ເອັສວີກຼຸບ ໃຊ້ເງິນສ່ວນຕົວຊ່ວຍສ້າງທາງແດງລ້າ ມູນຄ່າ 9 ຕື້ກວ່າ ໄລຍະທາງກວ່າ 6 ກິໂລແມັດ

546

ໃນວັນທີ 30 ກັນຍາ 2019 ໄດ້ພິທີມອບ-ຮັບ ໂຄງການກໍ່ສ້າງເສັ້ນທາງດິນແດງຕັດໃໝ່ ຈາກເສັ້ນທາງ 13 ໃຕ້ ເຂດບ້ານນາໂດນ ຫາເຂດຈັດສັນ ບ້ານກຸງສີ ເມືອງທ່າແຂກ ແຂວງຄໍາມ່ວນ ໄດ້ເປີດຂຶ້ນຢ່າງເປັນທາງການ ຢູ່ທີ່ຫ້ອງປະຊຸມຫ້ອງວ່າການແຂວງຄໍາມ່ວນ ໂດຍການເຂົ້າຮ່ວມຂອງ ທ່ານ ໂອໄດ ສຸດາພອນ ເຈົ້າແຂວງໆຄໍາມ່ວນ ພ້ອມຄະນະ, ທ່ານ ພີມສະຫັວນ ໄຊຍະເກດ ອໍານວຍການບໍລິສັດ ເອັສວີກຼຸບ ຈໍາກັດ ພ້ອມຄະນະ ແລະ ມີບັນດາທ່ານພະແນກການທີ່ກ່ຽວຂ້ອງ ເຂົ້າຮ່ວມ.

ທ່ານ ພີມສະຫັວນ ໄຊຍະເກດ ອໍານວຍການບໍລິສັດ ເອັສວີກຼຸບ ຈໍາກັດ ໄດ້ຂຶ້ນກ່າວໃນພິທີມອບ-ຮັບ ໂຄງການກໍ່ສ້າງເສັ້ນທາງຕັດໃໝ່ວ່າ: ໂຄງການດັ່ງກ່າວ ແຕ່ເດີມແມ່ນເປັນແຜນພັດທະນາຂອງແຂວງ ໄດ້ສຶກສາອອກແບບ ເພື່ອຂໍງົບປະມານຂອງລັດຖະບານມາກໍ່ສ້າງ ເນື່ອງຈາກວ່າງົບປະມານມີຈໍາກັດ ທາງບໍລິສັດ ເອັສວີກຼຸບ ຈໍາກັດ ເຫັນໄດ້ຄວາມສໍາຄັນເພື່ອຮັບໃຊ້ສັງຄົມ ຈື່ງອາສາຊ່ວຍເຫຼືອລ້າໃນການກໍ່ສ້າງເສັ້ນທາງດັ່ງກ່າວ.

ໂຄງການກໍ່ສ້າງເສັ້ນທາງແມ່ນໄດ້ເລີ່ມ ສໍາຫຼວດ-ອອກແບບ ແລະ ກໍ່ສ້າງ ແຕ່ປີ 2017 ເປັນຕົ້ນມາ ຮອດປະຈຸບັນ ການກໍ່ສ້າງໄດ້ສໍາເລັດ 100% ມີໄລຍະທາງ 6,182 ແມັດ ຈາກເສັ້ນທາງ 13 ໃຕ້ ເຂດບ້ານນາໂດນ ຫາເຂດຈັດສັນ ມີ: ບ້ານກຸງສີ, ບ້ານສົມບູນ, ບ້ານກະບູດ ແລະ ບ້ານຊຽງແຫວນ ລວມມູນຄ່າການກໍ່ສ້າງທັງໝົດ 9.446.666.900 ກີບ ໂດຍເປັນທືນຊ່ວຍເຫຼືອລ້າຂອງ ທ່ານ ໄຊສົງຄາມ ວໍລະຈິດ ປະທານ ບໍລິສັດ ເອັສວີກຼຸບ ຈໍາກັດ ແລະ ຄອບຄົວ.

ຈຸດປະສົງໃນການກໍ່ສ້າງເສັ້ນທາງດັ່ງກ່າວ ກໍ່ເພື່ອເຮັດໃຫ້ການສັນຈອນໄປມາລະຫວ່າງບ້ານຕໍ່ບ້ານ ກໍ່ຄືການຄົມມະນາຄົມຂົນສົ່ງ ໃຫ້ມີຄວາມສະດວກ-ວ່ອງໄວ ແລະ ປອດໄພ, ຜົນສໍາເລັດດັ່ງກ່າວ ກໍ່ຍ້ອນຄວາມຕັດສິນໃຈ, ຄວາມເສຍສະຫຼະອັນສູງສົ່ງ ຂອງຜູ້ໃຫ້ທືນກໍ່ຄື ປະທານ ບໍລິສັດ ເອັສວີກຼຸບ ຕ້ອງການເປັນສ່ວນໜື່ງໃນການພັດທະນາພຶ້ນຖານໂຄງລ່າງຂອງແຂວງໂດຍສະເພາະ ແມ່ນການປະກອບສ່ວນເຂົ້າໃນຂະບວນການ: “ຮັກຊາດ ແລະ ພັດທະນາ” ແລະ ຖືເອົາໂຄງການນີ້ ເພື່ອເປັນສ່ວນໜື່ງໃນການປະກອບສ່ວນເຂົ້າໃນການສ້າງສາພັດທະນາພື້ນຖານໂຄງລ່າງຊ່ວຍແຂວງຄໍາມ່ວນ, ຫວັງຢ່າງຍິ່ງວ່າ ເສັ້ນທາງດັ່ງກ່າວຈະເປັນເສັ້ນທາງໜື່ງ ທີ່ມີຄວາມໝາຍ, ຄວາມສໍາຄັນ ເຂົ້າໃນການນໍາໃຊ້ຢ່າງມີປະສິດທິພາບ ແລະ ພ້ອມກັນບົວລະບັດຮັກສາ ສາມາດນໍາໃຊ້ຢ່າງຍືນຍົງ ແລະ ຖາວອນ ຕະຫຼອດໄປ.

ຂ່າວ: ສຳນັກງານປົກຄອງແຂວງຄຳມ່ວນ