມ 3.374 ຕຸກ. ນອກນີ້ ກໍ່ຍັງມີເຄື່ອງນຸ່ງຫົ່ມ ແລະ ເຄື່ອງໃຊ້ໃນຄອບຄົວຈໍານວນໜຶ່ງ ລວມມູນຄ່າ ປະມານ 12 ລ້ານກ່ວາກີບ.

ຂ່າວ-ພາບ ທູນທອງໃຈ

ທີ່ມາ: ນສພ ຈໍາປາໃໝ່