ກຸ່ມບໍລິສັດ ຄຳໄພຊະນະ ມອບເງິນ 200 ລ້ານ ຊ່ວຍເຫລືອຜູ້ປະສົບໄພນໍ້າຖ້ວມ

603

ໃນຕອນເຊົ້າຂອງວັນທີ 30 ກັນຍາ 2019 ທີ່ ຫ້ອງວ່າການສຳນັກງານນາຍົກລັດຖະມົນຕີ, ທ່ານ ເພັດພົມພິພັກ, ລັດຖະມົນຕີ, ຫົວຫນ້າຫ້ອງວ່າການສຳນັກງານນາຍົກລັດຖະມົນຕີ ໄດ້ຕາງຫນ້າລັດຖະບານ ຮັບເງິນຊ່ວຍເຫລືອຜູ້ປະສົບໄພນໍ້າຖ້ວມ ຈາກກຸ່ມບໍລິສັດ ຄຳໄພຊະນະ ຈຳນວນ 200.000.000 ກີບ, ຊຶ່ງແມ່ນ ທ່ານ ຄຳໄພ ສົມຊະນະ, ປະທານກຸ່ມບໍລິສັດດັ່ງກ່າວ ເປັນຜູ້ມອບ, ໂດຍມີພະນັກງານທີ່ກ່ຽວຂ້ອງ ຂອງຫ້ອງວ່າການສຳນັກງານນາຍົກລັດຖະມົນຕີ ແລະ ກຸ່ມບໍລິສັດ ທີ່ນຳເງິນມາມອບ ເຂົ້າຮ່ວມ.

ໃນໂອກາດນີ້, ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ພາກສ່ວນ ທີ່ໄດ້ນຳເອົາເງິນມາມອບ ເພື່ອຊ່ວຍເຫຼືອຜູ້ປະສົບໄພນໍ້າຖ້ວມໃນຄັ້ງນີ້. ເງິນຊ່ວຍເຫລືອດັ່ງກ່າວ ແມ່ນຈະໄດ້ນຳໄປມອບໃຫ້ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫລືອບັນເທົາທຸກ ແກ່ຜູ້ປະສົບໄພນໍ້າຖ້ວມໃນປີນີ້, ຊຶ່ງການຊ່ວຍເຫຼືອດັ່ງກ່າວ ຈະເປັນກຳລັງໃຈໃຫ້ແກ່ປະຊາຊົນ ແລະ ປະກອບສ່ວນເຮັດໃຫ້ການແກ້ໄຂໄພພິບັດ ກໍ່ຄືຜົນກະທົບຕໍ່ຊີວິດການເປັນຢູ່ຂອງຜູ້ປະສົບໄພນໍ້າຖ້ວມ ຢູ່ທ້ອງຖິ່ນຕ່າງໆ ສາມາດຜ່ານພົ້ນຄວາມຫຍຸ້ງຍາກ ແລະ ກັບຄືນສູ່ສະພາບປົກກະຕິໂດຍໄວ.

ໃນໂອກາດດຽວກັນ, ທ່ານ ຄຳໄພ ສົມຊະນະ ກໍ່ໄດ້ກ່າວສະແດງຄວາມຊົມເຊີຍ ຕໍ່ພັກ-ລັດ ທຸກຂັ້ນ, ບັນດາບໍລິສັດ ແລະ ພາກສ່ວນຕ່າງໆ ທີ່ໄດ້ເອົາໃຈໃສ່ຊ່ວຍເຫລືອ ທາງດ້ານຕ່າງໆ ໃຫ້ແກ່ປະຊາຊົນ ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມຢູ່ທ້ອງຖິ່ນຕ່າງໆ ເປັນຢ່າງດີ ແລະ ທັນການພໍສົມຄວນ, ສິ່ງດັ່ງກ່າວ ສະແດງເຖິງຄວາມຮັບຜິດຊອບສູງ, ຄວາມສາມັກຄີເປັນປຶກແຜ່ນ, ຄວາມເອື້ອເຟື່ອເພື່ອແຜ່, ຄວາມມີນໍ້າໃຈເສຍສະຫລະອັນສູງສົ່ງ ຂອງພາກສ່ວນຕ່າງໆ ກໍ່ຄືປະຊາຊົນລາວບັນດາເຜົ່າ ແລະ ເພື່ອນມິດສາກົນຂອງພວກເຮົາ. ຊຶ່ງກຸ່ມບໍລິສັດ ຄຳໄພຊະນະ ຈະສືບຕໍ່ໃຫ້ການຊ່ວຍເຫລືອທາງດ້ານຕ່າງໆ ຢ່າງສຸດຄວາມສາມາດຂອງຕົນ