ຊ່ວຍຕໍ່ເນື່ອງ! ສອງຄອນເມືອງທີ 4 ໄດ້ຮັບການຊ່ວຍເຫຼືອຈາກການນຳເມືອງອຸທຸມພອນ

383

ເພື່ອສືບຕໍ່ມອບເຄື່ອງຊ່ວຍເຫຼືອບັນເທົາທຸກ ໃຫ້ແກ່ປະຊາຊົນບັນດາເມືອງ ທີ່ໄດ້ຮັບຜົນກະທົບຈາກນໍ້າຖ້ວມ ໃນລະຫວ່າງເດືອນສິງຫາ ຫາເດືອນກັນຍາ ທີ່ຜ່ານມາ. ວັນທີ 3 ຕຸລາ 2019 ຜ່ານມາ, ທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ ພ້ອມຄະນະ ໄດ້ນໍາເອົາເຄື່ອງທີ່່ລະດົມໄດ້ຈາກທຸກພາກສ່ວນໃນສັງຄົມພາຍໃນເມືອງ ນໍາໄປມອບ ຊ່ວຍເຫຼືອໃຫ້ປະຊາຊົນເມືອງສອງຄອນ ທີ່ຖືກຜົນກະທົບຈາກນໍ້າຖ້ວມ ເປັນເມືອງທີ 4 ທັດຈາກເມືອງເຊໂປນ, ເມືອງຈຳພອນ ແລະ ເມືອງຊົນນະບູລີ ໂດຍຜ່ານການຈັດຕັ້ງຂອງເມືອງ.

ເຊິ່ງເຄື່ອງທີ່ນໍາໄປມອບປະກອບມີ: ນໍ້າດື່ມ 259 ແຟັກ, ໝີ່ 106 ແກັດ, ເຂົ້າສານ 8 ກະສອບ, ປາກະປ໋ອງ 24 ແຟັກ, ເຄື່ອງບັນເທົາທຸກ 120 ຖົງ ແລະ ເຄື່ອງໃຊ້ອື່ນໆອີກຈໍານວນໜຶ່ງ ລວມມູນຄ່າ 15 ລ້ານ 6 ແສນກວ່າກີບ ໃຫ້ກຽດກ່າວຮັບເຄື່ອງດັ່ງກ່າວ ໂດຍແມ່ນ ທ່ານ ນັນ ສິດສານຸພາບ ເຈົ້າເມືອງໆສອງຄອນ, ຊ້ອງໜ້າການຈັດຕັ້ງຂອງສອງເມືອງ.

ເຊິ່ງທ່ານກໍ່ໃຫ້ຄຳໝັ້ນສັນຍາວ່າ: ເຄື່ອງທີ່ການນໍາຂອງເມືອງ ອຸທຸມພອນ ນຳມາມອບຄັ້ງນີ້ ແມ່ນເຖິງມືປະຊາຊົນຜູ້ທີ່ໄດ້ຮັບຜົນກະທົບ ຈາກນໍ້າຖ້ວມຢ່າງແນ່ນອນ, ເຊິ່ງທົ່ວເມືອງມີບ້ານ ທີ່ຖືກນໍ້າຖ້ວມທັງໝົດ 36 ບ້ານ, ໜັກກວ່າໝູ່ມີ 11 ບ້ານ, ມີ 1.800 ກວ່າຄອບຄົວ. ສ່ວນຜູ້ຖືກຜົນກະທົບ ແລະ ຕ້ອງຍ້າຍໄປຢູ່ບ່ອນໃໝ່ຊົ່ວຄາວມີ 11.900 ກວ່າຄອບຄົວ ເພາະບາງບ້ານຖ້ວມຈົນວິດຫຼັງຄາເຮືອນ ຖ້າທຽບໃສ່ນ້ຳຖ້ວມໃນຄັ້ງຜ່ານມາ ຖືວ່າຖືກນໍ້າຖ້ວມໜັກ ໃນຮອບ 41 ປີ ເຊິ່ງສາມາດວັດແທກໄດ້ເກືອບ 20 ກວ່າແມັດ.

ມາຮອດປັດຈຸບັນນີ້ເຫັນວ່າລະດັບນ້ຳແມ່ນໄດ້ບົກລົງແລ້ວ ສ່ວນຄວາມເສຍຫາຍ ແມ່ນທາງຄະນະກຳມະການພວກເຮົາຈະໄດ້ລົງເອົາຂໍ້ມູນຢ່າງລະອຽດ ສຳລັບແຜນເບື້ອງຕົ້ນແມ່ນຈະເລັ່ງໃສ່ ນຳພາປະຊາຊົນຟື້ນຟູພື້ນຖານໂຄງລ່າງເຊັ່ນ: ອະນາໄມ ແລະ ສ້ອມແປງເຮືອນຊານບ້ານຊ່ອງ, ຖະໜົນຫົນທາງ ແລະ ອື່ນໆ.

ໂອກາດນີ້ ທ່ານ ປະສົງສິນ ຈະເລີນສຸກ ກໍ່ໄດ້ສະແດງຄວາມເປັນຫ່ວງເປັນ ໃຍມາຍັງບັນດາຜູ້ປະສົບໄພ ກໍ່ຄືຜູ້ຖືກຜົນກະທົບຈາກໄພນ້ຳຖ້ວມ ພ້ອມທັງຂໍເປັນກຳລັງໃຈໃຫ້ ຄະນະນຳຂອງເມືອງ ຕະຫຼອດຮອດພໍ່ແມ່ປະຊາຊົນໃນການປັບປຸງຟື້ນຟູຊີວິດການເປັນຢູ່ໃຫ້ດີຂື້ນ, ພ້ອມກັນ ສ້າງສາພັດທະນາປະເທດຊາດບ້ານເມືອງຂອງຕົນໃຫ້ຈະເລີນກ້າວໜ້າ.

ທີ່ມາ: ຫ້ອງການ ຖວທ ເມືອງອຸທຸມພອນ